Vətənpərvər gənclik qalib Azərbaycanın etibarlı gələcəyidir

Bakı:

9 °C

87 %

11 m/s

Əlaqə

AZ RU EN

Ana səhifə / Arxiv / Vətənpərvər gənclik qalib Azərbaycanın etibarlı gələcəyidir

Vətənpərvər gənclik qalib Azərbaycanın etibarlı gələcəyidir

02.02.2026 [11:59]

Yeni Azərbaycan Partiyası (YAP) Nizami rayon təşkilatı tərəfindən 2 fevral - Azərbaycan Gəncləri Günü münasibətilə “Zəfər konsepsiyası və Azərbaycançılıq ideologiyası kontekstində müasir gəncliyin prioritet vəzifələri” mövzusunda tədbir və “Qış məktəbi”nin bağlanış mərasimi keçirilib.

Əvvəlcə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda canlarını qurban vermiş şəhidlərin əziz xatirəsi bir dəqiqəlik sükutla yad edilib. Azərbaycan Respublikasının Dövlət Himni səsləndirilib.

Sonra Azərbaycanda gənclər siyasəti barədə videoçarx nümayiş etdirilib.

Tədbirdə Nizami Rayon İcra Hakimiyyətinin başçısı Coşqun Cəbrayılov, Milli Məclisin deputatı Könül Nurullayeva, Milli Məclisin deputatı, YAP Təftiş Komissiyasının üzvü Naqif Həmzəyev, YAP Mərkəzi Aparatının İnformasiya texnologiyaları və ictimaiyyətlə əlaqələr şöbəsinin müdiri Nurlan Qələndərli, partiyanın Nizami rayon təşkilatının sədri Ramil Vəlibəyov və başqaları çıxış ediblər.

Çıxışlarda vurğulanıb ki, 2 fevral - Azərbaycan Gəncləri Günü Ulu Öndər Heydər Əliyevin gənclərə hədiyyəsi, yüksək diqqət və qayğısının bariz nümunəsidir. Qeyd olunub ki, Ümummilli Lider tərəfindən 1 fevral 1997-ci il tarixində imzalanmış Sərəncama əsasən fevralın 2-si Azərbaycan Gəncləri Günü elan edilib. MDB məkanında və Şərqi Avropa ölkələri arasında ilk dəfə olaraq Azərbaycanda Gənclər Günü kimi təntənəli şəkildə qeyd edilməyə başlanıb ki, bu da Azərbaycan gəncliyinə verilən yüksək dəyərin göstəricisidir.

Natiqlər Ulu Öndər Heydər Əliyevin mənəvi mirası olan azərbaycançılıq ideologiyası əsasında vətənpərvərlik ruhunda yetişən və Müzəffər Ali Baş Komandan İlham Əliyevin rəhbərliyi ilə torpaqlarımızın işğaldan azad edilməsi uğrunda böyük rəşadət göstərmiş gənclərin qarşısında duran başlıca vəzifələrdən bəhs ediblər. Qeyd olunub ki, vətənpərvər gənclik qalib Azərbaycanın etibarlı gələcəyidir.

Çıxışlardan sonra YAP Nizami rayon təşkilatının 2 fevral - Azərbaycan Gəncləri Günü münasibətilə təşkil etdiyi “Qış məktəbi”nin bağlanış mərasimi olub. Yanvar ayının 26-dan 30-dək keçirilmiş “Qış məktəbi” haqqında videoçarxın nümayişindən sonra gənclər adından rayon təşkilatının könüllüsü Aytac Şahverənli, “Qış məktəbi”nin könüllü iştirakçısı, qardaş Türkiyə Respublikasının hakim Ədalət və İnkişaf Partiyasının Gənclik qollarının üzvü Can Yücel təəssüratlarını bölüşüblər.

Daha sonra Nizami rayonunun ictimai və mədəni həyatında fəallığına görə bir qrup gənc Nizami Rayon İcra Hakimiyyətinin fəxri fərmanları, YAP Nizami rayon təşkilatının ictimai-siyasi həyatında fəallıqlarına görə bir qrup gənc fəxri fərmanlar, təşəkkürnamələr, eləcə də rayon təşkilatının könüllülük layihəsinin məzunları və “Qış məktəbi”ni uğurla başa vuran iştirakçılar sertifikatlar ilə təltif ediliblər.

Tədbirə Yeni Azərbaycan Partiyasının himninin səsləndirilməsi ilə yekun vurulub.

Paylaş:

Baxılıb: 100 dəfə