Aydın Hüseynov: 2014-cü ilin ötən 9 ayında ölkəmizin uğurlu inkişafı təmin edilib

Bakı:

26 °C

61 %

6 m/s

Əlaqə

AZ RU EN

Ana səhifə / İqtisadiyyat / Aydın Hüseynov: 2014-cü ilin ötən 9 ayında ölkəmizin uğurlu inkişafı təmin edilib

Aydın Hüseynov: 2014-cü ilin ötən 9 ayında ölkəmizin uğurlu inkişafı təmin edilib

10.10.2014 [09:08]

2014-cü ilin ötən doqquz ayı Azərbaycan üçün kifayət qədər uğurlu olub. İqtisadiyyatın inkişafı güclü iqtisadi potensial və mükəmməl idarəetmə strategiyasının vəhdəti sayəsində dərinləşib. Prezident İlham Əliyevin Sədrliyi ilə keçirilən Nazirlər Kabinetinin 2014-cü ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasını şərh edən YAP-ın İqtisadi məsələlər komissiyasının sədr müavini Aydın Hüseynovun sözlərinə görə, ölkəmizdə aparılan islahatlar, irəli sürülmüş təşəbbüslər dinamik inkişafı təmin edib. Üçüncü rübdə ölkəmizin iqtisadi, siyasi, sosial, elmi-mədəni, humanitar sahələrində əhəmiyyətli dəyişikliklər baş verib: “Dövlət başçısının bildirdiyi kimi, bu ilin 9 ayının sosial-iqtisadi inkişafı uğurlu olub. Ölkəmizin inkişafı ilə bağlı inamlı addımlar atılıb. Dünyada maliyyə böhranının davam etdiyi bir vaxtda 9 ayda ümumi daxili məhsul 2,5 faiz, qeyri-neft sektoru isə 6 faiz artıb. Qeyri-neft sektorunun ÜDM-də payı 57 faizə çatıb”.
A.Hüseynovun sözlərinə görə, bu tendensiya onu göstərir ki, iqtisadiyyatda güclü dinamika və şaxələnmə siyasətinin məntiqi nəticəsi olaraq neftdənkənar sahələrin sıçrayışı və bu potensialın ümumi inkişaf yönləndirilməsi bir sistem təşkil etməkdədir. Qeyri-neft sektorunun hesabına əldə edilən bu artım iqtisadiyyatın strukturunda keyfiyyət dəyişikliklərinin, şaxələndirmə siyasətinin mühüm göstəricisi sayıla bilər.
YAP-ın İqtisadi məsələlər komissiyasının sədr müavini Aydın Hüseynov, həmçinin, deyib ki, cari ilin 9 ayında əhalinin gəlirləri 5,4 faiz artıb, inflyasiya 1,5 faiz təşkil edib. Bu isə əhalinin gəlirlərinin qiymət artımını 4 dəfə üstələdiyini göstərir. Beləliklə, hər il olduğu kimi, əhalinin gəlirləri inflyasiyanı üstələyir və bu, bilavasitə insanların yaşayış səviyyəsinə müsbət təsir göstərir. Hesabat dövründə dövlət büdcəsinin gəlirləri 9,3 milyard manat və ya 101,6 faiz yerinə yetirilib, xərcləri isə 8,7 milyard manat olub. Ölkəmizin strateji valyuta ehtiyatları 53 milyard manatı keçib. İqtisadiyyata böyük həcmdə - 19 milyard dollar sərmayə qoyulub ki, onun da 11 milyard dolları daxili investisiyalardır.
YAP-ın İqtisadi məsələlər komissiyasının sədr müavini bildirib ki, ötən müddətdə ölkə iqtisadiyyatında iqtisadi göstəricilərlə yanaşı, həm də sosial sahədə müsbət artım meyilləri müşahidə olunub. Orta aylıq əməkhaqqı hazırda 450 manata çatıb. Sosial sahədə baş verən müsbət dəyişikliklər davamlı olaraq maaşların və pensiyaların artması üçün imkanlar yaradıb: “Hazırda Azərbaycan orta aylıq əməkhaqqının səviyyəsinə görə MDB-də ən yaxşı göstəricilərdən birinə yaxınlaşıb. Bu tendensiya, həmçinin, Azərbaycan hökumətinin iqtisadi artım fonunda sosial dövlət strategiyasının möhkəmlənməsinə yönəlmiş siyasətinin reallaşdığını göstərir”.
Ötən dövrdə regionların sosial-iqtisadi inkişafı Dövlət Proqramı uğurla icra olunub, doqquz ayda 100 mindən çox yeni iş yeri yaradılıb, bununla da son 10 ildə açılan iş yerlərinin sayı 1 milyon 300 minə çatıb. Bölgələrdə infrastruktur layihələri uğurla icra edilib və bu proses davam edir. Regionlarda aparılan geniş quruculuq işləri və yeni istehsal obyektlərinin açılması insanların işlə təmin edilməsinə, məşğulluğun artmasına səbəb olub. İşsizlik kəskin şəkildə aşağı düşüb və hazırda 5 faiz səviyyəsindədir.

Paylaş:

Baxılıb: 1333 dəfə