Füzuli yenidən qurulur

Bakı:

27 °C

54 %

7 m/s

Əlaqə

AZ RU EN

Ana səhifə / Xəbər lenti / Füzuli yenidən qurulur

Füzuli yenidən qurulur

24.10.2023 [13:16]

Günel ABBAS

“Oktyabrın 17-də “Füzuli şəhəri günü”ndə Füzuli şəhərinə köçmüş sakinlər və rayon ictimaiyyətinin nümayəndələri ilə görüşdə Prezident cənab İlham Əliyev qeyd etdi ki, Azərbaycan xalqının öz doğma torpağına sevgisi əbədidir. İşğal dövründə bəziləri, xüsusilə xaricdəki bəzi dairələr hesab edirdilər ki, illər keçdikcə Azərbaycan xalqı öz torpaqlarını unudacaq, gənc nəsil, ümumiyyətlə, tam başqa bir tərzdə tərbiyə alacaq. Ancaq o təhlilçilər və eyni zamanda, siyasi müstəvidə olanlar bir şeyi anlaya bilməmişlər ki, Azərbaycan xalqının öz doğma diyarına nə qədər böyük sevgisi var. Füzulililərin gənc nəsli də öz doğma torpağına gəlməyə qərar verdi. Bu, doğrudan da böyük hadisədir, çünki uşaqlar, yeniyetmələr, gənc nəsil bu torpaqları görməyiblər. Bu, xalqımızın böyüklüyünü göstərir. Onu göstərir ki, biz öz doğma diyarımıza bağlı olan xalqıq”.

Bu fikirləri yeniazerbaycan.com-a açıqlamasında Milli Məclisin üzvü Cavid Osmanov bildirib.

“Füzulinin yeni simasının göz oxşadığını, işğaldan azad olunmuş bütün ərazilərdə yenidənqurma işlərinin aparıldığını vurğulayan Prezident İlham Əliyev bildirdi ki, rahat yaşamaq üçün bütün infrastruktur, şərait var. Beynəlxalq təşkilatlar bunu çox yüksək qiymətləndirirlər, çünki burada yaşayış üçün ən gözəl şərait yaradılıb, həm binaların daxili quruluşu, həm mənzillərin daxili dizaynı, həm mərtəbəlilik prinsipi, binaların bir-birindən aralı olması, məsafə, hər şey gözlənilib. Bütün şəhərlərimiz Füzuli kimi olacaq. Çünki Füzulidə birinci şəhərsalma layihəsini icra edilir. Burada şəhər tamamilə yenidən qurulur. Bu gün həm Füzulidə, həm bütün başqa şəhər və kəndlərimizdə həyata keçirilən layihələr dünya miqyasında şəhərsalma prinsiplərinin yeni qaydalarını təsbit edir”, deyə o, bildirib.

Deputat həmçinin qeyd edib ki, ölkə başçısı görüşdə erməni vandalizminin miqyasına diqqət çəkərək qeyd etdi ki, Füzulinin timsalında bütün dünya gördü ki, erməni vəhşiliyi nədən ibarətdir. “Azərbaycan uzun illər Qarabağ həqiqətlərini dünya birliyinin diqqətinə çatdırmağa çalışanda bəziləri inanmırdı, elələri də var idi ki, inanmaq istəmirdi. İşğalçı dövlət heç kimi o vaxt bu bölgəyə buraxmırdı. Çünki buraya gələn hər bir insan erməni vəhşiliyinin nədən ibarət olduğunu görəcəkdi. Füzuli elə bir formada dağıdılmışdı ki, rayon azad olunanda Bayrağımızı qaldıraq üçün bir salamat bina belə yox idi. Bir sözlə, rəsmi İrəvanın siyasəti insanlara zülm etmək, onlara işgəncə vermək, Azərbaycan xalqına qarşı etnik təmizləmə aparmaqdan ibarət olub. Ölkə başçısı qeyd etdi ki, biz heç vaxt işğalı, əzab-əziyyəti unutmamalıyıq. Gənc nəsil də bunu bilməlidir.

Separatçıların kitabının birdəfəlik bağlandığını bəyan edən Prezident İlham Əliyev xatırlatdı ki, bir çoxları təkrarlayırdılar ki, münaqişənin hərbi həlli yoxdur. Biz göstərdik ki, var və bu yaxınlarda bir daha göstərdik, bu mövzu - Qarabağ münaqişəsi mövzusu birdəfəlik bağlandı”.

“İşğaldan azad edilmiş bütün ərazilərimiz kimi Füzuli də tamamilə yenidən qurulur. Aylar keçdikcə burada yaşayanların sayı da təbii ki, artacaq. Böyük Qayıdış Proqramının uğurla icra edildiyini qeyd edən Prezident İlham Əliyev Füzulidə artıq 800-dən çox insan yerləşdiyini, ilin sonuna qədər isə burada təqribən 2 minə yaxın insanın yaşayacağını açıqladı. Böyük Qayıdış Proqramının birinci mərhələsinin sonunda, yəni 2026-cı ilin sonunda Füzuli rayonunda 22 min insan, bütövlükdə isə Qarabağ və Şərqi Zəngəzurda 140 min insan yaşayacaq.

Ölkə başçısı bildirdi ki, işğaldan azad olunmuş bütün ərazilərdə insanlar rahat yaşamalıdır. Bu səbəbdən də bütün layihələr icra edilərkən məşğulluq məsələlərinə də böyük diqqət yetirilir. Aidiyyəti dövlət qurumları burada yerləşən insanların məşğulluq imkanlarının olması üçün ciddi addımlar atır. Həmçinin özünüməşğulluq proqramı icra ediləcək ki, bütün ərazilərdə həyat qaynasın”, - C. Osmanov deyib.

Paylaş:

Baxılıb: 491 dəfə