Təhsilimizin əsasında nizam-intizam və məsuliyyət dayanır

Bakı:

24 °C

78 %

9 m/s

Əlaqə

AZ RU EN

Ana səhifə / Arxiv / Təhsilimizin əsasında nizam-intizam və məsuliyyət dayanır

Təhsilimizin əsasında nizam-intizam və məsuliyyət dayanır

13.10.2026 [19:08]

Dövlət ümumi təhsil müəssisələrində təhsilalanların və təhsilverənlərin geyimi məktəb mədəniyyətinin, nizam-intizamın və peşə etikasının mühüm göstəricilərindən biridir. Geyim həm də təhsil mühitinə münasibəti, məsuliyyət hissini və ümumi davranış mədəniyyətini ifadə edən amildir. Bu baxımdan, məktəblərdə geyim qaydalarına əməl olunması sağlam, təhlükəsiz, nizamlı və qarşılıqlı hörmətə əsaslanan təhsil mühitinin formalaşdırılmasında xüsusi əhəmiyyət daşıyır.

Məktəbli geyimi təhsilalanlar arasında vahidlik və bərabərlik hissinin gücləndirilməsinə, diqqətin zahiri fərqlərdən təlim-tərbiyə prosesinə yönəldilməsinə xidmət edir. Səliqəli və məktəb qaydalarına uyğun geyim şagirdlərdə məsuliyyət, özünənəzarət və kollektivə mənsubiyyət hissini inkişaf etdirir. Eyni zamanda, geyim qaydalarına riayət etmək uşaqlara ictimai normalara hörmətlə yanaşmağı, üzərlərinə düşən vəzifələri dərk etməyi və gündəlik həyatlarında intizamlı olmağı öyrədir.

Təhsilalanların geyimi təmiz, səliqəli, rahat və müəyyən edilmiş tələblərə uyğun olmalıdır. Geyim seçilərkən şagirdlərin yaş xüsusiyyətləri, sağlamlığı, təhlükəsizliyi və mövsümi şərait nəzərə alınmalıdır. Məktəbli formasına dair tələblər qanunvericiliyə və müvafiq qaydalara uyğun tətbiq edilməli, onların mahiyyəti şagirdlərə və valideynlərə aydın şəkildə izah olunmalıdır. Bu prosesdə əsas məqsəd yalnız qaydalara formal riayət olunmasına nail olmaq deyil, şagirdlərdə məktəb mədəniyyətinə şüurlu münasibət formalaşdırmaqdır.

Təhsilverənlərin geyimi də məktəbin ümumi nüfuzuna və pedaqoji mühitin keyfiyyətinə təsir göstərən amillərdəndir. Müəllim şagirdlər üçün bilik mənbəyi olmaqla yanaşı, davranışı, ünsiyyət mədəniyyəti və şəxsi nümunəsi ilə də tərbiyəvi təsir göstərir. Buna görə də təhsilverənlərin geyimi səliqəli, təmiz, işgüzar mühitə və pedaqoji fəaliyyətin xüsusiyyətlərinə uyğun olmalıdır. Peşəkar görünüş müəllimin nüfuzunu tamamlayan, onun məsuliyyətini və təhsil prosesinə hörmətini ifadə edən xüsusiyyətlərdən biridir.

Geyim qaydalarının tətbiqində məktəb rəhbərliyinin, müəllimlərin, valideynlərin və təhsilalanların üzərinə mühüm vəzifələr düşür. Məktəb rəhbərliyi qaydaların düzgün izahını və ardıcıl tətbiqini təmin etməli, müəllimlər şagirdlərə şəxsi nümunə göstərməli, valideynlər isə övladlarının məktəbli geyiminə diqqətlə yanaşmalıdırlar. Şagirdlər də məktəbin daxili nizam-intizam qaydalarına əməl etməyin ümumi təhsil mühitinə hörmətin ifadəsi olduğunu dərk etməlidirlər.

Məktəb geyimi ilə bağlı tələblərə əməl etmək hər bir təhsil iştirakçısının ortaq məsuliyyətidir. Gəlin, məktəbli geyiminə sadəcə gündəlik geyim kimi deyil, təhsilə hörmətin, intizamın və vahid məktəb dəyərlərinin ifadəsi kimi yanaşaq. Şagirdləri qaydalara əməl etməyə təşviq edək, müəllimlərimizlə nümunə göstərək, valideynlərimizlə əməkdaşlığı gücləndirək. Hər birimiz məktəb mədəniyyətinin qorunmasına öz töhfəmizi verək.

Eyni zamanda, təhsil mühitində mövcud olan məsələlərdən sui-istifadə edərək cəmiyyətdə narazılıq yaratmağa, ictimai sabitliyə xələl gətirməyə və təhsil sisteminə olan etimadı zəiflətməyə çalışan hər hansı qüvvələrin mümkün təxribat cəhdlərinə qarşı diqqətli və prinsipial mövqe nümayiş etdirilməlidir. Təhsilimizin nüfuzunun qorunması, məktəblərimizdə sağlam mənəvi-psixoloji mühitin təmin olunması və müəyyən edilmiş qaydaların düzgün tətbiqi hər birimizin ortaq məsuliyyətidir. Bu məsələdə məktəb rəhbərliyi, müəllimlər, valideynlər və ictimaiyyət həmrəylik göstərməli, emosiyalara və əsassız məlumatlara deyil, qanunvericiliyə, sağlam düşüncəyə və qarşılıqlı hörmətə əsaslanmalıdırlar. Təhsilimizin hədəfə çevrilməsinə, məktəblərdə süni qarşıdurma yaradılmasına və mövcud məsələlərdən təxribat məqsədilə istifadə edilməsinə yol verilməməlidir. Unutmayaq ki, təhsilimizin qorunması, milli birliyimizin möhkəmləndirilməsi və gələcəyimizin etibarlı təminatı hamımızın birgə məsuliyyətidir.

Bəxtiyar Nəbiyev

YAP Yasamal rayon təşkilatının sədri

Paylaş:

Baxılıb: 45 dəfə

Xəbər lenti

Hamısına bax