Dağ-mədən və metallurgiya sənayesinin inkişafı yeni iqtisadi imkanlar açır

Bakı:

19 °C

72 %

2 m/s

Əlaqə

AZ RU EN

Ana səhifə / Arxiv / Dağ-mədən və metallurgiya sənayesinin inkişafı yeni iqtisadi imkanlar açır

Dağ-mədən və metallurgiya sənayesinin inkişafı yeni iqtisadi imkanlar açır

25.09.2026 [14:32]

Azərbaycan iqtisadiyyatının davamlı inkişafının təmin edilməsi, qeyri-neft sektorunun genişləndirilməsi və ölkənin malik olduğu təbii resurslardan daha səmərəli istifadə olunması istiqamətində həyata keçirilən məqsədyönlü siyasət yeni mərhələyə qədəm qoyur. Sentyabrın 22-də Prezident İlham Əliyevin sədrliyi ilə “Azərbaycan Respublikasında 2027–2030-cu illərdə dağ-mədən (metal filizləri) və metallurgiya sənayesinin inkişafına dair Dövlət Proqramı”na həsr olunmuş müşavirənin keçirilməsi də bu baxımdan mühüm əhəmiyyət daşıyır. Dövlət başçısının çıxışında ölkənin sənaye potensialının daha da gücləndirilməsi, təbii sərvətlərin iqtisadi dövriyyəyə cəlb edilməsi və xammaldan son məhsula qədər bütöv istehsal zəncirinin formalaşdırılması əsas prioritetlər kimi diqqətə çatdırılıb.

Prezident İlham Əliyevin qeyd etdiyi kimi, dağ-mədən və metallurgiya sənayesi ölkə iqtisadiyyatı, xüsusilə də qeyri-neft sektorunun inkişafı üçün böyük perspektivlər vəd edən sahələrdəndir. Bu istiqamətin inkişafı yalnız yeni istehsal müəssisələrinin yaradılması ilə məhdudlaşmır, eyni zamanda Azərbaycanın zəngin mineral resurslarının daha səmərəli şəkildə istifadəsinə, yüksək əlavə dəyər yaradan məhsulların istehsalına və ixrac imkanlarının genişləndirilməsinə şərait yaradır. Dövlət Proqramının əsas mahiyyəti də məhz təbii sərvətlərin xammal kimi çıxarılması ilə kifayətlənməyərək onların ölkə daxilində emalını və tam dəyər zəncirinin yaradılmasını təmin etməkdir.

Dövlət Proqramının 2027–2030-cu illərdə icrası üçün ümumi investisiya ehtiyacı 5,3 milyard manat qiymətləndirilir. Bunun böyük hissəsinin qeyri-büdcə mənbələri hesabına formalaşdırılması nəzərdə tutulur. Proqram çərçivəsində sektorun əlavə dəyərinin və illik ixrac potensialının 2,6 dəfə artırılması qarşıya mühüm hədəf kimi qoyulub. Eyni zamanda, beş mindən çox daimi iş yerinin yaradılması nəzərdə tutulur ki, bu da yeni sənaye istiqamətinin sosial-iqtisadi əhəmiyyətini aydın şəkildə göstərir.

Xüsusilə “Filizçay”, “Daşkəsən”, “Ortakənd” və “Söyüdlü” yataqlarının istismara hazırlanması, “Filizçay” yatağında mis, sink və qurğuşunun tamhəcmli emalının həyata keçirilməsi, “Söyüdlü”də qızılın emalı, “Daşkəsən” layihəsində isə isti briketləşdirilmiş dəmir istehsalı gücünün yaradılması ölkənin metallurgiya sənayesinin yeni mərhələyə yüksəlməsinə imkan verəcək. Qarabağ və Şərqi Zəngəzurda geoloji kəşfiyyatın genişləndirilməsi də bu prosesin mühüm istiqamətlərindən biridir.

Beləliklə, qarşıdakı illərdə Azərbaycanın mineral resurs potensialının iqtisadi gücə çevrilməsi, yeni istehsal sahələrinin yaradılması, məşğulluğun artırılması və sənaye müəssisələrinin müasir texnologiyalar əsasında inkişaf etdirilməsi üçün geniş imkanlar formalaşacaq. Bu isə iqtisadiyyatın şaxələndirilməsinə, regionların inkişafına və ölkənin sənaye xəritəsinin daha da zənginləşməsinə mühüm töhfə verəcək.

Azərbaycanın iqtisadi inkişaf modelində enerji sektorunun xüsusi yeri var. Ölkəmiz illər ərzində həyata keçirilən irimiqyaslı enerji layihələri, etibarlı tərəfdaşlıq siyasəti və beynəlxalq əməkdaşlıq nəticəsində regional və qlobal enerji təhlükəsizliyinin təmin olunmasında mühüm rol qazanan dövlətlərdən birinə çevrilib. Prezident İlham Əliyevin çıxışlarında da Azərbaycanın enerji siyasətinin ölkənin beynəlxalq mövqelərinin möhkəmlənməsinə və iqtisadi imkanlarının genişlənməsinə verdiyi töhfə dəfələrlə vurğulanıb.

Bu gün Azərbaycanın qarşısında duran əsas vəzifələrdən biri enerji sektorunda formalaşdırılmış potensialı digər strateji iqtisadi istiqamətlərə də daşımaq, qeyri-neft sənayesinin inkişafını sürətləndirmək və yeni ixrac imkanları yaratmaqdır. Dağ-mədən və metallurgiya sənayesinin inkişafına dair Dövlət Proqramı məhz bu baxımdan xüsusi əhəmiyyət kəsb edir. Enerji sektorunda əldə olunan təcrübə, formalaşmış investisiya mühiti və beynəlxalq tərəfdaşlıq imkanları Azərbaycanın yeni sənaye sahələrinin inkişafı üçün də mühüm baza yaradır.

2027–2030-cu illəri əhatə edən Dövlət Proqramı Azərbaycanın iqtisadi potensialının daha geniş miqyasda səfərbər edilməsinə hesablanıb. Dövlət başçısının vurğuladığı kimi, məqsəd təbii sərvətlərdən səmərəli istifadə etməklə yanaşı, ölkə daxilində istehsal zəncirini formalaşdırmaq, əlavə dəyər yaratmaq və Azərbaycanın sənaye potensialını daha da gücləndirməkdir. Proqramın uğurlu icrası ölkəmizin qeyri-neft sektorunun inkişafına, ixrac imkanlarının genişlənməsinə, yeni iş yerlərinin açılmasına və iqtisadi dayanıqlığın daha da möhkəmlənməsinə xidmət edəcək.

Vəfa Məmmədova

YAP Kəngərli rayon təşkilatının fəalı

Paylaş:

Baxılıb: 90 dəfə