Gəncə şəhər İcra Hakimiyyətində bu ilin doqquz ayının yekunları və qarşıda duran vəzifələr müzakirə olunub

Bakı:

19 °C

63 %

5 m/s

AZ RU EN

Ana səhifə / İqtisadiyyat / Gəncə şəhər İcra Hakimiyyətində bu ilin doqquz ayının yekunları və qarşıda duran vəzifələr müzakirə olunub

Gəncə şəhər İcra Hakimiyyətində bu ilin doqquz ayının yekunları və qarşıda duran vəzifələr müzakirə olunub

23.10.2014 [10:28]

Gəncə şəhər İcra Hakimiyyətində bu ilin doqquz ayının yekunları və qarşıda duran vəzifələrlə bağlı şəhər fəallarının yığıncağı keçirilib. Yığıncaqda müəssisə və təşkilat rəhbərləri, ziyalılar, ictimaiyyət nümayəndələri iştirak ediblər. Öncə Azərbaycan Respublikasının Prezidenti İlham Əliyevin 18 oktyabr - Müstəqillik Günündə Gəncəyə tarixi səfərini, son illər və 2014-cü ilin doqquz ayında şəhərin sosial-iqtisadi, ictimai-siyasi həyatını, qazanılan uğurları, Gəncənin qədimliyini saxlamaqla, müasirləşməsini əks etdirən sənədli film nümayiş etdirilib.
Gəncə şəhər İcra Hakimiyyətinin başçısı Elmar Vəliyev tədbir iştirakçılarını Müstəqillik Günü münasibətilə təbrik edib, onlara səmərəli fəaliyyətlərində uğurlar arzulayıb. O, ölkə başçısının Gəncəyə 13-cü səfərini 2014-cü ilin ən əlamətdar hadisəsi olaraq dəyərləndirib. Prezident İlham Əliyevin diqqət və qayğısı sayəsində şəhərin yeni intibah dövrü yaşadığını, bütün sahələrdə görkəmli nailiyyətlərin əldə edildiyini, Ulu öndər Heydər Əliyev siyasi kursuna daim sədaqətli olan gəncəlilərin inkişaf və tərəqqi naminə əzmkarlıqla və fədakarlıqla çalışdıqlarını qeyd edib və bütün gəncəlilər adından Prezident İlham Əliyevə, Onun xanımı, Heydər Əliyev Fondunun Prezidenti, UNESCO-nun və İSESCO-nun xoşməramlı səfiri Mehriban Əliyevaya dərin minnətdarlığını bildirib.
İcra başçısı Prezidentin tapşırıqlarının Gəncədə hər zaman yüksək səviyyədə yerinə yetiriləcəyini, 2014-cü ilin də şəhərin tarixində qələbə və zəfər ili olaraq yadda qalacağını vurğulayıb.
Çıxış edənlər - ADAU-nun rektoru, professor İbrahim Cəfərov, Təhsil İdarəsinin müdiri Zakir Hüseynov, Gənclər və İdman Baş İdarəsinin rəisi Müşfiq Cəfərov, Qafqaz Müsəlmanlarının Qərb bölgəsi üzrə səlahiyyətli nümayəndəsi Hacı Tahir Abbasov və başqaları Ümummilli lider Heydər Əliyevin ənənələrini sədaqətlə davam etdirən Prezident İlham Əliyevin Gəncəyə və gəncəlilərə həmişə böyük qayğı göstərdiyini, gəncəlilərin də bu etimada layiqli işləri, möhtəşəm töhfələri ilə cavab verdiklərini, bundan sonra da bu uğurları davam etdirəcəklərini bildirməklə, səmimi təşəkkürlərini ifadə ediblər.
Tədbirin sonunda Gəncənin ictimai-siyasi həyatında fərqlənən şəhər fəallarından bir qrupuna Fəxri Fərman və qiymətli hədiyyələr təqdim edilib.

Paylaş:

Baxılıb: 1100 dəfə