Artıq taxılçılıq rayonlarının hamısında biçinin təqribən 97 faizi başa çatıb

Bakı:

21 °C

83 %

3 m/s

Əlaqə

AZ RU EN

Ana səhifə / İqtisadiyyat / Artıq taxılçılıq rayonlarının hamısında biçinin təqribən 97 faizi başa çatıb

Artıq taxılçılıq rayonlarının hamısında biçinin təqribən 97 faizi başa çatıb

31.07.2014 [09:03]

Biçilən sahələrdən 2129497 ton taxıl istehsal olunub
Məlum olduğu kimi, ölkəmizdə taxıl məhsullarının yığımı yekunlaşmaq üzrədir. Artıq taxılçılıq rayonlarının hamısında biçinin təqribən 97 faizi başa çatıb. Kənd Təsərrüfatı Nazirliyinin mətbuat xidmətinin rəhbəri Murtuzəli Hacıyevin verdiyi məlumata görə, ölkə ərazisində payızlıq və yazlıq dənli və dənli paxlalıların (qarğıdalısız) 2014-cü ilin məhsulu üçün biçiləcək 963255 hektar sahənin 931600 hektarı (96,7%) biçilib, biçilən sahələrdən isə 2129497 ton taxıl istehsal olunub: “Ondan 1422746 tonunu buğda təşkil edir. Hər hektardan məhsuldarlıq isə 24 sentner olub. Cari ilin birinci yarısında bütövlükdə kənd təsərrüfatı məhsulları istehsalının həcmində stabil artım davam edib. Həmin dövrdə 2,3 milyard manatlıq məhsul istehsal olunub ki, bu da keçən ilin müvafiq dövrü ilə müqayisədə 5,8 faiz artım deməkdir. Bu dövr ərzində bitkiçilik məhsulları istehsalının həcmi 973 milyon manat, heyvandarlıq məhsulları istehsalının həcmi isə 1,3 milyard manat təşkil edib, keçən ilin müvafiq dövrü ilə müqayisədə 10,1 və 3 faiz artıma nail olunub”.
Kənd Təsərrüfatı Nazirliyinin mətbuat xidmətinin rəhbəri Murtuzəli Hacıyev vurğulayıb ki, Azərbaycan Prezidenti İlham Əliyevin müvafiq sərəncamları ilə ayrılan vəsaitlər hesabına fermerlərin kənd təsərrüfatı texnikası ilə təchizatının yaxşılaşdırılması istiqamətində də ciddi dönüş yaradılıb: “Belə ki, hesabat dövründə “Aqrolizinq” ASC tərəfindən müasir tələblərə cavab verən 1928 kənd təsərrüfatı texnikası, o cümlədən Avropa istehsalı olan 478 taxılyığan kombayn, 417 traktor, 1033 qoşqu avadanlıqları və digər texnikalar alınaraq istifadəyə verilib. Bütün bunların nəticəsidir ki, dövlət başçısının birbaşa dəstəyi nəticəsində yenilənmiş kənd təsərrüfatı texnikası parkı hesabına indiyədək ölkə üzrə taxıl sahələrinin 90 faizindən çox hissəsində biçin ən minimal itki ilə və qısa müddətdə başa çatdırılıb. Biçin zamanı, demək olar ki, yanğın hadisələrinə yol verilməyib. Ümumiyyətlə, cari mövsümdə taxılın vaxtında və itkisiz yığılması məqsədilə bütün rayonlarda operativ qərargah və “Qaynar xətt” yaradılıb, taxılyığan kombaynların optimal dislokasiyası və taxılın yetişmə vaxtına uyğun olaraq rayonlararası hərəkəti operativ şəkildə təşkil edilib”.
Mətbuat xidmətinin rəhbəri onu da qeyd edib ki, bu mövsümdə iqlim şərtlərinin taxıl məhsullarının istehsalı baxımından əlverişsizliyinə baxmayaraq dünyanın digər əsas taxıl istehsalçıları olan ölkələrdə, o cümlədən Azərbaycanın taxıl idxalının 90 faizini həyata keçirdiyi Rusiya və Qazaxıstanda məhsul istehsalı əvvəlki ilə nisbətən artıb: “Ümumilikdə isə qlobal bazar trendlərinə əsasən, buğda ehtiyatları son 3 il ərzində artım dinamikasına malik olub. “FAO ərzaq qiyməti indeksinə”, eləcə də Çikaqo və digər beynəlxalq buğda birjalarının məlumatlarına əsasən, cari ilin iyun ayında buğdanın qiyməti ötən ilin eyni dövrü ilə müqayisədə təqribən 10-20 faiz aşağı düşüb. Bütün bunlar onu deməyə əsas verir ki, ölkənin taxıla olan ehtiyacının xarici mənbələr hesabına ödənilən hissəsinin əlverişli şərtlərlə alınmasında heç bir ciddi problem yaşanmayacaq”.
Oktay

Paylaş:

Baxılıb: 1403 dəfə