Rafiq Əliyev: Beynəlxalq ictimaiyyət Ermənistanın Azərbaycana qarşı işğalçı siyasətini və təxribat cəhdini pisləməlidir

Bakı:

20 °C

68 %

8 m/s

AZ RU EN

Ana səhifə / YAP xəbərləri / Rafiq Əliyev: Beynəlxalq ictimaiyyət Ermənistanın Azərbaycana qarşı işğalçı siyasətini və təxribat cəhdini pisləməlidir

Rafiq Əliyev: Beynəlxalq ictimaiyyət Ermənistanın Azərbaycana qarşı işğalçı siyasətini və təxribat cəhdini pisləməlidir

15.07.2020 [08:33]

“İyulun 12-də Ermənistan silahlı qüvvələrinin Azərbaycan-Ermənistan dövlət sərhədinin Tovuz istiqamətində təxribat törətməklə növbəti dəfə sabitliyi pozması onu göstərir ki, rəsmi Yerevan Ermənistan-Azərbaycan Dağlıq Qarabağ münaqişəsinin danışıqlar yolu ilə həllində maraqlı deyil və məqsədi Azərbaycan ərazilərini işğal altında saxlamaqdan ibarətdir”.
Bu fikirləri Yeni Azərbaycan Partiyası (YAP) Yevlax rayon təşkilatının aparat rəhbəri Rafiq Əliyev deyib.
R.Əliyevin sözlərinə görə, Ermənistan hakimiyyətinin növbəti təxribata əl atması bir sıra məqamlarla bağlıdır: “Əvvəla onu deyim ki, Azərbaycanın dünyada nüfuzunun, çəkisinin günü-gündən daha da artması, beynəlxalq mövqelərinin daha da güclənməsi Ermənistanı qıcıqlandırır. Ölkəmizin diplomatik uğurları, Azərbaycan Prezidenti İlham Əliyevin koronavirusa qarşı mübarizədə beynəlxalq həmrəyliyin gücləndirilməsi məqsədilə BMT Baş Assambleyasının xüsusi sessiyasının keçirilməsi haqqında təşəbbüsünün 130 dövlət tərəfindən dəstəklənməsi və xüsusi iclasının keçirilməsi barədə qərarın qəbul edilməsi, həmçinin digər uğurlar Ermənistanı, erməni lobbisini, ermənipərəst dairələri ciddi narahat edir”.
Aparat rəhbəri deyib ki, Ermənistan rəhbərliyinin sərhəddə pozuculuq fəaliyyəti həmçinin, işğalçı ölkə daxilindəki gərgin vəziyyətdən də qaynaqlanır: “Onsuz da acınacaqlı durumda olan işğalçı ölkədə pandemiya əlaqədar heç bir əməli addım atılmayıb, bu isə həm səhiyyə, həm də sosial-iqtisadi sahədə böhranı daha da dərinləşdirib. Eyni zamanda epidemoloji fəlakət qaçılmazdır. Bütün bunların fonunda Ermənistanda daxili ictimai-siyasi durum olduqca mürəkkəbləşib, hakimiyyətə qarşı müxalifətin vahid cəbhədə birləşməsi prosesi sürətlənib. Bu da onu göstərir ki, Paşinyan ölkə daxilində həll etməyə aciz qaldığı problemləri ört-basdır etmək üçün belə bir təxribatla diqqəti daxili problemlərdən yayındırmaq istəyir”.
R.Əliyevin sözlərinə görə, aparılan təhlillər göstərir ki, Ermənistanın bu təxribatı törətməkdə digər bir məkrli niyyəti də var: “Məqsəd həm də sərhəddə gərginlik yaradaraq Kollektiv Təhlükəsizlik Müqaviləsi Təşkilatını (KTMT) münaqişəyə cəlb etməkdir. Ermənistan uzun müddətdir ki, belə hərbi avantüralar yolu ilə KTMT ölkələrini öz çirkin siyasətinə alət etməyə çalışır. Lakin işğalçı dövlətin ümidləri bu dəfə də puç olub. Belə ki, Ermənistanın təkidi ilə sərhəddəki gərginliklə bağlı KTMT-nin daimi şurasının planlaşdırılan növbədənkənar görüşü ləğv olunub”.
Açlqlamasında hər zaman olduğu kimi, bu dəfə də erməni təxribatının qarşısının Azərbaycan Ordusunun həyata keçirdiyi əks-tədbirlər nəticəsində alındığını diqqətə çatdıran R.Əliyev deyib ki, hansı səbəbdən olursa olsun Ermənistanın avantürası ortadadır: “Ermənistan tərəfindən sərhəddə törədilmiş təxribat onu göstərir ki, işğalçı ölkə münaqişənin sülh yolu ilə həllini istəmir. Bu səbəbdən də yaranmış vəziyyətə görə məsuliyyət tam şəkildə Ermənistan rəhbərliyinin üzərinə düşür. Beynəlxalq ictimaiyyət Ermənistanın Azərbaycana qarşı işğalçı siyasətini və təxribat cəhdini pisləməli, buna öz hüquqi qiymətini verməlidir”.

Paylaş:

Baxılıb: 636 dəfə