Milli birliyin rəmzi

Bakı:

27 °C

57 %

2 m/s

Əlaqə

AZ RU EN

Ana səhifə / YAP xəbərləri / Milli birliyin rəmzi

Milli birliyin rəmzi

11.06.2026 [14:59]

Azərbaycan xalqının taleyində mühüm dönüş nöqtəsi olan 15 İyun – Milli Qurtuluş Günü dövlətçilik tariximizin ən əlamətdar səhifələrindən biridir. Bu tarix təkcə ölkənin ağır siyasi böhrandan xilas olduğu gün deyil, həm də müstəqil Azərbaycanın inkişaf strategiyasının müəyyənləşdirildiyi, dövlətçilik əsaslarının möhkəmləndirildiyi bir mərhələnin başlanğıcıdır. Milli Qurtuluş Günü xalqımızın öz dövlətini qorumaq, müstəqilliyini əbədi və dönməz etmək əzminin təcəssümü kimi tarixə həkk olunmuşdur.

1991-ci ildə dövlət müstəqilliyini bərpa edən Azərbaycan qısa müddət ərzində ciddi siyasi, iqtisadi və hərbi problemlərlə üzləşdi. Ölkədə hakimiyyət böhranı hökm sürür, idarəetmədə xaos yaşanır, iqtisadiyyat tənəzzülə uğrayırdı. Ermənistanın hərbi təcavüzü nəticəsində torpaqlarımız işğal edilir, xalqın gələcəyə inamı sarsılırdı. Xüsusilə 1993-cü ilin iyun hadisələri Azərbaycanı vətəndaş müharibəsi və dövlət müstəqilliyinin itirilməsi təhlükəsi ilə üz-üzə qoymuşdu.

Belə bir mürəkkəb və taleyüklü dövrdə xalqın təkidli tələbi ilə görkəmli dövlət xadimi Heydər Əliyev yenidən siyasi hakimiyyətə qayıtdı. 1993-cü il iyunun 15-də Heydər Əliyevin Azərbaycan Ali Sovetinin Sədri seçilməsi ölkənin həyatında yeni mərhələnin əsasını qoydu. Məhz buna görə də həmin tarix sonralar Milli Qurtuluş Günü elan edildi. Ulu Öndər öz zəngin dövlətçilik təcrübəsi, uzaqgörən siyasəti və qətiyyəti sayəsində Azərbaycanı parçalanmaq təhlükəsindən xilas etdi, ölkədə sabitlik və əmin-amanlıq yaratdı.

Ümummilli lider Heydər Əliyevin xilaskarlıq missiyası yalnız mövcud böhranın aradan qaldırılması ilə məhdudlaşmadı. O, müstəqil Azərbaycan dövlətinin inkişaf konsepsiyasını formalaşdırdı, demokratik və hüquqi dövlət quruculuğunun əsaslarını yaratdı. Ölkədə siyasi sabitliyin təmin olunması iqtisadi islahatların həyata keçirilməsinə, beynəlxalq əlaqələrin genişlənməsinə və Azərbaycanın dünya birliyində layiqli yer tutmasına şərait yaratdı. 1994-cü ildə imzalanan “Əsrin müqaviləsi” ölkənin iqtisadi inkişafında yeni dövr açdı, Azərbaycanın beynəlxalq nüfuzunu daha da artırdı.

Ümummilli Lider daim vurğulayırdı ki, Azərbaycanın dövlət müstəqilliyi əbədi, sarsılmaz və dönməzdir. Onun müəyyən etdiyi inkişaf strategiyası ölkənin hərtərəfli tərəqqisinin əsasını təşkil etdi. Dövlətçilik maraqlarına söykənən bu siyasət nəticəsində Azərbaycan regionun lider dövlətinə çevrildi, güclü iqtisadi və hərbi potensial formalaşdırdı. Ulu Öndərin əsasını qoyduğu milli inkişaf yolu gələcək qələbələrin də təməlini yaratdı.

Bu gün tam əminliklə demək olar ki, Milli Qurtuluş Günü ilə başlayan yol Azərbaycan xalqını böyük Zəfərə apardı. Prezident İlham Əliyevin rəhbərliyi ilə Heydər Əliyev siyasəti uğurla davam etdirildi, ölkəmizin iqtisadi qüdrəti və müdafiə qabiliyyəti daha da möhkəmləndirildi. Dövlət başçısının uzaqgörən siyasəti nəticəsində Azərbaycan beynəlxalq müstəvidə öz mövqelərini gücləndirdi, milli maraqlarını qətiyyətlə müdafiə edən güclü dövlətə çevrildi.

2020-ci ildə 44 günlük Vətən müharibəsində Azərbaycan Ordusunun qazandığı möhtəşəm Qələbə və torpaqlarımızın işğaldan azad edilməsi Milli Qurtuluşun məntiqi nəticəsi oldu. Prezident, Müzəffər Ali Baş Komandan İlham Əliyevin rəhbərliyi altında əldə edilən Zəfər xalqımızın milli birliyinin, dövlətimizin gücünün və Heydər Əliyev siyasi kursunun təntənəsi kimi tarixə yazıldı. 2023-cü ildə suverenliyimizin tam bərpası ilə Azərbaycan öz ərazi bütövlüyünü və dövlət suverenliyini tam təmin etdi.

Bu gün işğaldan azad olunmuş torpaqlarda geniş quruculuq işlərinin aparılması, Böyük Qayıdış proqramının uğurla həyata keçirilməsi və Qarabağın yenidən dirçəldilməsi Azərbaycanın yeni inkişaf mərhələsinin göstəricisidir. Bütün bunlar bir daha sübut edir ki, 15 İyun 1993-cü ildə başlanmış qurtuluş yolu Azərbaycanı güclü, qalib və suveren dövlət zirvəsinə yüksəldib.

Milli Qurtuluş Günü Azərbaycan xalqının dövlətçilik salnaməsində xilaskarlığın, milli birliyin və qətiyyətli liderliyin rəmzidir. Ulu Öndər Heydər Əliyevin xalqı və dövləti naminə həyata keçirdiyi tarixi missiya Prezident İlham Əliyevin rəhbərliyi ilə yeni uğurlarla davam edir. Bu gün qürurla deyə bilərik ki, Qurtuluşdan başlanan yol Zəfərə, Zəfərdən isə daha güclü Azərbaycanın qurulmasına aparır.

Sahib Şükürov

YAP Göyçay rayon təşkilatının sədri

Paylaş:

Baxılıb: 417 dəfə