Nur saçan ömür yolu

Bakı:

19 °C

63 %

4 m/s

Əlaqə

AZ RU EN

Ana səhifə / YAP xəbərləri / Nur saçan ömür yolu

Nur saçan ömür yolu

15.04.2026 [12:17]

İlqar İlyasov

Yeni Azərbaycan Partiyası Laçın rayon təşkilatının sədri

Azərbaycan tibb elminin parlaq siması, görkəmli alim-oftalmoloq, akademik Zərifə Əliyevanın əziz xatirəsi hər il aprelin 15-də xalqımız tərəfindən dərin ehtiramla yad olunur. Zərifə xanımın Azərbaycan səhiyyəsinə həsr etdiyi ömür yolu onu yalnız böyük alim kimi deyil, həm də yüksək mənəvi dəyərlərə malik kamil insan kimi yaddaşlara həkk etmişdir. Onun həyatı Azərbaycan ziyalısının ən mükəmməl obrazlarından biridir.

Ulu Öndər Heydər Əliyevin ömür-gün yoldaşı olan Zərifə xanım eyni zamanda müasir Azərbaycan dövlətçiliyinin formalaşması prosesində dahi rəhbərin ən sadiq dayaqlarından biri olmuşdur. Ümummilli Lider Zərifə xanım haqqında deyirdi: “Azərbaycan xanımının mənəvi dəyərlərini özündə təcəssüm etdirən Zərifə xanım bir qadın, bir həyat yoldaşı, bir ana, bir həkim, bir alim, bir ictimai xadim olaraq elə sağlığında əfsanəviləşməyi bacarıb…”

Zərifə Əliyevanın elmi fəaliyyəti Azərbaycan tibb tarixində yeni bir mərhələnin əsasını qoymuşdur. O, fəaliyyətinin ilk illərindən etibarən özünü xalqın sağlamlığına həsr etmiş, xüsusilə ölkədə geniş yayılmış Traxoma ilə mübarizədə mühüm xidmətlər göstərmişdir. Onun bu sahədə apardığı tədqiqatlar və tətbiq etdiyi müalicə üsulları qısa müddətdə respublika üzrə geniş yayılmış və yüksək nəticələr vermişdir. Bu xidmətlərinə görə o, oftalmologiya sahəsində nüfuzlu mükafatlardan biri olan M.İ.Averbax adına mükafata layiq görülən ilk azərbaycanlı qadın alim kimi tarixə düşmüşdür.

Akademikin elmi maraqları yalnız bununla məhdudlaşmırdı. O, Qlaukoma xəstəliyinin öyrənilməsi, görmə orqanının funksional vəziyyətinin tədqiqi sahəsində də mühüm elmi nəticələr əldə etmişdir. Onun rəhbərliyi ilə aparılan tədqiqatlar sənaye sahəsində çalışan insanların görmə qabiliyyətinin qorunmasına və peşə xəstəliklərinin qarşısının alınmasına yönəlmişdi. Bu istiqamətdə əldə olunan nailiyyətlər Azərbaycanda oftalmologiya elminin inkişafına ciddi təkan vermişdir.

1967-ci ildə Zərifə xanım Azərbaycan Dövlət Həkimləri Təkmilləşdirmə İnstitutunun göz xəstəlikləri kafedrasına dosent vəzifəsinə dəvət olunmuşdur. Bu dövrdə onun pedaqoji fəaliyyəti xüsusi diqqət çəkmiş, yüzlərlə gənc həkimin yetişməsində mühüm rol oynamışdır. Onun elmi fəaliyyəti ilə yanaşı, ictimai və xeyriyyəçilik fəaliyyəti də yüksək qiymətləndirilmişdir. Kimsəsiz uşaqlara qayğı göstərmək, ehtiyacı olanlara yardım etmək onun həyat prinsipinə çevrilmişdi.

Onun etik və mənəvi dəyərlərə baxışı “Yüksək etimad” adlı əsərində öz əksini tapmışdır. Bu kitab tibbi etikanın, həkim–xəstə münasibətlərinin və humanizmin təbliği baxımından mühüm əhəmiyyət daşıyır.

Bu gün Akademik Zərifə Əliyeva adına Milli Oftalmologiya Mərkəzi onun adını layiqincə yaşadaraq insanların gözlərinə nur bəxş etməkdədir. Azərbaycan Respublikasının Prezidenti İlham Əliyev anası haqqında xatirələrini bölüşərkən onların həyat yolunun çətin, lakin dərin məhəbbət və sədaqət üzərində qurulduğunu xüsusi vurğulamışdır.

Akademik Zərifə Əliyevanın 100 illik yubileyi dövlət səviyyəsində geniş qeyd edilmiş, onun zəngin irsinin gənc nəsillərə çatdırılması istiqamətində mühüm addımlar atılmışdır. Bu gün də onun adı Azərbaycan elminin, səhiyyəsinin və yüksək mənəvi dəyərlərin simvolu kimi yaşayır.

Zərifə xanım Əliyeva öz həyat yolu ilə bir daha sübut etdi ki, böyük alim olmaq üçün ilk növbədə böyük ürəyə sahib olmaq lazımdır. Onun nurlu ömür yolu gələcək nəsillər üçün əbədi bir örnəkdir.

Paylaş:

Baxılıb: 265 dəfə