Mirzoyan Azərbaycana təslim edilməlidir

Bakı:

20 °C

83 %

7 m/s

Əlaqə

AZ RU EN

Ana səhifə / Gündəm / Mirzoyan Azərbaycana təslim edilməlidir

Mirzoyan Azərbaycana təslim edilməlidir

13.11.2021 [17:40]

Arzu Nağıyev: Bu təxribat Azərbaycanın antiterror əməliyyatları keçirməsinə zəmin yaradır

Qarabağda mənfur erməni təxribatı səngimir. Belə ki, bu gün 07:12-də Xankəndi şəhərindən Xankəndi-Laçın şosse yolu ilə 48-MN-048 ER dövlət qeydiyyat nişanlı “Mercedes Benz” markalı avtomobillə Laçın şəhəri istiqamətində hərəkətdə olan Ermənistan Respublikasının vətəndaşı, 1975-ci il təvəllüdlü Norayr Mirzoyan və qeyriləri cinayətkar birlik halında “RQD-5” markalı əl qumbarası və digər odlu silah, partlayıcı maddələr əldə edib gəzdirməklə Azərbaycan ərazisində terror aktı törətmək, habelə qəsdən adam öldürmək məqsədilə idarə etdiyi avtomobildən düşüb Şuşa şəhərinin Daşaltı kəndinin yaxınlığında xidmət aparan Azərbaycan Silahlı Qüvvələrinin N saylı hərbi hissəsinin və Rusiya Federasiyasının sülhməramlı kontingentinin hərbi qulluqçularının həyatını təhlükəyə atmaqla əl qumbarasını onların istiqamətində atıb.

Məsələ ilə bağlı Baş Prokurorluq və Daxili İşlər Nazirliyinin yaydığı birgə açıqlamada qeyd edilib ki, təxribat nəticəsində müddətdən artıq həqiqi hərbi xidmət hərbi qulluqçusu, çavuş Hafiz Nəsibova və digərlərinə (üç nəfərə) müxtəlif dərəcəli bədən xəsarətləri yetirməklə milli düşmənçilik niyyətilə qəsdən öldürülmələrinə cəhd edib. Faktla bağlı Baş Prokuroruluq tərəfindən Cinayət Məcəlləsinin müvafiq maddələrinə əsasən cinayət işi başlanılıb. Cinayət işi Baş Prokurorluğun İstintaq idarəsinə həvalə edilib.

Erməni mətbuatı Norayr Mirzoyanın Ermənistana təhvil veriləcəyini yazıb. Bildirilir ki, Mirzoyan hazırda Rusiya sülhməramlı kontingentinin mərkəzi qərargahındadır və bir neçə saat sonra o, qarşı tərəfə təhvil veriləcək.

Baş verən təxribat hadisəsi ilə bağlı fikirlərini yeniazerbaycan.com-a bölüşən Milli Məclisin deputatı Arzu Nağıyev bildirib ki, bu kimi hadisələr bir sıra həqiqətləri növbəti dəfə üzə çıxarır. Millət vəkilinin fikrincə, sülhməramlı qüvvələr öz mandatlarına uyğun hərəkətlər etsələr, daha yaxşı olar. Son vaxtlar mənfur ermənipərəst Peqovun yenidən Qarabağda peyda olması, eyni zamanda son təxribatlar onu göstərir ki, sülhməramlı qüvvələr öz fəaliyyətlərinə ciddi yanaşmırlar: "Bu kontingent ərazidə təmir işləri aparmaqdansa, xiyaban salıb büst qoymaqdansa, bir sözlə, humanizm hesab etdiyi məsələlərin həllinə "can atmaqdansa", birbaşa məsuliyyət daşıdığı işə ciddi yanaşmalıdır. Bir neçə gün öncə 60 nəfərlik erməni birləşməsi ilə bağlı ortaya çıxan hadisə də məhz onların məsuliyyətsizliklərinin nəticəsi idi. Bütövlükdə isə, bunun hamısı erməni təxribatının misalıdır".

Millət vəkilinin fikrincə, sülhməramlı qüvvələrlə yanaşı, Rusiya-Türkiyə Monitorinq Mərkəzi də öz işini daha ciddi qurmalıdır. Baş verənlər bir daha onu göstərir ki, Azərbaycan regionda davamlı sülhün təmin olunması üçün sülh sazişinin imzalanmasını istəsə də, Ermənistanda bəzi qüvvələr hələ də revanşist ideyalardan əl çəkmirlər. "Ona görə də, Rusiya rəhbərliyi xüsusi olaraq bu kimi məsələlərdə ciddi mövqe ortaya qoymalıdır. Əks halda Azərbaycanın antiterror əməliyyatları keçirməsinə zəmin yaranır. Göründüyü kimi, bu tip təxribatlar iki dövlətin hansısa müqaviləni imzalaması ərəfəsində baş verir və birmənalı şəkildə sülhə qarşı yönəlib. Bunu superdövlətlər də, BMT-də, ATƏT-in Minsk qrupunun həmsədrləri də görür. Və təəssüf ki, hamısı da susmaqda davam edirlər", - deyən A.Nağıyev onu da əlavə edib ki, baş verən hadisə dəqiq araşdırılmalı, təxribatçı ilə bağlı müvafiq qərar verilməlidir. Bütün məsələlər tam dəqiqiliyi ilə incələndikdən sonra müvafiq nəticə çıxarılmalıdır. Millət vəkili bildirib ki, təxribatçı Mirzoyanın Ermənistana təhvil verilməsi tələskənlik sayıla bilər.

Pərviz Sadayoğlu

Paylaş:

Baxılıb: 1094 dəfə