Prezident İlham Əliyev Dənizkənarı Milli Parkda abadlıq və yenidənqurma işləri ilə tanış olub

Bakı:

30 °C

43 %

4 m/s

Əlaqə

AZ RU EN

Ana səhifə / Gündəm / Prezident İlham Əliyev Dənizkənarı Milli Parkda abadlıq və yenidənqurma işləri ilə tanış olub

Prezident İlham Əliyev Dənizkənarı Milli Parkda abadlıq və yenidənqurma işləri ilə tanış olub

26.06.2009 [12:14]

Azərbaycan Respublikasının Prezidenti İlham Əliyev dünən Dənizkənarı Milli Parka gələrək, burada həyata keçirilən abadlıq və yenidənqurma işləri ilə tanış olub.
1909-cu ildən Bakıda dənizkənarı bulvar kimi tanınan bu parkda 1970-ci illərdə xalqımızın ümummilli lideri Heydər Əliyevin rəhbərliyi ilə paytaxtda yaşıllaşdırma və abadlaşdırma tədbirləri vüsət alanda geniş quruculuq tədbirləri həyata keçirilib. Bakı şəhəri sakinlərinin, eləcə də paytaxtımıza gələn qonaqların ən çox sevdiyi istirahət guşələrindən biri olan dənizkənarı bulvara 1998-ci il dekabrın 29-da Ulu öndər Heydər Əliyevin Sərəncamı ilə Milli Park statusu verilib.
Azərbaycan Prezidenti İlham Əliyev dənizkənarı bulvarın xalqımızın tarixi, mədəniyyəti və ekoloji təhlükəsizliyi üçün əhəmiyyətini nəzərə alaraq 2008-ci il yanvarın 10-da Nazirlər Kabineti yanında Dənizkənarı Bulvar İdarəsinin yaradılması haqqında Fərman imzalayıb. Həmin Fərmana və Azərbaycan Prezidenti İlham Əliyevin Bakı şəhərində parkların və xiyabanların yenidən qurulması ilə bağlı tapşırıqlarına uyğun olaraq Dənizkənarı Milli Parkın da əsaslı şəkildə abadlaşdırılmasına başlanılıb. Dövlətimizin başçısı və xanımı Mehriban Əliyeva parkda həyata keçirilən abadlıq və yenidənqurma işlərinin gedişi ilə tanış olmaq üçün buraya gəliblər. Prezident İlham Əliyevə görülən işlərlə bağlı məlumat verilib. Qeyd olunub ki, 3 kilometr 700 metr uzunluğu olan Dənizkənarı Milli Parkın ərazisi həyata keçiriləcək yeni tədbirlər planından sonra 25 kilometrə qədər uzanacaq. Görülən abadlıq işlərindən sonra parkın yaşıllıq zolağının ərazisi də xeyli genişləndiriləcək. ötən dövr ərzində parkda yüksək standartlara uyğun şəkildə abadlıq işlərinin həyata keçirildiyi bildirilib.
Dövlətimizin başçısı və xanımı burada inşa edilən qoşa fəvvarələrə baxıblar, əhaliyə iaşə xidməti göstərəcək obyektlərlə maraqlanıblar, əsaslı təmir və yenidənqurma işlərindən sonra istifadəyə verilən “Mirvari” kafesi ilə tanış olublar. Prezident və xanımı kafenin təmirdən əvvəlki vəziyyətini əks etdirən fotoalboma baxıblar. Təmir və yenidənqurmadan sonra burada əhalinin istirahəti üçün hər cür şəraitin yaradıldığı qeyd edilib.
Azərbaycan Prezidenti və xanımı estakadada həyata keçirilən yenidənqurma işləri ilə də maraqlanıblar. Dənizkənarı Milli Park boyu sahilbərkitmə işləri ilə tanış olan dövlətimizin başçısı görülən işlərin yüksək keyfiyyətlə aparılması ilə bağlı müvafiq tapşırıq və tövsiyələrini verib.

Paylaş:

Baxılıb: 1395 dəfə