Türkiyənin inkişafında yeni mərhələ

Bakı:

19 °C

94 %

2 m/s

Əlaqə

AZ RU EN

Ana səhifə / Xəbər lenti / Türkiyənin inkişafında yeni mərhələ

Türkiyənin inkişafında yeni mərhələ

13.04.2023 [10:52]

İlyas Hüseynov: Ərdoğan Türkiyənin mühüm bir regionda aparıcı siyasi-hərbi aktora çevrilməsini təmin edib

Mayın 14-də Türkiyədə keçiriləcək parlament və prezident seçkiləri böyük maraqla izlənilir. Son illərdə Türkiyənin mühüm qlobal coğrafiyada - Yaxın Şərq, Cənubi Qafqaz, Mərkəzi Avropa eləcə də, Şimali Afrikada inkişaf edən siyasi proseslərdə oynadığı rol, Rusiya-Ukrayna müharibəsində tutduğu barışdırıcı mövqe bu ölkənin siyasi reytinqini yüksəldib. Təbii ki, bu amillərin seçkilərin nəticələrinə də təsirsiz ötüşməyəcəyi gözlənilir. Başqa sözlə, cəmiyyət Türkiyənin hazırki siyasi, iqtisadi, hərbi statusundan məmnun görünür - bunu keçirilən sosial sorğular da sübut edir. Seçicilər ölkənin iqtisadi inkişafını, hərbi sənayenin yüksəlişini, yeni texnoloji uğurları yüksək dəyərləndirirlər.

Məsələ ilə bağlı fikirlərini bölüşən Sosial Tədqiqatlar Mərkəzinin sektor müdiri, politoloq İlyas Hüseynov bildirib ki, Türkiyənin müdafiə sənayesi və texnologiyalar sahəsində əldə etdiyi uğurlar göz önündədir. Politoloq vurğulayıb ki, 2022-ci il oktyabrın 29-da Türkiyənin mobillik sahəsində xidmət göstərən qlobal texnologiya markası “Togg”un kütləvi istehsal zavodunun rəsmi açılış mərasimi keçirilmişdi. “Togg” bir sıra göstəricilərinə görə oxşar avtomobilləri qabaqlayır. Qeyd edək ki, elektriklə işləyən avtomobillər istehsal edən zavod Bursa vilayətinin Gemlik rayonunda inşa olunub. Mərasimdə başda Prezident Rəcəb Tayyib Ərdoğan olmaqla, Türkiyənin bir sıra dövlət rəsmiləri iştirak etmişdilər: “Azərbaycan üçün də uğurlu olan 2020-ci ildə təməli qoyulan zavodun inşası cəmi iki ilə tamamlandı. Tikintisində, ümumilikdə, 9700 nəfərin iştirak etdiyi müəssisədə montaj mərkəzi, prototip inkişaf, istifadəçi sınaq parkı kimi bir çox bölmələr də var. Xüsusilə vurğulamaq lazımdır ki, müəssisənin illik istehsal gücünün 175 000 ədədə çatdıqda 4300 nəfərin işlə təmin olunması planlaşdırılır. Bu da məşğulluğun təmin olunması baxımından yüksək göstərici hesab olunur”.

İ.Hüseynovun fikrincə, yeni nəsil avtomobil istehsalı Türkiyə iqtisadiyyatı üçün mühüm perspektivlər vəd edir. Belə ki, Türkiyə Prezidenti il ərzində 175 min avtomobil istehsal olunacağını, 2030-cu ilə qədər istehsalın 1 milyonu ötəcəyini bildirməsi bunu təsdiqləyir. “Bununla da qardaş Türkiyə müasir yanaşması ilə dünyanın qlobal çağırışlarına cavab verən milli istehsal prosesini formalaşdırır. Artıq bir sıra ekspertlər “Togg”un istehsalını Türkiyənin 60 illik xəyalının həyata keçirilməsi kimi qiymətləndirirlər”, - deyən İ.Hüseynovun fikrincə, R.T.Ərdoğanın ictimaiyyət arasında reytinqinin yüksəlməsində iqtisadi faktorlarla yanaşı, siyasi amillər də böyük rol oynayır. Ölkənin stabil inkişafını təmin etməklə bərabər Prezident Ərdoğan Türkiyənin mühüm bir regionda aparıcı siyasi-hərbi aktora çevrilməsini təmin edib. Eyni zamanda, məhz cənab Ərdoğanın səyi nəticəsində Türkiyənin tükdilli ölkələrlə münasibətləri ən yüksək səviyyədədir. Bunun ən bariz sübutu Azərbaycanla Türkiyə arasında imzalanmış “Şuşa bəyannaməsi”dir. Bu bəyannamə iki qardaş dövləti strateji müttəfiq səviyyəsinə çıxardı. Bu gün Türkiyə və Azərbaycan qarşılıqlı olaraq bir-birlərinin təhlükəsizliyinə cavabdeh dövlətlər sayılır. “Digər türkdilli dövlətlərlə də münasibətlər məhz Prezident Ərdoğanın dövlət başçısı olduğu dönəmdə yüksək inkişaf edib. Bu sırada Özbəkistan, Qazaxıstan və digər dövlətlərlə əlaqələrin şaxələndirilməsini, daha da inkişaf etdirilməsini misal çəkə bilərik. Təsadüfi deyil ki, 2023-cü il aprelin 16-da Ankarada Türk Dövlətləri Təşkilatının Dövlət Başçılarının Fövqəladə Zirvə görüşündə çıxış edən Prezident İlham Əliyev bildirmişdi ki, Türkiyə son 20 ildə Cümhur başqanı Rəcəb Tayyib Ərdoğanın liderliyi ilə böyük və şərəfli yol keçmiş, dünyada söz sahibi olmuş, güc mərkəzinə çevrilmişdir. Bu gün dünyada Türkiyə ilə hesablaşırlar və ona hörmət edirlər. Türkiyənin hərbi gücünü, müdafiə sənayesi sahəsində böyük uğurlarını indi dünyada hər kəs görür. Bu illər ərzində Türkiyədə davamlı sabitliyin təmin olunması, ölkənin inkişafı bütün Türk dünyası üçün önəmli şərtdir”, - deyə bildirən sektor müdiri vurğulayıb ki, hazırda Türkiyənin güclənməsi Azərbaycan üçün və bütün türk dünyası üçün mühüm prioritetlər formalaşdırır. Mərkəzi Asiya dövlətlərində də biz Türk Dövlətləri Təşkilatı çərçivəsində geniş inteqrasiya meyillərini müşahidə edirik.

SADİQ

Paylaş:

Baxılıb: 579 dəfə