AZƏRTAC “Bakı Şəhər Halqası” Əməliyyat Şirkətinin rəsmi media tərəfdaşı olub

Bakı:

29 °C

57 %

3 m/s

Əlaqə

AZ RU EN

Ana səhifə / İdman / AZƏRTAC “Bakı Şəhər Halqası” Əməliyyat Şirkətinin rəsmi media tərəfdaşı olub

AZƏRTAC “Bakı Şəhər Halqası” Əməliyyat Şirkətinin rəsmi media tərəfdaşı olub

25.05.2016 [10:18]

Nazir Azad Rəhimov: İnanırıq ki, həm Avropa Qran-prisinin işıqlandırılmasında, həm də Azərbaycanın bütün dünyada daha geniş səviyyədə tanıdılmasında AZƏRTAC ilə əməkdaşlığın əvəzsiz rolu olacaq
Mayın 24-də Azərbaycan Dövlət İnformasiya Agentliyi (AZƏRTAC) ilə “Formula-1” Avropa Qran-pri yarışının təşkilatçısı “Bakı Şəhər Halqası” Əməliyyat Şirkəti (BŞH) arasında rəsmi tərəfdaşlıq haqqında saziş imzalanıb.
Sazişi Azərbaycanın gənclər və idman naziri və BŞH-nın sədri Azad Rəhimov və AZƏRTAC-ın baş direktoru Aslan Aslanov imzalayıblar.
Sazişin imzalanması mərasimində qeyd olunub ki, AZƏRTAC “Formula-1” Avropa Qran-prisinə hazırlıq barədə mütəmadi xəbərlər yayır. İyunun 17-19-da keçiriləcək bu yarışın yüksək səviyyədə işıqlandırılmasına təcrübəli müxbir və fotomüxbirlər cəlb edilib. Agentliyin bu mötəbər yarışla bağlı xəbərləri 7 dildə təqdim olunur, fotoları bütün dünyada yayılır. AZƏRTAC-ın saytında bu gündən etibarən “Formula-1” bölməsi yaradılacaq, Qran-pri barədə bütün xəbərlər, foto və videomateriallar burada yerləşdiriləcək.
Rəsmi media tərəfdaşlığına dair fikirlərini bölüşən gənclər və idman naziri Azad Rəhimov deyib: “Biz çox şadıq ki, bir əsrə yaxın tarixi olan Azərbaycan Dövlət İnformasiya Agentliyi ilə ölkəmizdə ilk dəfə keçiriləcək “Formula-1” Avropa Qran-prisi haqqında geniş miqyasda məlumatlılığın artırılması sahəsində əməkdaşlıq edirik. Əldə olunan razılığa əsasən, AZƏRTAC ölkə daxilində və xaricdə malik olduğu bütün imkanları səfərbər edərək Bakıda keçiriləcək “Formula-1” yarışı barədə xəbərləri bütün dünyada yayacaq. Xüsusilə qeyd etmək istərdim ki, biz bu il Bakıda sadəcə möhtəşəm yarış keçirməyəcəyik, həmçinin bu yarış vasitəsilə paytaxtımızı və ümumilikdə milli mədəniyyətimizi dünya ictimaiyyətinə təbliğ edəcəyik. Bu şərəfli işdə bizə dəstəyini göstərəcək AZƏRTAC-ın rəhbərliyinə və onun bütün kollektivinə öz təşəkkürümüzü bildiririk. İnanırıq ki, həm Avropa Qran-prisinin işıqlandırılmasında, həm də Azərbaycanın bütün dünyada daha geniş səviyyədə tanıdılmasında bu əməkdaşlığın əvəzsiz rolu olacaq”.
Tərəfdaşlıq sazişinin əhəmiyyətindən danışan AZƏRTAC-ın baş direktoru Aslan Aslanov deyib: “Dünya informasiya məkanında özünəməxsus yer tutan, mötəbər beynəlxalq media qurumlarında fəal təmsil olunan agentliyimizin həyatında bu gün daha bir əlamətdar hadisə baş verir. Kollektivimiz AZƏRTAC-ın Azərbaycanda keçiriləcək mötəbər idman yarışını geniş təbliğ etməsi üçün “Bakı Şəhər Halqası” Əməliyyat Şirkəti ilə rəsmi media tərəfdaşlığına dair sazişin imzalanmasından məmnunluq duyur”.
AZƏRTAC-ın mötəbər idman yarışlarının yüksək səviyyədə işıqlandırılması sahəsində zəngin təcrübəsinin və kifayət qədər peşəkar əməkdaşlarının olduğunu bildirən baş direktor vurğulayıb: “Ötən il agentliyimiz dünya idman tarixində ilk dəfə keçirilən və rəsmi media tərəfdaşı olduğu birinci Avropa Oyunlarının istər ölkə daxilində, istərsə də dünyada yüksək səviyyədə işıqlandırılmasını təmin edib. AZƏRTAC təmsil olunduğu dünyanın ən böyük informasiya alyansları, eləcə də əməkdaşlıq etdiyi 130-dan çox ölkənin xəbər agentlikləri vasitəsilə Bakıda keçiriləcək “Formula-1” Avropa Qran-prisinin də fəal təbliğini aparır. Avropa Qran-prisinin informasiya təminatı üçün bütün potensialını səfərbər edən AZƏRTAC üzərinə düşən məsul missiyanın öhdəsindən layiqincə gəlməyə, bu möhtəşəm idman yarışının təkcə Azərbaycanda deyil, bütün dünyada təbliğinə töhfəsini verməyə çalışacaq”.
Tədbirin sonunda KİV nümayəndələrinin sualları cavablandırılıb.
Sazişə əsasən, AZƏRTAC “Bakı Şəhər Halqası” Əməliyyat Şirkətinin tədbirlərinin işıqlandırılmasında üstünlüyə malik olacaq və eyni zamanda, yarışın əhəmiyyətini göstərmək üçün Beynəlxalq Avtomobil Federasiyasının “Formula-1” üzrə dünya çempionatında iştirak edən komandalar və sürücülər ilə bağlı həftəlik materiallar yayımlayacaq.
Sazişin imzalanması mərasimində Dünya Xəbər Agentlikləri Konqresi Şurasının iclasında iştirak etmək üçün Bakıya gələn Bolqarıstanın BTA agentliyinin baş direktoru Maksim Minçev və Rusiyanın TASS agentliyi baş direktorunun birinci müavini Mixail Qusman iştirak ediblər.

Paylaş:

Baxılıb: 1178 dəfə