Tariximizə yazılan növbəti zəfər səhifəsi

Bakı:

20 °C

73 %

6 m/s

Əlaqə

AZ RU EN

Ana səhifə / YAP xəbərləri / Tariximizə yazılan növbəti zəfər səhifəsi

Tariximizə yazılan növbəti zəfər səhifəsi

06.01.2024 [12:58]

Prezident İlham Əliyevin 31 Dekabr-Dünya Azərbaycanlılarının Həmrəyliyi Günü və Yeni il münasibətilə müraciəti hər birimizdə böyük qürur hissi yaratdı. Müraciətdə qeyd edilən uğurlarımıza və cari il üçün hədəflərə nəzər saldıqda Azərbaycan xalqının xoşbəxt xalq olduğunu bir daha böyük inamla qeyd edirik. Bu baxımdan ki, dövlətinin və xalqının gələcəyini düşünən, Azərbaycanın daim zirvələrdə, qarşısına qoyduğu hədəflərə yüksək səviyyədə nail olmasına səy göstərən, qətiyyət nümayiş etdirən Lideri vardır. Müzəffər Ali Baş Komandan İlham Əliyevin rəhbərliyi ilə Azərbaycan ərazi bütövlüyünü və suverenliyini tam bərpa etdi. Bu mühüm hadisə 2023-cü ildə tariximizə yazılan növbəti zəfər səhifəsi oldu. Cənab İlham Əliyev həmin müraciətində bu çağırışı etdi ki, bu gün bütün dünya azərbaycanlıları haqlı olaraq müstəqil Azərbaycanla fəxr edirlər. Bu gün dünya azərbaycanlıları Dünya Azərbaycanlılarının Həmrəyliyi Gününü tam yeni bir ovqatla qeyd edirlər: “Tarixi Zəfərimiz - İkinci Qarabağ müharibəsindəki Zəfər, antiterror əməliyyatı, işğalçılardan azad olunmağımız, separatçı rejimin çökməsi bütün azərbaycanlıları haqlı olaraq bir araya, bir yumruq halına gətirir. Bu gün, eyni zamanda, “Dəmir yumruq” birliyimizin rəmzidir və Azərbaycan xalqını, bütün dünya azərbaycanlılarını əmin etmək istəyirəm ki, “Dəmir yumruq” hər zaman yerində olacaq.” Dünya azərbaycanlılarının həmrəyliyinin, birliyinin möhkəmləndirilməsi dövlətimizin siyasətində əsas istiqamətlərdən biridir. Ümummilli Lider Heydər Əliyevin 1993-cü ildə xalqın təkidli tələbi ilə hakimiyyətə qayıdışından sonra mühüm çağışları arasında bu məqam da xüsusi qeyd edilmişdir ki, Azərbaycanın müstəqilliyini və suverenliyini daimi etmək üçün harada yaşamasından asılı olmayaraq bütün azərbaycanlılar bir amal-azərbaycançılıq ideologiyası ətrafında sıx birləşməlidir. Diaspor quruculuğu ilk gündən dövlət siyasətinin əsasına çevrildi. Bütün dünya azərbaycanlılarını bir araya gətirmək üçün biri-birindən mühüm addımlar atıldı. Həmin ölkələrdə Azərbaycan mərkəzləri, cəmiyyətləri yaradıldı. Sonra onların vahid mərkəzdən idarə olunmasını təşkil etmək üçün 2001-ci ildə Dünya Azərbaycanlılarının I Qurultayı keçirildi. 2003-cü ildən Ulu Öndər Heydər Əliyevin siyasi kursunu uğurla davam etdirən Prezident İlham Əliyev də dünya azərbaycanlılarının birliyinə xüsusi diqqət göstərir. Xarici ölkələrdə yaşayan azərbaycanlılarla əlaqələrin genişləndirilməsini dövlət siyasətinin mühüm istiqamətinə çevirən dövlət başçısı mövcud sosial-iqtisadi inkişaf şəraitində diaspor quruculuğu sahəsində dövrlə səsləşən genişmiqyaslı tədbirlər həyata keçirir. Cənab İlham Əliyev xaricdə yaşayan hər bir azərbaycanlının maraq və mənafeyinin qorunmasını Azərbaycan dövlətinin başlıca vəzifəsi hesab edir. Bu istiqamətdə ortaya qoyduğu siyasi iradə ölkəmizin hüdudlarından kənarda yaşayan soydaşlarımızda milli ruhun yüksəlməsinə, onların vahid ideologiya və məqsədlər ətrafında daha sıx səfərbər olmalarına böyük töhfə verir. Onu da qeyd edək ki, Azərbaycan diaspor təşkilatlarının fəaliyyətinə dəstək vermək, onların maddi-texniki bazasını möhkəmləndirmək, milli-mənəvi dəyərlərimizi inkişaf etdirmək və dünyada daha geniş tanıtmaq, xaricdə yaşayan azərbaycanlıların sosial müdafiəsini gücləndirmək və bu sahəyə dövlət dəstəyinin ünvanlılığını təmin etmək məqsədilə Prezident İlham Əliyevin 2018-ci ildə Fərmanı ilə Diasporla İş üzrə Dövlət Komitəsinin tabeliyində Azərbaycan Diasporuna Dəstək Fondu yaradıldı. Cənab İlham Əliyev hər zaman dünya azərbaycanlılarının fəaliyyətini yüksək dəyərləndirir. Onlar Azərbaycan həqiqətlərinin təbliğində yüksək fəallıq nümayiş etdirirlər. Təbii ki, bu fəaliyyət özünü 44 günlük İkinci Qarabağ müharibəsində nümayiş etdirdi. Dövlət başçısı İlham Əliyev onların fəailiyyətini belə dəyərləndirmişdir: “Müqəddəs Vətən müharibəsi zamanı xaricdə yaşayan soydaşlarımızın düşmənin və anti-Azərbaycan dairələrin məkrli təxribatlarına qarşı cəsarətli etirazları, Azərbaycan həqiqətlərinin dünya ictimaiyyətinə çatdırılması işində fədakar xidmətləri Qələbəmizə layiqli töhfə olmuşdur.” Vətən müharibəsində dünyanın bütün ölkələrində yaşayan azərbaycanlılar da tarixdə görünməmiş dərəcədə fəallıq göstərdilər, daha sıx birləşdilər. Yaşadıqları ölkələrdə Azərbaycanın haqq səsinin eşidilməsi üçün səylərini əsirgəmədilər. Vətən müharibəsi Azərbaycan xalqının birliyini, hər zaman Ali Baş Komandan, Prezident İlham Əliyevin ətrafında sıx səfərbər olduğunu bir daha nümayiş etdirdi. 2022-ci ildə Qarabağın tacı Şuşanın ev sahibliyi etdiyi Dünya Azərbaycanlılarının Zəfər Qurultayı bu məkandan dünyaya birliyimizin, həmrəyliyimizin təqdimatı oldu. Hazırda bu birlik işğaldan azad edilmiş torpaqlarımızda genişmiqyaslı bərpa-quruculuq işlərinin aparılmasında və soydaşlarımızın doğma yurd-yuvalarına qayıdışında öz aydın ifadəsini tapır. Birliyimiz, hənrəyliyimiz bundan sonra daha möhtəşəm uğurları, zəfərləri təmin edəcək. Harada yaşamasından asılı olmayaraq hər bir azərbaycanlı bu Vətən üçün-doğma Azərbaycanımız üçün çalışmalıdır.

Nihad Pənahov

YAP Tovuz rayon təşkilatının sədri

Paylaş:

Baxılıb: 556 dəfə