YAP Yasamal rayon təşkilatında “Natiqlik məktəbi” layihəsinin təqdimat mərasimi keçirilib

Bakı:

27 °C

66 %

1 m/s

Əlaqə

AZ RU EN

Ana səhifə / YAP xəbərləri / YAP Yasamal rayon təşkilatında “Natiqlik məktəbi” layihəsinin təqdimat mərasimi keçirilib

YAP Yasamal rayon təşkilatında “Natiqlik məktəbi” layihəsinin təqdimat mərasimi keçirilib

09.08.2014 [11:10]

Hikmət Babaoğlu: Azərbaycanda siyasi natiqlik Ulu öndər Heydər Əliyevin timsalında özünün zirvəsinə çatdı
Dünən Yeni Azərbaycan Partiyası (YAP) Yasamal rayon təşkilatının qərargahında Azərbaycan Gənclər Fondunun maliyyə dəstəyi ilə “Natiqlik məktəbi” layihəsinin təqdimat mərasimi keçirilib. Tədbirdə YAP Gənclər Birliyinin fəalları iştirak ediblər. Layihənin rəhbəri, YAP Yasamal rayon təşkilatı Gənclər Birliyinin sədr müavini Elməddin Əmirov bu mövzunun gənclər üçün əhəmiyyətli olduğunu bildirib. O, qeyd edib ki, YAP Gənclər Birliyində gələcəyin siyasətçiləri yetişir. Ona görə də, natiqlik sənətinin mənimsənilməsi gənclər üçün vacibdir. E.Əmirov bildirib ki, “Natiqlik məktəbi” layihəsi çərçivəsində təşkil olunan tədbirlərə qatılan gənclər həm düzgün danışıq, həm kitab oxuma, həm də jestlərdən düzgün şəkildə istifadə etmə qaydalarını mənimsəyəcəklər: “Biz layihə çərçivəsində müxtəlif mövzulara toxunacağıq və tədbirlərimiz il boyu davam edəcək. Layihənin əhəmiyyəti çox böyükdür. Çünki gənclərimiz debatlarda və hər hansı bir tədbirdə çıxış edərkən bu məktəbin töhfələrindən faydalanacaqlar”.
Tədbirdə “Yeni Azərbaycan” qəzetinin baş redaktoru, siyasi elmlər doktoru Hikmət Babaoğlu bu mövzuda geniş çıxış edib. YAP-ın fəal gənclərinin bu mövzunu diqqətdə saxlamalarını təqdir edən Hikmət Babaoğlu gələcəyin siyasətçiləri üçün natiqliyin əhəmiyyətli olduğunu vurğulayıb. Qeyd olunub ki, hər bir xalqın gələcəyi onun gəncliyidir və gəncliyin kimliyi, keyfiyyəti, əslində o xalqın gələcək kimliyini formalaşdırır: “Hər bir xalqın milli mədəniyyətinin göstəricilərindən biri də gözəl nitqdir. Bu baxımdan natiqlik hər bir insan üçün lazımlı və vacib sənətdir”.
Bildirilib ki, natiqlik sənəti bir şəxsin özünüifadəsinin təzahürüdür. Belə ki, natiqlik nitq, jest, viziual və emosional formada öz fikirlərinin auditoriyaya çatdırılmasıdır. Natiqlik sənətinin tarixindən danışan Hikmət Babaoğlu bu sənətin qədim tarixə malik olduğunu, Siseron, Demosfen kimi böyük natiqlərin olduğunu diqqətə çatdırıb. Qeyd edilib ki, Azərbaycanda isə Səfəvilər dövlətinin qurucusu Şah İsmayıl Xətai də gözəl natiq kimi tariximizə adını həkk edib. Natiqlik sənətindən danışarkən siyasi, publisistik, bədii, hərbi, işgüzar natiqliyi diqqətə almaq lazımdır.
Tədbirdə o da vurğulanıb ki, natiqlik sənəti ictimai və siyasi münasibətlərdə istifadə olunan bir sənətə çevrilib. Bu gün natiqlik sənəti Azərbaycanda da inkişaf etməkdədir.
“Azərbaycanda siyasi natiqlik Ulu öndər Heydər Əliyevin timsalında özünün zirvəsinə çatdı. Hələ sovetlər birliyi dövründə Ulu öndər Heydər Əliyevin səyləri nəticəsində 1978-ci ildə Azərbaycan dili Konstitusiyamızda dövlət dili statusu qazandı. Ümummilli lider Heydər Əliyev bundan əvvəl də respublikada siyasi nitqlərini Azərbaycan dilində edirdi. Bu çıxışların siyasi liderin dilindən səslənməsi Azərbaycan dilinin inkişafında yeni mərhələnin başlanğıcı oldu. Ulu öndər Heydər Əliyev elə böyük siyasi natiq idi ki, Onun nitqləri Azərbaycan və rus dilində natiqlik nümunələri kimi göstərilirdi və ali partiya məktəblərində tədris olunurdu” - deyə, tədbirdə qeyd olunub.
Bildirilib ki, nitqimizin mənalı, zəngin və rəngarəng olması üçün nitq mədəniyyətinin tələb etdiyi kimi qrammatik cəhətdən düzgün, məntiqi cəhətdən səlis və ana dilində danışmağı bacarmalıyıq. Natiqlik həm də dil mədəniyyətinə söykənir.
Təqdimat mərasimində vurğulanıb ki, gənclərimizin qarşısında duran əsas məsələlərdən biri ondan ibarətdir ki, nitq vasitəsilə özlərini mükəmməl ifadə etməyi öyrənsinlər. Bunun üçün ilk növbədə, geniş söz ehtiyatı olmalıdır. Siyasi nitqlərin öyrənilməsinin zəruriliyinin vurğulandığı tədbirdə bildirilib ki, bunun üçün xüsusilə Ulu öndər Heydər Əliyevin və Prezident İlham Əliyevin nitqləri öyrənilməlidir.
“Prezident İlham Əliyev bəyan edib ki, “qara qızıl”ın intellektual kapitala çevrilməsi bizim təcrübəmizdə özünü doğruldub. Həqiqətən də, gənclərin idraki, əqli keyfiyyətləri onu göstərir ki, biz “qara qızıl”ı insan kapitalına çevirməyi bacarmışıq” - deyə, qeyd olunub. O da xüsusi vurğulanıb ki, siyasi natiqliyin öyrənilməsi YAP-ın gənc üzvləri üçün çox vacibdir.
Daha sonra gənclərin sualları cavablandırılıb. Tədbir diskussiya formasında öz işini davam etdirib.
Nardar BAYRAMLI

Paylaş:

Baxılıb: 1243 dəfə