Polşa prezidentinin Azərbaycana rəsmi səfəri başa çatıb

Bakı:

25 °C

60 %

2 m/s

Əlaqə

AZ RU EN

Ana səhifə / Gündəm / Polşa prezidentinin Azərbaycana rəsmi səfəri başa çatıb

Polşa prezidentinin Azərbaycana rəsmi səfəri başa çatıb

04.07.2009 [12:07]

Polşa Prezidenti Lex Kaçinski Nazirlər Kabinetində və Milli Məclisdə olub
Azərbaycanda rəsmi səfərdə olan Polşa Prezidenti Lex Kaçinski dünən Fəxri Xiyabana gəlib. Ali qonaq xalqımızın ümummilli lideri, müstəqil müasir Azərbaycan dövlətinin memarı və qurucusu Heydər Əliyevin məzarı önünə əklil qoyub, xatirəsini ehtiramla anıb. Polşa dövlətinin başçısı görkəmli oftalmoloq alim, akademik Zərifə xanım Əliyevanın da məzarı üstünə tər gül dəstəsi qoyub. Prezident Lex Kaçinskiyə Fəxri Xiyabanın tarixi barədə məlumat verilib. Dünən, həmçinin, Polşa Respublikasının Prezidenti Lex Kaçinski Şəhidlər Xiyabanını ziyarət edib. Burada ali qonağın şərəfinə fəxri qarovul dəstəsi düzülüb. Prezident Lex Kaçinski Azərbaycanın azadlığı və suverenliyi uğrunda şəhid olmuş qəhrəman Vətən övladlarının xatirəsini yad edib, “Əbədi məşəl” abidəsi önünə əklil qoyub. Müdafiə Nazirliyinin əlahiddə nümunəvi orkestrinin ifasında Polşanın və Azərbaycanın dövlət himnləri səslənib. Ali qonağa Şəhidlər Xiyabanının tarixi və paytaxtımızda görülən abadlıq-quruculuq işləri barədə məlumat verilib. Prezident Lex Kaçinski Azərbaycan paytaxtının mənzərəsini seyr edib.

* * *

ölkəmizdə rəsmi səfərdə olan Polşa Prezidenti Lex Kaçinski dünən Azərbaycanın Baş naziri Artur Rasizadə ilə görüşüb. Baş nazir Polşa Prezidenti Lex Kaçinskinin Azərbaycana səfərini yüksək qiymətləndirib və bunu ölkələrimiz arasında münasibətlərin inkişafında irəliyə doğru addım kimi səciyyələndirib. Azərbaycan hökumətinin başçısı ali qonağa son zamanlar ölkəmizdə həyata keçirilən islahatlar barədə məlumat verib, siyasi və iqtisadi sabitlikdən danışıb.
Görüşdə, həmçinin, Cənubi Qafqaz regionunda vəziyyət, Ermənistan-Azərbaycan, Dağlıq Qarabağ münaqişəsi barədə fikir mübadiləsi aparılıb. Polşa Prezidenti hər səfərində Azərbaycanda həyata keçirilən irimiqyaslı layihələrin, müxtəlif sahələrdə yüksək dinamikanın şahidi olduğunu bildirib. “Bu, Azərbaycanın dünya birliyinə inteqrasiyası, iqtisadi sahədə əldə etdiyi uğurlarından irəli gəlir”, - deyən Lex Kaçinski ölkələrimiz arasında bütün sahələrdə münasibətlərin inkişafı üçün hər cür imkanların olduğunu və səfərlərin ikitərəfli əməkdaşlığa təkan verəcəyini xüsusi vurğulayıb.

* * *

ölkəmizdə səfərdə olan Polşa Respublikasının Prezidenti Lex Kaçinski dünən Milli Məclisə gəlib. Parlamentin binası önündə ali qonağı Milli Məclisin sədri Oqtay Əsədov, sədrin birinci müavini Ziyafət Əsgərov, müavin Bahar Muradova, Milli Məclis Aparatının rəhbəri Səfa Mirzəyev və digər rəsmi şəxslər qarşılayıblar. Polşa Prezidenti Milli Məclisin iclas zalına baxıb, parlamentin binasındakı Heydər Əliyev Xatirə zalında olub. Burada qonağa ümummilli liderin həyat və fəaliyyəti, xarici ölkə rəhbərlərinin, dövlət və hökumət üzvlərinin müxtəlif illərdə Azərbaycana səfərləri zamanı Heydər Əliyevlə görüşlərini əks etdirən fotoşəkillər, tarixi sənədlər, eləcə də Azərbaycan parlamentinin formalaşmasında və xarici ölkə parlamentləri ilə əlaqələrin qurulmasında Ulu öndərin xidmətləri barədə məlumat verilib. Sonra Milli Məclisin sədri Oqtay Əsədov ilə Polşa Prezidenti Lex Kaçınski arasında görüş olub.
Milli Məclisin sədri Oqtay Əsədov prezident Lex Kaçinskini Azərbaycan-Polşa arasında dostluq və əməkdaşlıq əlaqələrinin inkişafındakı xüsusi xidmətlərinə görə ölkəmizin ən ali mükafatı - “Heydər Əliyev” ordeni ilə təltif olunması münasibətilə təbrik edib. O.Əsədov ölkələrimiz arasında əlaqələrin qədim tarixindən danışıb, müstəqilliyimizi bərpa etdikdən sonra münasibətlərimizin yeni müstəvidə inkişaf etdiyini bildirib və bunu müsbət dəyərləndirib. Milli Məclisin sədri bildirib ki, münasibətlərimizin belə yüksək səviyyəyə çatmasında dövlətlərimizin başçılarının müstəsna xidmətləri var. Dövlət başçılarının qarşılıqlı səfərləri, keçirdikləri səmərəli görüşlər hər iki tərəfə fayda gətirib, əməkdaşlığın hərtərəfli inkişafı üçün möhkəm hüquqi baza da yaradıb.
Azərbaycanda olmaqdan məmnun qaldığını deyən prezident Lex Kaçinski bundan əvvəlki səfərlərini, görüşlərini xatırladıb. Polşa-Azərbaycan dostluğunun dərin kökləri olduğunu deyən ali qonaq, iki dost ölkə arasında əlaqələrin inkişafı üçün bundan sonra da əlindən gələni əsirgəməyəcəyini bildirib.
ölkəmizin Avropanın enerji təminatında mühüm rolunu vurğulayan Lex Kaçinski Azərbaycanın son illər əldə etdiyi uğurlardan da danışıb. O, deyib ki, Azərbaycanda əldə olunmuş bütün uğurlar ölkədə həyata keçirilən düzgün siyasətin nəticəsidir. Polşanın dövlət başçısı parlamentlərin rolundan danışaraq qanunverici orqanların əməkdaşlığını, xüsusilə də dostluq qruplarının fəaliyyətini yüksək dəyərləndirib, Azərbaycan parlamentinə gələcək fəaliyyətində uğurlar arzulayıb.

* * *

Dünən Polşa prezidenti Lex Kaçinskinin Azərbaycana rəsmi səfəri başa çatıb. Azərbaycanın və Polşanın dövlət bayraqları ilə bəzədilmiş Heydər Əliyev adına Beynəlxalq hava limanında ali qonağın şərəfinə fəxri qarovul dəstəsi düzülüb. Polşa dövlətinin başçısını və xanımını Azərbaycanın Baş nazirinin birinci müavini Yaqub Eyyubov və digər rəsmi şəxslər yola salıblar.

Paylaş:

Baxılıb: 1400 dəfə