Rusiya özünə yeni düşmən axtarır...

Bakı:

8 °C

87 %

2 m/s

Əlaqə

AZ RU EN

Ana səhifə / Analitik / Rusiya özünə yeni düşmən axtarır...

Rusiya özünə yeni düşmən axtarır...

18.01.2025 [10:32]

Bu gün Rusiyada hakimiyyət dairələrinin sifarişlərini yerinə yetirən bəzi media qurumları ölkəmizə və xalqımıza qarşı qarayaxma kampaniyası aparır, xalqımızın ünvanına təhqirlər yağdırırlar. Hər kəsə aydındır ki, Rusiyada media qurumlarının heç bir razılıq olmadan Azərbaycana qarşı həqarətlər səsləndirməsi qeyri-mümkündür. Bu ölkədə media qurumları hakimiyyət dairələrinin iradəsindən kənar addım ata bilməzlər. Əgər belə olsa idi, həmin qurumlara qarşı çox ciddi tədbirlər görülərdi. Ancaq bu, baş vermir...

Bu gün Rusiyada Azərbaycanı təhqir edənlər dövlət orqanlarının nəzarəti altındadır. Onlar aidiyyatı orqanlarının icazəsi olmadan heç bir addım ata bilməzlər. Rusiyadakı media qurumları ölkəmizi məhz onların dili ilə təhqir edirlər. Sözsüz ki, bu prosesi idarə edən də əli hər yerə çatan aidiyyatı təhlükəsizlik orqanlarıdır.

Onların tapşırıqları ilə Rusiyadakı azərbaycanlılar gah neonasistlərin dili ilə hədələnir, gah da “Komsomolskaya pravda” və digər informasiya portallarında Azərbaycana qarşı heç bir əsası olmayan, yalan məlumatlar yayılır, ölkəmizə qarşı böhtanlar atılır və təhqirlər yağdırılır. Əslində onlar bu cür davranışlar sərgiləməklə özlərini gülünc vəziyyətə qoyurlar.

Azərbaycana qarşı bu münasibət onu deməyə əsas verir ki, Rusiya özünü dost kimi aparmır və qonşusuna qarşı düşmən münasibət bəsləməyə üstünlük verir.

2024-ci il dekabrın 25-də Rusiya səmasında vurulan “Azərbaycan Hava Yolları” aviaşirkətinin J2-8243 nömrəli Bakı-Qroznı reysini yerinə yetirən “Embraer 190” təyyarəsinin qəzaya uğramasının səbəblərinə obyektiv münasibət sərgiləmək, öz ölkəsinin səhvini etiraf etmək və Azərbaycan xalqından üzür istəmək əvəzinə ölkəmizə və xalqımıza təhqirlər yağdırmaq və hədə-qorxuya əl atmalarına həyasızlıqdan başqa ad vermək olmaz.

Rusiyada namələm olan pilotların danışıqlarını yaymaqla izi azdırmağa, məsələni əsas mətləbdən yayındırmaları bəs deyil, hələ Azərbaycanı günahkar çıxarmağa çalışırlar.

Xatırladaq ki, Prezident İlham Əliyev öz intellektual etikasına sığınaraq son müsahibəsində sərnişin təyyarəsinin qəzaya uğramasında məsuliyyət daşıyan şəxslərin cəzalandırılmasına və həlak onların ailələrinə və zərər çəkənlərə kompensasiya ödənilməsinin vacibliyini diqqətə çatdırdı.

Azərbaycan öz haqlı məsələsini Rusiya ilə diplomatik tərzdə həll etməyə çalışır. Amma biz görürük ki, şimal qonşumuz dost ölkə kimi davranmır, Azərbaycanın suallarına cavab vermək, məsələni obyektiv araşdırmaq və üzərinə düşən öhdəlikləri yerinə yetirməkdən boyun qaçırır.

Azərbaycan təyyarənin qəzaya uğramasında birbaşa günahı olan şəxslərin məsuliliyyətə cəlb olunmasını tələb edir və bu məsələdə tam haqlıdır. Çünki istənilən ölkə, hətta Rusiyanın özü belə bu addımı atardı.

Rusiyanın belə ucuz davranışı təəssüf doğurur. Özünü həqiqi dost və qonşu kimi aparan ölkə öz dostuna və qonşusuna bu cür davranış sərgiləməz.

Rusiyadan fərqli olaraq, Azərbaycan etik məsələlərə çox dəyər verir. Ölkəmizdə bu günə qədər heç media qurumu, hətta ekspertlər və sosial media istifadəçiləri əndazəni aşmayıblar və qonşu ölkələrə təhqirə və böhtana yol verməyiblər. Rusiya media qurumlarının ölkəmizə qarşı ucuz şouları qətiyyən yolverilməzdir.

Azərbaycan dövləti və xalqı Rusiyanın məsuliyyətli davranmasını, günahkarların tez bir zamanda cəzalandırılmasını və təyyarə qəzasında həlak olanların ailələrinə və zərər çəkənlərə kompensasiya ödənilməsini gözləyir. Azərbaycan haqlı mövqeyindən geri çəkilməyəcək.

Paylaş:

Baxılıb: 470 dəfə