Azərbaycan dünyada yüksək rəqabətədavamlı iqtisadiyyatı olan ölkələr sırasındadır

Bakı:

18 °C

88 %

4 m/s

Əlaqə

AZ RU EN

Ana səhifə / İqtisadiyyat / Azərbaycan dünyada yüksək rəqabətədavamlı iqtisadiyyatı olan ölkələr sırasındadır

Azərbaycan dünyada yüksək rəqabətədavamlı iqtisadiyyatı olan ölkələr sırasındadır

06.09.2013 [09:27]

Dünya İqtisadi Forumunun 2013-2014-cü il üzrə “Dünya Rəqabətlilik Hesabatı”nda ölkəmiz qlobal rəqabət qabiliyyətlilik indeksinə görə 39-cu pilləyə yüksəlib
Bildiyimiz kimi, Azərbaycan Dünya İqtisadi Forumunun 2013-2014-cü il üzrə “Dünya Rəqabətlilik Hesabatı”nda qlobal rəqabət qabiliyyətlilik indeksinə görə 7 pillə irəliləyib və 148 dövlət arasında 39-cu yerdə qərarlaşıb. 2012-2013 hesabatında isə ölkəmiz 144 ölkə arasında 46-cı, 2011-2012 hesabatında isə 142 ölkə arasında 55-ci yeri tutmuşdu. Hesabata görə, Azərbaycan makroiqtisadi mühit göstəricisinə görə 8-ci, əmək bazarının səmərəliliyi göstəricilərinə görə 30-cu, texnoloji hazırlıq səviyyəsinə görə 50-ci, innovasiyalara görə isə 51-ci yerdə qərar tutub. Azərbaycan bu göstəricilərlə, hətta bir çox Avropa Birliyi ölkələrini də geridə qoymağa nail olub.
Qlobal iqtisadiyyatın böhran dövrünü yaşadığı və yüksək rəqabət mühiti ilə səciyyələnən bir vaxtda Azərbaycanın 7 pillə irəliləməsi və dünyanın artıq 40 ən rəqabətqabiliyyətli iqtisadiyyatı sırasına daxil olması ölkədə aparılan məqsədyönlü sosial-iqtisadi inkişaf siyasətinin əyani göstəricisi və ölkəmizin beynəlxalq nüfuzunun artmasının nümunəsi kimi qiymətləndirilə bilər. Azərbaycanın son 10 ildə əldə etdiyi möhtəşəm uğurlar dünya birliyi, aparıcı beynəlxalq iqtisadi və maliyyə qurumları tərəfindən etiraf olunur və yüksək qiymətləndirilir.
Bu uğurlar, ilk növbədə, respublikamızda həyata keçirilən inkişaf siyasəti sayəsində Azərbaycanın mütəmadi səciyyə daşıyan dinamik iqtisadi inkişafı ilə bağlıdır. Belə ki, Azərbaycanın dinamik, müstəqil iqtisadi inkişaf strategiyası rasional səciyyə daşıyır. Azərbaycan iqtisadiyyatının möhkəm təməllər üzərində inkişafı dünyanı maliyyə böhranı bürüdüyü, bir çox aparıcı dövlətlərin iqtisadiyyatının ciddi təsir gördüyü bir vaxtda özünü daha aydın göstərdi. Təsadüfi deyil ki, böhranın zirvədə olduğu dövrdə, yəni 2009-cu ildə dövlət başçısı İlham Əliyev Azərbaycan iqtisadiyyatının keçid dövrünü başa vurduğunu bildirdi. Bu, balanslı şəkildə fəaliyyət göstərən Azərbaycan iqtisadiyyatının sınaqdan uğurla çıxmasından xəbər verirdi.
Azərbaycanın balanslı iqtisadi inkişafının əsasında regionların sosial-iqtisadi inkişafı proqramları dayanır. “Azərbaycan Respublikası regionlarının sosial-iqtisadi inkişafı (2004-2008-ci illər) Dövlət Proqramı” və “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın icrası respublikanın bütün regionlarının balanslı inkişafına şərait yaradıb. Elə dövlət proqramlarının əsas məqsədləri də ölkədə qeyri-neft sektorunun inkişafının sürətləndirilməsinə, iqtisadiyyatın diversifikasiyasına, tarazlı regional və davamlı sosial-iqtisadi inkişafa, əhalinin həyat səviyyəsinin daha da yaxşılaşdırılmasına nail olunması kimi müəyyənləşdirilib. Sosial-iqtisadi inkişaf proqramları çərçivəsində respublikanın bütün bölgələrində infrastruktur yenidən qurulmuş, yol və körpülər salınıb, məktəblər, tibb müəssisələri və digər sosial obyektlər tikilərək istifadəyə verilib.
