Dünyanın gənc alim və mütəxəssisləri Bakıda bir araya gəliblər

Bakı:

28 °C

54 %

10 m/s

Əlaqə

AZ RU EN

Ana səhifə / Elm / Dünyanın gənc alim və mütəxəssisləri Bakıda bir araya gəliblər

Dünyanın gənc alim və mütəxəssisləri Bakıda bir araya gəliblər

16.10.2014 [09:35]

Oktyabrın 15-də Azərbaycan Milli Elmlər Akademiyasının (AMEA) binasında gənc alim və mütəxəssislərin “Fundamental və tətbiqi elmlərin (Yer, texnika və kimya elmləri) aktual problemlərinin həllində multidissiplinar yanaşmanın rolu” mövzusunda birinci Beynəlxalq elmi konfransı öz işinə başlayıb.
AzərTAc xəbər verir ki, Neftçilər Gününə və “Əsrin müqaviləsi”nin 20 illiyinə həsr olunan tədbir AMEA-nın, Azərbaycan Respublikası Dövlət Neft Şirkətinin (ARDNŞ) birgə təşəbbüsü və dəstəyi, akademiyanın Gənc Alim və Mütəxəssislər Şurasının təşkilatçılığı ilə reallaşdırılıb.
Tədbirdə AMEA-nın prezidenti, akademik Akif Əlizadə çıxış edərək müasir Azərbaycan elminin inkişafında gənc alimlərin rolunu xüsusilə vurğulayıb, onların inkişafı baxımından beynəlxalq konfransın mühüm əhəmiyyət kəsb etdiyini bildirib.
Akademik Akif Əlizadə Azərbaycan elminin inkişafında və dünya elminə inteqrasiyasında gənc alimlərin rolundan, akademiyada onlar üçün yaradılmış şəraitdən, gənc alimlərin sosial problemlərinin aradan qaldırılması istiqamətində görülən və görüləcək işlərdən danışıb.
Qeyd edilib ki, bütün sahələrdə sürətlə inkişaf edən Azərbaycanda keçirilən beynəlxalq tədbirlər dünya ictimaiyyətinin diqqətini ölkəmizə cəlb etməkdədir. Konfransda 30-dan çox MDB, Avropa ölkələrindən nümayəndələrin iştirak etdiyini diqqətə çatdıran akademik bildirib ki, bu beynəlxalq tədbir vasitəsilə gənc alimlərimiz xarici həmkarları ilə birgə fənlərarası elmlərin qovşağında əldə etdikləri elmi nəticələri birgə müzakirə etmək imkanı qazanacaqlar.
Azərbaycan gəncliyinin potensialından yüksək səviyyədə istifadə olunmasının vacibliyini xüsusilə qeyd edən A.Əlizadə bu sahədə ölkəmizdə və akademiyada görülən işlərdən ətraflı söz açıb. Diqqətə çatdırılıb ki, AMEA-da prioritet istiqamətlərdən biri gənc alimlərimizin inkişafını təmin etməkdir.
Akif Əlizadə dövlətimizin başçısı İlham Əliyevin müvafiq Sərəncamlarına əsasən Azərbaycan Respublikasının Prezidenti yanında Elmin İnkişafı Fondunun və ARDNŞ-in Elm Fondunun yaradılmasını gənc alim və mütəxəssislərimizin elmi intellektual səviyyəsinin inkişafı baxımından mühüm əhəmiyyət kəsb etdiyini bildirib.
Nəzərə çatdırılıb ki, “Azərbaycan 2020: gələcəyə baxış” İnkişaf Konsepsiyasında intellektual sərvətin qorunması işində gəncliyin üzərinə böyük vəzifələr qoyulur. Bu vəzifələrin həyata keçirilməsi gənclərin innovativ fəallığının yüksəldilməsini tələb edir.
Tədbirdə Milli Məclisin deputatı, akademik Abel Məhərrəmov, AMEA-nın Gənc Alim və Mütəxəssislər Şurasının sədri Famin Salmanov, Rusiya və Türkiyə Elmlər akademiyalarının gənc alimlər şuralarının sədrləri Andrey Kotelnikov, Yusif Baran çıxış edərək gənc alim və mütəxəssislərin elmi intellektual səviyyələrinin inkişafında beynəlxalq tədbirin əhəmiyyətindən, çox aktual mövzu seçimindən söhbət açıb, konfransın işinə uğurlar arzulayıblar.
Natiqlər tədbirin yüksək səviyyədə təşkilinə görə minnətdarlıqlarını bildiriblər.
Oktyabrın 16-dək davam edəcək konfrans çərçivəsində texnika, Yer və kimya elmləri üzrə multidissiplinar xarakterli 10 elmi istiqaməti özündə birləşdirən 4 sessiyada 300-ə yaxın məruzə dinləniləcək.
Tədbirdə Rusiya, Türkiyə, Rumıniya, ABŞ, Böyük Britaniya, Polşa, Pakistan, Misir, İran, Gürcüstan və başqa ölkələrdən nümayəndə iştirak edir.

Paylaş:

Baxılıb: 2158 dəfə