UNEC ilə Dövlət Gömrük Komitəsi arasında anlaşma memorandumu imzalanıb

Bakı:

31 °C

45 %

13 m/s

Əlaqə

AZ RU EN

Ana səhifə / Elm / UNEC ilə Dövlət Gömrük Komitəsi arasında anlaşma memorandumu imzalanıb

UNEC ilə Dövlət Gömrük Komitəsi arasında anlaşma memorandumu imzalanıb

28.01.2017 [10:47]

Yanvarın 27-də Azərbaycan Dövlət İqtisad Universitetində (UNEC) bu ali məktəbin və Azərbaycan Dövlət Gömrük Komitəsinin (DGK) birgə təşkilatçılığı ilə “İqtisadiyyatda təhlükəsizlik: ticarətin asanlaşdırılması və mühafizəsi aspektləri” mövzusunda elmi-praktik konfrans işə başlayıb. Beynəlxalq tədbir DGK-nın 25 illiyinə həsr olunub.
Konfrans çərçivəsində DGK ilə UNEC arasında elmin inkişafı və kadr potensialının gücləndirilməsi sahəsində anlaşma memorandumu imzalanıb.
AZƏRTAC xəbər verir ki, konfransın açılış mərasimində DGK-nın sədri Aydın Əliyev Azərbaycan gömrük xidmətinin yaranmasında Ümummilli lider Heydər Əliyevin böyük rolunun olduğunu xatırladıb. O, Dövlət Gömrük Komitəsinin Akademiyasının uğurla fəaliyyəti göstərdiyini və yüksək ixtisaslı kadrların hazırlanmasında mühüm rolunu qeyd edib.
DGK-nın Dünya Gömrük Təşkilatı (DGT) ilə sıx əməkdaşlıq etdiyini diqqətə çatdıran A.Əliyev vurğulayıb ki, Azərbaycanda Dünya Gömrük Universitetləri Şəbəkəsinin (İNCU) nümayəndəliyinin olması DGT-nin ölkə gömrüyünə olan etibarının göstəricisidir.
Dünya Gömrük Təşkilatının baş katibi Kunio Mikuriya çıxışında bildirib ki, gömrük xidməti müasir innovativ idarəetməyə malik olmalıdır. O, rəqəmsal gömrüyə böyük önəm verildiyini söyləyib. K.Mikuriya qeyd edib ki, ticarətin sadələşdirilməsi və təhlükəsiz idarə olunması mühüm məsələyə çevrilib. Qeyri-qanuni ticarət leqallaşdırılmalıdır. Qeyri-qanuni ticarətə nəzarətin gücləndirilməsi mədəni irsin qorunmasına töhfə olacaq.
K.Mikuriya bildirib ki, bu gün Azərbaycan gömrüyü regionda liderdir. Azərbaycan gömrüyü hazırda potensial quruculuğa, texniki potensiala və müasir Kinoloji Mərkəzə malikdir.
Milli Məclis sədrinin birinci müavini Ziyafət Əsgərov qeyd edib ki, gömrük sistemində təhlükəsizlik hər bir dövlətin qarşısında duran ən önəmli məsələlərdəndir. İxrac-idxal əməliyyatlarının aparılmasında dövlət gömrük orqanlarının böyük rolu olduğunu deyən Z.Əsgərov bildirib ki, ölkə iqtisadiyyatının inkişafı gömrük xidmətinin səmərəli fəaliyyətindən asılıdır.
Sonra Milli Məclisin iqtisadi siyasət, sənaye və sahibkarlıq komitəsinin sədri, akademik Ziyad Səmədzadə və UNEC-in rektoru Ədalət Muradov ticarət təhlükəsizliyi ilə bağlı çıxış ediblər. Çıxışlarda iqtisadi tənzimlənmə məsələlərindən bəhs olunub, bu istiqamətdə beynəlxalq ticarətin əhəmiyyəti qeyd edilib.
Tədbirdə DGK ilə UNEC arasında elmin inkişafı və kadr potensialının gücləndirilməsi barədə anlaşma memorandumu imzalanıb.
Sənədi A.Əliyev və Ə.Muradov imzalayıblar.
İki gün davam edəcək konfransın paralel sessiyalarında iqtisadi mövzularda məruzələr dinləniləcək.

Paylaş:

Baxılıb: 1571 dəfə