Milli Dövlətçiliyin Xilas Fəlsəfəsi: 15 İyun – Böyük Qayıdışın və Davamlı Tərəqqinin Tarixi Təməli

Bakı:

29 °C

61 %

10 m/s

AZ RU EN

Ana səhifə / YAP xəbərləri / Milli Dövlətçiliyin Xilas Fəlsəfəsi: 15 İyun – Böyük Qayıdışın və Davamlı Tərəqqinin Tarixi Təməli

Milli Dövlətçiliyin Xilas Fəlsəfəsi: 15 İyun – Böyük Qayıdışın və Davamlı Tərəqqinin Tarixi Təməli

11.06.2026 [12:01]

Azərbaycan xalqının çoxəsrlik dövlətçilik tarixində elə dönüş nöqtələri var ki, onlar sadəcə təqvim dəyişikliyi deyil, bir millətin varolma, intibah və yenidən doğulma dastanıdır. 1993-cü ilin 15 iyun günü — Milli Qurtuluş Günü məhz belə bir tarixi milad, ölkəmizi uçurumun kənarından alan, dövlətimizin müqəddəratını kökündən dəyişən xilaskarlıq missiyasının rəsmi başlanğıcıdır. Biz təşkilat olaraq fəaliyyətimizin hər bir mərhələsində, rayonumuzun sakinləri və gənclərimizlə keçirdiyimiz hər bir görüşdə bu müqəddəs tarixin doğurduğu reallıqları, daxili sabitliyin dövlətçilik üçün nə dərəcədə böyük nemət olduğunu qürur hissi ilə təhlil edir, gələcək fəaliyyət hədəflərimizi məhz bu möhkəm təməl üzərində qururuq. Həmin dövrdə ölkə daxilində tüğyan edən xaos, daxili və xarici bədxahların çirkin planları, idarəolunmaz proseslər xalqımızın ümidsizliyini son həddə çatdırmışdı. Xüsusilə 1993-cü ilin iyununda Gəncədə baş verən və qardaş qırğınına yol açan hərbi qiyam ölkəni faktiki olaraq vətəndaş müharibəsinin astanasına gətirmişdi. Eyni zamanda, mərkəzi hakimiyyətin zəifliyindən istifadə edən bəzi xəyanətkar qüvvələrin cənub bölgəmizdə qondarma "Talış-Muğan Respublikası" elan etmək bəhanəsi ilə separatizm avantürasına əl atması müstəqilliyimizi parçalanmaq və tamamilə yer üzündən silinmək təhlükəsi ilə üz-üzə qoymuşdu. Məhz belə bir ağır, fəlakətli və milli faciəyə çevrilən geosiyasi şəraitdə xalqın səsini eşidib onun təkidli çağırışı ilə Bakıya qayıdan Ulu Öndər Heydər Əliyev həm Gəncədəki gərginliyi canını təhlükəyə ataraq yerindəcə yatırdı və böyük fədakarlıqla qardaş qırğınının qarşısını aldı, həm də cənubda baş qaldıran regional separatizm cəhdlərini sarsılmaz dövlətçilik iradəsi və xalqın dəstəyi ilə birdəfəlik darmadağın etdi. Qurtuluş fəlsəfəsi bizə əyani şəkildə sübut etdi ki, güclü lider, milli birlik və sarsılmaz iradə olmadan daxili sabitliyi bərqərar etmək və dövlət müstəqilliyini qorumaq qeyri-mümkündür.

Ulu Öndərin müdrik, uzaqgörən daxili və xarici siyasəti qısa müddətdə ölkədə qanunun aliliyini bərqərar etdi, pərakəndəliyə, silahlı anarxiyaya tamamilə son qoyaraq nizami ordu quruculuğuna rəvac verdi. Heydər Əliyev dühası Azərbaycanı beynəlxalq arenada etibarlı, dayanıqlı və şəffaf tərəfdaşa çevirən nəhəng enerji müqavilələrinin, o cümlədən "Əsrin Müqaviləsi"nin təməlini qoymaqla ölkənin iqtisadi müstəqilliyini sığortaladı. 15 iyun sadəcə ölkəni xaotik bir vəziyyətdən və parçalanma bəlasından çıxarmadı, həm də dövlətin gələcək onilliklər üçün uğurlu inkişaf modelini, iqtisadi və siyasi suverenliyinin sarsılmaz strateji xəttini formalaşdırdı. Bu daxili sabitlik və milli həmrəylik mühiti bu gün Azərbaycana heç bir kənar təsirdən, siyasi təzyiqlərdən və maliyyə asılılığından qorxmadan, qlobal miqyasda öz milli maraqlarına uyğun tam müstəqil qərarlar qəbul etmək gücü və cəsarəti verir. Dahi rəhbərin uzaqgörənliklə əkdiyi müstəqillik toxumları, bu gün ölkəmizin hər bir guşəsində, rayon və şəhərlərimizdə formalaşan güclü idarəçilik sisteminin, makroiqtisadi dayanıqlılığın və milli intibahın əsas hərəkətverici qüvvəsi kimi çıxış edir.

Bu tarixi xilaskarlıq missiyasının ən böyük, məntiqi və möhtəşəm davamı isə Müzəffər Ali Baş Komandan, Prezident İlham Əliyevin rəhbərliyi ilə qazanılan tarixi, analoqu olmayan Zəfərimiz oldu. Qurtuluş Gününün formalaşdırdığı yenilməz milli ruh, güclü iqtisadi potensial və rəşadətli ordu quruculuğu sayəsində otuz illik işğala son qoyulması və torpaqlarımızın tam azad edilməsi Azərbaycanın müstəqillik tarixini özünün ən uca zirvəsinə daşıdı. Bu gün işğaldan azad olunmuş Qarabağda və Şərqi Zəngəzurda sürətlə aparılan nəhəng quruculuq işləri, müasir infrastruktur layihələri, beynəlxalq hava limanları və Böyük Qayıdış prosesi məhz 1993-cü ildə qoyulmuş o fundamental qurtuluş təməlinin, Heydər Əliyev strategiyasının birbaşa və parlaq nəticəsidir. Azərbaycan artıq təkcə öz sərhədlərində daxili və xarici təhlükəsizliyi təmin edən qüdrətli dövlət deyil, Avrasiya məkanında qlobal enerji marşrutlarını tənzimləyən, qitələrarası təhlükəsiz tranzit qovşaqları yaradan və irimiqyaslı yaşıl enerji layihələri ilə dünyanın gələk ekoloji xəritəsini formalaşdıran regional və beynəlxalq liderdir. Biz fəaliyyətimizdə bu böyük dövlətçilik irsinə hər zaman sadiq qalarq, dövlətimizin qüdrətlənməsi və milli maraqlarımızın qorunması naminə cənab Prezidentin rəhbərliyi ilə həyata keçirilən bütün strateji hədəflərə və dövlət proqramlarına fəal dəstək verməyi özümüzə ən ali, müqəddəs vəzifə hesab edirik.

Zahir Qəhrəmanov

YAP Şirvan şəhər təşkilatının sədri

Paylaş:

Baxılıb: 426 dəfə