Bakıda III Vergi Forumu işə başlayıb

Bakı:

26 °C

53 %

5 m/s

Əlaqə

AZ RU EN

Ana səhifə / İqtisadiyyat / Bakıda III Vergi Forumu işə başlayıb

Bakıda III Vergi Forumu işə başlayıb

07.02.2014 [09:13]

“Azərbaycanın vergi sistemi: reallıqlar və perspektivlər” mövzusunda keçirilən tədbirə bir sıra beynəlxalq qurumların təmsilçiləri də qatılıb
Fevralın 6-da Bakıda “Azərbaycanın vergi sistemi: reallıqlar və perspektivlər” mövzusunda 2 günlük Vergi Forumu öz işinə başlayıb. Forumun “Vergi inzibatçılığında partnyorluq münasibətləri” və “Müasir vergi inzibatçılığında bilik menecmentinin və texnologiyaların rolu” adlı sessiyalarında dövlət orqanlarının, Avropa İttifaqının, Dünya Bankının, Beynəlxalq Maliyyə Korporasiyasının, Niderland Krallığının, Türkiyə, Gürcüstan və Qazaxıstanın vergi qurumlarının, bankların, qeyri-hökumət təşkilatlarının, sahibkarların ictimai birliklərinin təmsilçiləri, iş adamları və KİV nümayəndələri iştirak ediblər.
Vergilər nazirinin müşaviri Akif Musayevin, Türkiyə Gəlirlər Administrasiyası rəhbərinin müavini Mehmet Atuğun və “Caspian European Club”un baş icraçı direktoru Telman Əliyevin moderatorluğu ilə keçirilən “Vergi inzibatçılığında partnyorluq münasibətləri” adlı birinci sessiyada ilk olaraq Vergilər Nazirliyinin İqtisadi təhlil və sahibkarlıq subyektlərinin dövlət qeydiyyatı Baş İdarəsinin rəisi İlkin Vəliyev “Risklərin idarə edilməsı və partnyorluq mövzusunda çıxış edib. İdarə rəisi bildirib ki, Azərbaycanda vergidən yayınma risklərinin qiymətləndirilməsinə başlanılıb. Onun sözlərinə görə, vergi ödəyiciləri ödədiyi ümumi verginin fəaliyyət göstərdiyi bölgə və fəaliyyət növünə görə müəyyən edilmiş orta statistik vergi məbləğinin nisbətinə görə 11 risk qrupuna bölünür. Bu risklər 0-5 ballıq sistemlə qiymətləndirilir və bu risk dərəcəsinə əsasən, vergi ödəyicisi ilə partnyorluq sazişi imzalanmasına baxılacaq: “Gələcəkdə vergi ödəyicilərinin də özlərinin bu risk dərəcələrini müəyyənləşdirmək imkanı olacaq. Bunun üçün Vergilər Nazirliyinin saytında şərait yaradılacaq”.
İ.Vəliyev onu da deyib ki, Vergilər Nazirliyi bu günədək 613 vergiödəyici ilə tərəfdaşlıq sazişi imzalayıb.
“Bələdiyyələrin avtomatlaşdırılmış vergi informasiya sisteminin yaradılması” mövzusunda çıxış edən Vergilər Nazirliyinin Vergi siyasəti və strateji araşdırmalar Baş İdarəsinin rəisi Natiq Şirinov isə deyib ki, Azərbaycanda bələdiyyələrin avtomatlaşdırılmış vergi informasiya sistemi yaradılır. Yeni sistem bələdiyyə vergilərinin tam yığılmasına və dəqiq uçotun aparılmasına imkan verəcək: “Bələdiyyələrin AVİS sistemində onlayn kargüzarlıq, vergilərin elektron qaydada ödənilməsi, bəyannamələrin elektron qaydada təqdimatı imkanları yaradılıb”.
Onun sözlərinə görə, bu sistemlə bələdiyyələr qarşısında potensial vergi öhdəliyi olan fiziki və hüquqi şəxslər öz əmlaklarını qeydiyyatdan keçirə, onlar üçün qeydiyyat şəhadətnaməsi ala biləcəklər.
“Vergilərin məcburi yığılmasından könüllü ödənilməsinə keçid: problemlər, perspektivlər” mövzusunda çıxış edən vergilər nazirinin müşaviri Ələkbər Məmmədov bildirib ki, Vergilər Nazirliyi 2015-ci ilədək könüllü vergi ödənişi səviyyəsinin 82-85 faizədək artırılmasını hədəfləyib. Onun sözlərinə görə, 2010-cu ildə vergi ödəyicilərinin 3 faizi vergidən yayınıb, 27 faizi qismən yayınıb, vergi ödəyicilərinin 70 faizi könüllü ödəniş edib.
Müşavir könüllü vergi ödənişinin artımına əngəl törədən problemlər arasında əhalinin vergilərə dair normativ-hüquqi aktlar və bu sahədə informasiya texnologiyalarının imkanları haqqında biliklərinin məhdud olmasını vurğulayıb: “Əhali arasında vergi mədəniyyətinin tam formalaşdırılmasına vergi sisteminin formal xarakter daşıdığı keçmiş sovet düşüncəsi mane olur”.
O qeyd edib ki, nazirlik bu problemləri həll etmək məqsədi ilə əhalinin maarifləndirilməsi üzrə işləri davam etdirmək və “Onlayn-müəllim” xidmətini işə salmaq niyyətindədir.
Daha sonra digər mövzularda da məruzələr dinlənilib.
Eyni zamanda, vergilər nazirinin müşaviri Asəf Əsədovun, Beynəlxalq Maliyyə Korporasiyasının vergilər üzrə regional koordinatoru Maykl Engelşalkın və Azərbaycanda Amerika-Ticarət Palatasının icraçı direktoru Nərgiz Nəsrullayeva-Müdüroğlunun moderatorluğu ilə keçirilən “Müasir vergi inzibatçılığında bilik menecmentinin və texnologiyaların rolu” adlı ikinci sessiyada xarici və yerli ekspertlərin məruzələri dinlənilib.
Sessiyalarda müzakirə olunan məsələlər ətrafında geniş diskussiyalar aparılıb, forum iştirakçıları vergi qanunvericiliyi və vergi inzibatçılığının təkmilləşdirilməsi ilə bağlı müxtəlif təkliflərlə çıxış ediblər.
“Azərbaycanın vergi sistemi: reallıqlar və perspektivlər” mövzusunda III Vergi Forumu bu gün öz işini plenar iclasla davam etdirəcək.
Nadir AZƏRİ