Birinci Avropa Oyunlarının məşəlinin növbəti ünvanı Biləsuvar olub

Bakı:

26 °C

69 %

10 m/s

Əlaqə

AZ RU EN

Ana səhifə / İdman / Birinci Avropa Oyunlarının məşəlinin növbəti ünvanı Biləsuvar olub

Birinci Avropa Oyunlarının məşəlinin növbəti ünvanı Biləsuvar olub

05.05.2015 [10:28]

“Bakı-2015” ilk Avropa Oyunlarının məşəli mayın 3-də Biləsuvara gətirilib.
AZƏRTAC xəbər verir ki, əllərində dövlət bayrağımızı, birinci Avropa Oyunlarının atributlarını əks etdirən plakatlar tutan sakinlər məşəl yürüşünün iştirakçılarını qarşılamaq üçün şəhərin küçə və meydanlarına toplaşıblar.
Əvvəlcə Biləsuvar şəhərinin giriş qapısında məşəlin qarşılanma mərasimi olub. Avropa Oyunlarının rəmzi qapısında rayonun fəal gənclərindən olan Səbinə Hüseynova məşəli qəbul edib.
Sonra 10 məşəlçi Oyunların rəmzi qapısından 4 kilometr məsafədə yürüşə başladı. Məşəli növbə ilə bir-birinə ötürən idmançılar rayon sakinlərinin alqışları altında Nizami Gəncəvi, Tofiq İsmayılov, Mübariz İbrahimov və Səməd Vurğun küçələrindən keçərək şəhərin mərkəzi meydanına gəliblər. Meydana toplaşanlar birinci Avropa Oyunlarının məşəl estafetini qəbul edən idmançıları sürəkli alqışlarla qarşılayıblar.
Kikboksinq üzrə dünya çempionu, peşəkarlar arasında Avropa kəmərinin sahibi, Azərbaycan Kikboksinq Federasiyasının baş məşqçisi Ehtiram Məcidov məşəli Heydər Əliyev meydanında qurulmuş səhnəyə qaldırıb. Burada məşəli alovlandıran E.Məcidov birinci Avropa Oyunlarının çırağını yandıraraq sərbəst güləş üzrə respublika çempionu İqbal Aslanova təqdim edib. İ.Aslanov çırağı yarışlar başa çatana qədər rayonda saxlanılmaq üçün Heydər Əliyev Mərkəzinə təhvil verib.
Mərasimdə aprelin 26-da Azərbaycan Prezidenti İlham Əliyevin, birinci xanım, ilk Avropa Oyunları Təşkilat Komitəsinin sədri Mehriban Əliyevanın, Avropa Olimpiya Komitəsinin prezidenti Patrik Hikkinin iştirakı ilə Atəşgah məbədində birinci Avropa Oyunları məşəlinin alovlandırılması mərasiminin əks olunduğu videoçarx nümayiş etdirilib.
Respublikanın tanınmış incəsənət ustalarının iştirakı ilə maraqlı konsert proqramı mərasimi daha da rövnəqləndirib.
Heydər Əliyev Mərkəzinin direktoru Gülmalı Gülalıyev bu əlamətdar hadisə münasibətilə təəssüratlarını AZƏRTAC-ın müxbiri ilə bölüşərək deyib: “Birinci Avropa Oyunlarının Azərbaycanda keçirilməsi ölkəmizin beynəlxalq aləmdə böyük nüfuza malik olduğunun daha bir göstəricisidir. Biz respublikamızın bu böyük uğuruna sevinir, hədsiz qürur hissi keçiririk. Bu əlamətdar hadisə Azərbaycanın tarixinə parlaq səhifə kimi həkk olunacaq”.
Rayon sakini Nadir İlyasov isə birinci Avropa Oyunlarının məşəlinin qarşılanmasından duyduğu sevinci belə ifadə edib: “Bu gün çox böyük qürur hissi keçiririk. Azərbaycan ilk Avropa Oyunlarına ev sahibliyi edəcək. Oyunların məşəlinin Biləsuvarda da şölələnməsi isə bu sevincimizi ikiqat artırır”.
Birinci Avropa Oyunlarının məşəli Biləsuvardan Cəlilabada yola salınıb.

Paylaş:

Baxılıb: 1127 dəfə