Ölkəmizdə aparılan uğurlu, məqsədyönlü siyasət nəticəsində ildən-ilə daha yüksək inkişaf göstəriciləri nümayiş etdirən iqtisadiyyatın formalaşdırılması ölkədə işgüzar fəallığın daha da yüksəldilməsinə, yoxsulluğun azaldılmasına əlverişli şərait yaradıb, əhalinin etibarlı sosial müdafiəsini təmin edib. Ötən illərdə dünyada baş verən qlobal böhran fonunda Azərbaycan iqtisadiyyatının davamlı inkişafı, bütün sosial proqramların tam həcmdə və vaxtında yerinə yetirilməsi əsası xalqımızın Ümummilli lideri Heydər Əliyev tərəfindən qoyulmuş milli iqtisadi inkişaf modelinin möhkəm təməllər üzərində qurulmasının əyani göstəricisidir. Təbii ki, dünya iqtisadi sisteminə fəal inteqrasiya yolu seçən Azərbaycanın qazandığı nailiyyətləri şərtləndirən mühüm faktorlardan biri də qloballaşma prosesindən irəli gələn meyarların ölkə reallıqları ilə məharətlə uzlaşdırılması, onların milli maraqları təmin edən uğurlu vəhdətinin yaradılması olub.
Hazırda makroiqtisadi sabitliyin qorunub saxlanması, enerji, ərzaq və ekoloji təhlükəsizliyin təmin olunması, iqtisadiyyatının diversifikasiyası, bütün sahələrdə ardıcıl inkişaf strategiyası uğurla həyata keçirilməkdədir. Ölkənin qeyri-neft sektorunda müşahidə olunan dinamizmi də iqtisadiyyatın diversifikasiyası ilə bağlı həyata keçirilən siyasətin mühüm nəticəsi hesab etmək olar. Xüsusilə, Azərbaycan zəngin neft resurslarının satışından daxil olan valyuta ehtiyatlarını səmərəli şəkildə xərcləməklə, iqtisadiyyatın bütün sektorlarının dinamik inkişafı üçün əlverişli baza yaratmağa nail olub və hazırda qeyri-neft (turizm, sənayeləşmə, İKT və s.) sektoru valyuta gətirə biləcək strateji bölməyə çevrilib.
Bütövlükdə, 2003-cü ildən etibarən Azərbaycanda liberal iqtisadi sistemin qurulması, sahibkarlığın inkişafına geniş şəraitin yaradılması, zəngin təbii sərvətlərdən və regionların potensialından səmərəli istifadə, qeyri-neft sektorunun inkişafı, investisiya mühitinin daha da yaxşılaşdırılması, yerli məhsulların rəqabət qabiliyyətinin yüksəldilməsi istiqamətində görülən tədbirlər ölkə iqtisadiyyatının yüksələn xətlə inkişafını təmin edib. Ümumi daxili məhsul (ÜDM) istehsalının strukturuna diqqət yetirdikdə, bütün iqtisadi sahələrdə artım meyillərinin nəzərə çarpdığını görmək mümkündür. Proqnozlara görə, 2020-ci ilədək ÜDM-in 2 dəfə artırılmasına yalnız qeyri-neft sektorunun inkişafı sayəsində nail olunacaq.
Qeyd etmək lazımdır ki, bütün bu göstəricilər beynəlxalq təşkilatların, dünya mətbuatının, xarici dövlətlərin marağına səbəb olur və haqlı rəğbətlə qarşılanır. Dünyanın aparıcı iqtisadi və maliyyə qurumları hazırda Azərbaycanın uğurlarını qeyd edir. Bütün hesabatlarda ölkəmiz öncül mövqelərdə dayanır. Ötən il dünyanın aparıcı “Fitch”, “Moody’s” və “Standard & Poor’s” reytinq agentlikləri əksər inkişaf etmiş ölkələrin kredit reytinqini aşağı saldıqları halda, respublikamızın reytinqini artırıblar. Azərbaycan BMT-nin İnkişaf Proqramının insan inkişafı ilə bağlı hesabatına əsasən “yüksək insan inkişafı” ölkələri qrupuna yüksəlib. Bu il Davos İqtisadi Forumunun Azərbaycanda keçirilməsi isə ölkəmizin iqtisadi nailiyyətlərinin dünya birliyi tərəfindən təsdiq edilməsi deməkdir.
H.MƏMMƏDLİ

Paylaş:

Baxılıb: 1625 dəfə