Ekspert: Neft spekulyantları üçün həqiqət anı başlayır

Bakı:

4 °C

65 %

7 m/s

Əlaqə

AZ RU EN

Ana səhifə / Dünya / Ekspert: Neft spekulyantları üçün həqiqət anı başlayır

Ekspert: Neft spekulyantları üçün həqiqət anı başlayır

13.08.2015 [10:08]

Almaniyada çıxan “Deutsche Welle” nəşrində ekspert Andrey Qurkovun dünyada neftin qiymətlərinin dəyişmə dinamikası haqqında maraqlı məqaləsi dərc olunub. Məlum olduğu kimi, neft kotirovkaları prinsipcə yeni həddə yaxınlaşıb. İndi kotirovkalar ötən ilin bütün ikinci yarısı boyu davam edən və bu ilin yanvarında çökdüyü səviyyəyə yaxınlaşıb. Onda Avropanın “Brent” markası 46-47 dollar civarında idi. Sonra kotirovkalar artaraq may ayında 68 dollara çatdı və yenidən yavaş-yavaş enməyə başladı. Artıq avqustun 10-da hərraclar zamanı bir barrelin qiyməti azalaraq, 48 dollara düşdü. “Qara qızıl”ın başqa sortlarında da analoji trayektoriya müşahidə olundu.
Müəllif hesab edir ki, neft “birja malları üçün sözün əsl mənasında xrestomatik hərəkət edib”. Uzunsürən kəskin azalmadan sonra yetərincə güclü sıçrayış baş verib, sonra qiymətlər yenə də başlanğıc səviyyəyə qayıdıb. Neft fyuçersləri bazarında dolaşan çoxsaylı spekulyantlar üçün həqiqət anı başlayır. Başqa sözlə desək, yüksəlməyə, yoxsa azalmağa ümid bəsləmək məsələsi məhz indi həll olunmalıdır.
A.Qurkovun fikrincə, birja oyunçularını makroiqtisadi göstəricilər bir o qədər də maraqlandırmır: onlar cədvəlləri nəzərdən keçirir və əsasən texniki təhlili rəhbər tuturlar. Neft kotirovkaları cədvəlində isə bu mənzərə aydın görünür: bazar bir növ dibi test etməyə başlayır. “Brent”in qiyməti 46-49 dollar civarında sabitləşərsə, bu, dibin yetırincə möhkəm olduğunu göstərəcək, axı, yeddi ay ərzində enmə ikinci dəfədir ki, bu səviyyədə qərarlaşıb. Belə olan halda oyunçular adətən “ikiqat dib” fiqurundan danışır və yüksəlməyə üstünlük verirlər.
Ekspert əmindir ki, yaxın vaxtlarda neftin qiymətlərini azaltmağa yeni cəhdlər olacaq. Belə spekulyativ hücumlara makroiqtisadi faktorlar da açıq-aşkar kömək edir. Neft əvvəlki kimi boldur: nə Səudiyyə Ərəbistanı, nə OPEK-in başqa üzvləri, nə də Rusiya neft hasilatını azaltmayıb. İran isə hasilatı kəskin artırmağa hazırlaşır. Eyni zamanda ABŞ-da şist yataqları aşağı qiymətlərin öhdəsindən çoxlarının gözlədiyindən daha yaxşı gəlir.
Məqalə müəllifi yazır: “Ümumən vəziyyət spekulyantlar üçün neftin qiymətlərini ucuzlaşdırmağa cəhd baxımından çox cəlbedicidir. Başqa məsələ, müvəffəqiyyət qazanmaq üçün onların heç bir qarantiyası yoxdur. “İkiqat dib”in davamlı olacağı istisna deyil. Belə olan halda biz yaxın günlərdə neft kotirovkalarının yeni sıçrayışının və ola bilsin, 50-60 dollar diapazonunda sabitləşəcəyinin şahidi olacağıq. Qiymətlərin əhəmiyyətli dərəcədə artması üçün hələlik nə makroiqtisadi, nə də texniki səbəblər yoxdur”.

Paylaş:

Baxılıb: 1083 dəfə