Bakı şəhərinin müasirləşdirilməsi istiqamətində mühüm layihələr həyata keçirilir

Bakı:

21 °C

83 %

3 m/s

Əlaqə

AZ RU EN

Ana səhifə / İqtisadiyyat / Bakı şəhərinin müasirləşdirilməsi istiqamətində mühüm layihələr həyata keçirilir

Bakı şəhərinin müasirləşdirilməsi istiqamətində mühüm layihələr həyata keçirilir

18.03.2014 [08:57]

Paytaxtın “Sovetski” adlanan ərazisində nəzərdə tutulan yenidənqurma və abadlıq işləri şəhərimizin müasir görkəminə əlavə gözəllik qatacaq
Məlum olduğu kimi, son illər Bakı şəhərinin müasirləşdirilməsi, şəhər sakinlərinin həyat şəraitinin yaxşılaşdırılması istiqamətində mühüm işlər görülür. “Ağ şəhər” layihəsi, Dənizkənarı Milli Parkın genişləndirilməsi, şəhər infrastrukturunun tamamilə yenilənməsi, nəqliyyat sisteminin inkişafı və digər mühüm tədbirlərin həyata keçirilməsi bu işlərin tərkib hissəsidir. Əlbəttə ki, şəhərin mərkəzi hissələri ilə yanaşı, ətraf qəsəbə və kəndlərin də inkişafına böyük önəm verilir. Bu məqsədlə Prezident İlham Əliyev tərəfindən Dövlət proqramları təsdiq olunub və müvafiq icra orqanları bu proqramları uğurla həyata keçirməkdədirlər.
Sirr deyil ki, bir neçə il öncə Bakı kəndlərinin kommunal və sosial infrastruktur sahələri ilə bağlı bir sıra çatışmazlıqlar özünü göstərirdi. Bu sahələrdə yenidənqurma və bərpa işlərinin aparılması, yeni dövrün tələblərinə uyğun olaraq müasir sosial infrastruktur obyektlərinin yaradılması, qabaqcıl texnoloji avadanlıqlarla təmin edilməsi günün əsas tələblərindəndir. Dövlət başçısı da məhz bu məsələlərin operativ şəkildə həlli üçün lazım olan bütün tədbirlərin görülməsinə dair göstərişlər verib. Artıq Bakının bütün rayonlarında qeyd olunan sahələr üzrə əsaslı şəkildə təmir-bərpa, yenidənqurma işlərinə start verilib. Onu da qeyd edək ki, indiyədək görülmüş işlər sayəsində paytaxt qəsəbələrinin inzibati ərazilərindəki kommunikasiyalar əsaslı şəkildə təmir olunub, bu ərazilərdəki park və mədəniyyət mərkəzlərinin böyük əksəriyyəti ən müasir üslubda inşa edilərək, insanların istifadəsinə verilib. Park və xiyabanlarda da həyata keçirilən yenidənqurma və abadlıq işləri, mədəni obyektlərin, sosial infrastrukturun yenidən qurulması sürətlə davam etdirilməkdədir. Bütün rayon mərkəzləri, qəsəbələr tanınmaz dərəcədə gözəlləşir və abadlaşır. Prezident İlham Əliyevin davamlı xarakter alan bu qərarları bütövlükdə, Bakının müasir mənzərəsinin modernləşməsində, paytaxtın sosial-iqtisadi inkişafının sürətləndirilməsində müstəsna əhəmiyyət kəsb edir. Bütün ölkə üzrə yenidənqurma işlərinin və inkişaf proqramlarının həyata keçirilməsinə dövlət büdcəsindən ayrılan xərclərlə yanaşı, Prezidentin Ehtiyat Fondundan əlavə maliyyə vəsaitləri yönəldilir ki, bu da insanların rahatlığına, firavan yaşamasına, hər bir kommunal vasitələrlə təmin edilməsində şərait yaradır.
Onu da qeyd etmək yerinə düşər ki, Bakı şəhərində yenidənqurma işləri və şəhərin müasir görkəmdə daha da inkişafına yönəlmiş tədbirlər qarşıdakı dövrdə daha da sürətləndiriləcək, abadlıq işləri geniş vüsət alacaq. Bakının “Sovetski” adlanan ərazisində nəzərdə tutulan yenidənqurma və abadlıq işləri də şəhərimizin müasir görkəminə əlavə gözəllik qatacaq. Artıq bununla bağlı müəyyən layihələr, fikir və təkliflər mövcuddur. Məsələn, dünyanın müxtəlif yerlərində çoxsaylı landşaft və park layihələrinin müəllifi memar Laura Peretti Bakının mərkəzində parkın yaradılması ilə bağlı maraqlı layihə təqdim edib. Onun sözlərinə görə, təklif etdiyi park özündə kəsişən avtomobil yollarından uzaq yaşıl zona yaratmağı nəzərdə tutur. Bu da şəhərin yeraltı və yerüstü hissələri arasında əlaqəni təmin edən yeraltı yol şəbəkəsi sayəsində mümkündür. Bu şəbəkə bəzi yolların genişləndirilməsini, eləcə də, yeraltı yolların inşasını nəzərdə tutur. “Bu, şəhərin səs-küyündən, necə deyərlər, qaçıb gizlənməyə imkan verən əsl təbii parkdır və bu məkan daha çox Nyu-York Mərkəzi Parkına bənzəyir. Mən bu parkı şəhərin “yaşıl ağciyərləri”nə bənzədərdim” - deyə, memar vurğulayıb.
L.Peretti onu da deyib ki, sözügedən ərazidə hər hansı hündür bina inşa olunmayacaq. Layihənin strategiyasında ərazidə mövcud olan və Azərbaycanın memarlıq abidələri hesab olunan tikililərin, eləcə də, artıq inşasına başlanmış tikililərin qorunub saxlanması nəzərdə tutulur. Nəhayət, Təzə Pir məscidinə açılan geniş ərazi sayəsində məscidi, hətta uzaqdan seyr etmək imkanı yaranacaq. Yeganə yeni tikinti böyük Azərbaycan ənənələri ruhunda “Şəbəkə” olacaq. Bu “Şəbəkə” uzun örtülü iki səviyyəli qalereya şəklindədir, bura geniş parkinq, bar, fitnes klub, uşaqlar üçün oyun meydançaları, mədəniyyət mərkəzləri, mağazalar və digər xidmətlər daxildir. Şəhər və park arasında keçid rolunu oynayan, Alov Qüllələri ilə İnşaatçılar prospektini vizual şəkildə birləşdirən “Şəbəkə”, həmçinin, Bakının gecə həyatının mərkəzinə çevrilə bilər. Yuxarıdan baxanda “Şəbəkə” gecə işıqlarının nurunda böyük parlaq xalçaya bənzəyəcək. Bütün bunlar isə şübhəsiz, paytaxtın mənzərəsini daha da müasirləşdirəcək.
Nardar BAYRAMLI

Paylaş:

Baxılıb: 1600 dəfə