Azərbaycanın birinci xanımı Mehriban Əliyeva Binə qəsəbə Mədəniyyət Mərkəzinin açılış mərasimində iştirak edib

Bakı:

29 °C

50 %

3 m/s

AZ RU EN

Ana səhifə / Gündəm / Azərbaycanın birinci xanımı Mehriban Əliyeva Binə qəsəbə Mədəniyyət Mərkəzinin açılış mərasimində iştirak edib

Azərbaycanın birinci xanımı Mehriban Əliyeva Binə qəsəbə Mədəniyyət Mərkəzinin açılış mərasimində iştirak edib

29.12.2010 [09:34]

Dünən Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyeva Xəzər rayonunun Binə qəsəbəsində Mədəniyyət Mərkəzinin açılış mərasimində iştirak edib. Heydər Əliyev Fondunun prezidentinə gül dəstələri təqdim edilib.
Mehriban xanım Əliyeva rəsmi açılışı bildirən qırmızı lenti kəsib.
Məlumat verilib ki, son illər ölkəmizdə mədəniyyətin inkişafı ilə bağlı mühüm tədbirlər görülür, mədəniyyət və incəsənət xadimlərinə dövlət səviyyəsində yüksək qayğı göstərilir. Bu baxımdan Heydər Əliyev Fondu və onun prezidenti Mehriban xanım Əliyevanın təşəbbüsü ilə həyata keçirilən layihələr mədəniyyətimizin inkişafı, onun dünyada təbliği, Azərbaycanın zəngin mədəni irsinin, musiqisinin qorunmasında mühüm rol oynayır.
Qeyd edilib ki, qarşıdan gələn bayramlar ərəfəsində Heydər Əliyev Fondu Binə qəsəbəsinin sakinlərinə daha bir gözəl hədiyyə bəxş edib. Mehriban xanım Əliyevaya ünvanlanan çoxsaylı müraciətlər nəzərə alınaraq Fondun layihəsi çərçivəsində Binə Mədəniyyət Mərkəzi əsaslı surətdə yenidən qurulub və bu gün istifadəyə verilir.
Foyedə qurulan stenddə Ulu öndər Heydər Əliyevin, Prezident İlham Əliyevin və Azərbaycanın birinci xanımı Mehriban Əliyevanın mədəniyyətimizin inkişafına diqqət və qayğısını əks etdirən fotolar yer alıb. Mehriban xanım Əliyeva Binə Mədəniyyət Mərkəzinin əvvəlki və indiki vəziyyətini əks etdirən fotostendə baxıb.
Bildirilib ki, əvvəlki bina ötən əsrin 50-ci illərində tikilib və mədəniyyət klubu kimi fəaliyyət göstərib. Mərkəzdə yenidənqurma işlərinə 2007-ci ildə başlanılıb. İkimərtəbəli binada yerləşən mərkəz 2 min 425 kvadratmetr sahəni əhatə edir.
Bildirilib ki, mərkəzin birinci mərtəbəsində müxtəlif dərnəklər fəaliyyət göstərir. Burada şahmat və rəsm dərnəkləri üçün bütün şərait yaradılıb. Rəsm otağında şagirdlərin əl işləri nümayiş olunur. Burada 14 minə yaxın kitabın saxlanıldığı ədəbiyyat fondu da yaradılıb. Dərnəklərdə məşğələlər keçən uşaqlar beynəlxalq yarışlarda da iştirak ediblər.
Bildirilib ki, qəsəbədə yeni musiqi məktəbinə ehtiyac olduğu nəzərə alınaraq, mərkəzdə musiqi məktəbinin fəaliyyətinə şərait yaradılıb. Binanın ikinci mərtəbəsində yerləşən 24 nömrəli uşaq musiqi məktəbi ilə tanışlıq zamanı Heydər Əliyev Fondunun prezidentinə məlumat verilib ki, burada 20 sinif, müəllimlər otağı və digər inzibati otaqlar var. On ildən çoxdur ki, fəaliyyət göstərən musiqi məktəbində fortepiano, xalq çalğı alətləri, simli və nəfəs alətləri, nəzəriyyə şöbələri var. Burada 300-ə yaxın uşaq musiqi təhsili alır. Uşaqlara skripka, klarnet, saz, fortepiano, tar, kamança, qarmon, balaban, nağara alətlərində ifa etmək öyrədilir, xanəndəlik dərsləri keçirilir. Gələcəkdə mərkəzdə, həmçinin xalçaçılıq, rəqs və digər dərnəklərin də fəaliyyət göstərməsi nəzərdə tutulub.
Mehriban xanım Əliyeva mərkəzin tikiş otağına, bufetinə, oxu zalına, eləcə də, musiqidə fərqlənən uşaqların diplomlarına baxıb.
Heydər Əliyev Fondunun prezidenti binada müasir avadanlıqla təchiz edilmiş 156 yerlik tamaşa zalı ilə tanış olub.
Bildirilib ki, mərkəzin qazanxanası, transformator stansiyası var. Həyətyanı sahədə abadlıq işləri aparılıb, yaşıllıq salınıb.
Mehriban xanım Əliyeva mərkəzin işinə uğurlar arzulayıb.

Paylaş:

Baxılıb: 1118 dəfə