Daşkəsəndə Aprel döyüşlərinin 10-cu ildönümünə həsr olunan tədbir keçirilib

Bakı:

25 °C

66 %

8 m/s

Əlaqə

AZ RU EN

Ana səhifə / YAP xəbərləri / Daşkəsəndə Aprel döyüşlərinin 10-cu ildönümünə həsr olunan tədbir keçirilib

Daşkəsəndə Aprel döyüşlərinin 10-cu ildönümünə həsr olunan tədbir keçirilib

02.04.2026 [17:14]

Aprelin 2-də Daşkəsən Rayon İcra Hakimiyyətinin, YAP Daşkəsən rayon təşkilatının, Daşkəsən rayon Heydər Əliyev Mərkəzinin, rayon Gənclər və İdman sektorunun və Mərkəzləşdirilmiş Kitabxana Sisteminin birgə təşkilatçılığı ilə keçirilən tədbirdə qazilər, gənclər və rayon ictimaiyyətinin nümayəndələri iştirak ediblər.

Tədbir Aprel döyüşlərinin 10 illiyində şəhidlərimizin xatirəsinin anılması və xalqımızın şanlı Zəfər salnaməsini gənc nəslə çatdırmaq məqsədi daşıyıb.

Əvvəlcə Dövlət Himni səsləndirilib, Ümummilli Lider Heydər Əliyevin və şəhidlərimizin əziz xatirəsi bir dəqiqəlik sükutla yad olunub.

Çıxışlarda diqqətə çatdırılıb ki, 2016-cı ilin 2-5 aprel tarixlərində baş verən və Azərbaycan Ordusunun parlaq qələbəsi ilə nəticələnən döyüşlərin 10 illiyi xalqımızın böyük Zəfərə gedən yolunun və sarsılmaz iradəsinin rəmzidir. Prezident, Müzəffər Ali Baş Komandan cənab İlham Əliyevin rəhbərliyi altında Azərbaycan Silahlı Qüvvələri aprel döyüşləri zamanı düşmən təxribatının qarşısı uğurla almış, uzun illər erməni işğalçılarının nəzarətində olan Tərtər rayonunun Talış kəndi ətrafındakı yüksəkliklər və Seysulan kəndi, Cəbrayıl rayonunun Lələtəpə yüksəkliyi və Cocuq Mərcanlı, Goranboy rayonunun Gülüstan kəndi, Tərtər rayonunun Qazaxlar kəndi və Tərtər rayonunun Madaqiz kəndi istiqamətində yollar azad olunmuş, ümumilikdə işğal altındakı ərazilərin 2 min hektardan çoxu düşməndən təmizlənmişdir. Lələtəpə yüksəkliyinin azad edilməsi nəticəsində Cəbrayıl rayonunun Cocuq Mərcanlı kəndində mülki əhalinin yaşayışı üçün təhlükə tamamilə aradan qaldırılmışdır. Prezident cənab İlham Əliyevin Cocuq Mərcanlı kəndinin bərpası və əhalinin yerləşdirilməsi ilə bağlı 2017-ci il 24 yanvar tarixli Sərəncamı ilə Böyük Qayıdış prosesinə start verilmişdir. Eyni zamanda, Aprel döyüşlərindən sonra əli silah tutan hər bir vətəndaşımız işğal altındakı torpaqlarımızın azadlığı uğrunda mübarizəyə tam hazır olduğunu bir daha nümayiş etdirmişdir. Bu birlik Vətən müharibəsində düşməni əzən “Dəmir yumruğ”a çevrilmişdir. Məhz Aprel zəfərindən sonra 2018-ci ildə Naxçıvan istiqamətində Günnüt əməliyyatı ilə 11 min hektarlıq ərazi azad edilmiş, İrəvan-Yeğeqnadzor-Gorus-Laçın-Xankəndi avtomobil yoluna nəzarət ələ keçirilmiş, 2020-ci ildə Tovuz istiqamətində düşmən təxribatının qarşısı qətiyyətlə alınmış, düşmənə sarsıdıcı zərbələr vurulmuşdur. Nəhayət, 2020-ci ilin sentyabr ayının 27-də başlanan 44 günlük Vətən müharibəsi işğal altında olan torpaqlarımızın azad olunması ilə nəticələnmiş, düşmən döyüş meydanlarında darmadağın edilmiş, şəhidlərimizin qisası alınaraq tarixi ədalət bərpa edilmişdir. 2023-cü ilin sentyabrın 19-da lokal xarakterli antiterror tədbirləri ilə ölkəmizin ərazi bütövlüyü və suverenliyi bərpa olunmuşdur. Odur ki, Aprel döyüşləri xalqımızın əldə olunan parlaq Qələbələrinin təməlidir. 10 il əvvəl Lələtəpədə ucaldılan üçrəngli Bayrağımız bu gün Qarabağın və Şərqi Zəngəzurun hər bir guşəsində – Cəbrayılda, Füzulidə, Zəngilanda, Qubadlıda, Kəlbəcərdə, Ağdamda, Şuşada, Hadrutda, Laçında, Əsgəranda, Xocavənddə, Ağdərədə, Xocalıda və Xankəndidə qürurla dalğalanır. Yeni dövrün əsas hədəflərindən biri bərpa-quruculuq işlərinin miqyasını daha da genişləndirmək, soydaşlarımızın qayıdış ünvanlarının sayını artırmaqdır. Bu gün böyük qürur hissi ilə qeyd edirik ki, artıq 9 şəhər – Füzuli, Laçın, Cəbrayıl, Kəlbəcər, Şuşa, Ağdam, Xocalı, Xankəndi və Xocavənd sakinlərinə qovuşub. Azad Qarabağ və Şərqi Zəngəzur cənnət məkana çevrilir.

Aprel döyüşçüləri Elmar Bayramov, Arzu Abdullayev, Vətən müharibəsi qazisi Ceyhun Əliyev isə döyüş yolları barədə söz açaraq xatirələrini bölüşüblər.

Sonda Aprel döyüşlərinə həsr olunmuş “Şanlı Zəfərə gedən yolun başlanğıcı” filmi nümayiş etdirilib.

Paylaş:

Baxılıb: 630 dəfə