Naxçıvan Muxtar Respublikasında payızlıq taxıl əkini davam etdirilir

Bakı:

4 °C

60 %

9 m/s

Əlaqə

AZ RU EN

Ana səhifə / İqtisadiyyat / Naxçıvan Muxtar Respublikasında payızlıq taxıl əkini davam etdirilir

Naxçıvan Muxtar Respublikasında payızlıq taxıl əkini davam etdirilir

13.11.2014 [09:57]

Naxçıvan Muxtar Respublikası Ali Məclisi sədrinin Sərəncamı ilə təsdiq edilən “2008-2015-ci illərdə Naxçıvan Muxtar Respublikasında əhalinin ərzaq məhsulları ilə etibarlı təminatına dair Dövlət Proqramı”nın uğurlu icrası muxtar respublikada əkinçiliyin inkişafına da öz təsirini göstərib. Son illər dövlət proqramından irəli gələn vəzifələrin yerinə yetirilməsi, o cümlədən torpaq mülkiyyətçilərinə maliyyə və texniki dəstəyin göstərilməsi kənd təsərrüfatı məhsullarının istehsalını xeyli artırıb. Əsas strateji məhsul hesab olunan taxıl əkininin genişləndirilməsi, əhalinin çörək və un məmulatlarına olan tələbatının ödənilməsi də bu baxımdan mühüm əhəmiyyət daşıyır.
Naxçıvan Muxtar Respublikası Ali Məclisinin mətbuat xidmətindən AzərTAc-a bildirilib ki, noyabrın 12-də Naxçıvan Muxtar Respublikası Ali Məclisinin sədri Vasif Talıbov “Bərəkət” Toxumçuluq Təsərrüfatının taxıl sahəsinə gəlib, taxıl əkininin gedişi ilə maraqlanıb.
Naxçıvan Muxtar Respublikasının kənd təsərrüfatı naziri Elşad Əliyev payızlıq taxıl əkininin gedişi barədə məlumat verib. Qeyd olunub ki, artıq bir neçə gündür muxtar respublikada payızlıq taxıl əkini həyata keçirilir. Bu günədək 10 min hektar sahədə şum aparılıb. Şum aparılan ərazinin 5600 hektarında buğda, 1400 hektarında isə arpa əkilib. Taxıl əkini şırım üsulu ilə aparılır və hər hektara 180 kiloqram olmaqla buğda toxumu əkilir. Şırım üsulunun tətbiqi məhsuldarlığı yüksəldir, suvarma suyundan qənaətlə istifadəyə və torpaqların şoranlaşmasının qarşısının alınmasına imkan yaradır.
Bildirilib ki, “Bərəkət” Toxumçuluq Təsərrüfatı üçün ayrılan sahə 2 min hektardır. Əkin zamanı yerli iqlim şəraitinə uyğun yüksək reproduksiyalı “Quality” toxum sortundan istifadə olunur. Əkinə “Naxçıvan Aqrolizinq” Açıq Səhmdar Cəmiyyətinin texnikaları cəlb olunub. Texnikanın gücündən səmərəli istifadə olunması səpin işlərinin optimal müddətdə başa çatdırılmasına imkan verəcək.
Ərazinin su təminatı Araz çayından qidalanan “Azərbaycan” nasos stansiyası vasitəsilə ödənilir. Bu məqsədlə nasos stansiyasından təzyiqli boru xətti çəkilib, supaylayıcı hovuz tikilib. Supaylayıcı hovuzdan su öz axımı ilə əkin sahələrinə verilir. Bu il supaylayıcı hovuzdan 3 min metr uzunluğunda özüaxımlı boru xətti çəkilib, boru xəttinin üzərində 6 suburaxıcı qoyulub. Yeni çəkilən boru xəttinin su sərfi saniyədə 800 litrdir.
Ali Məclisin sədri gələcəkdə əkin sahələrində qapalı suvarma şəbəkəsinin qurulması, payızlıq taxıl əkininin vaxtında başa çatdırılması, yaz əkin mövsümündə “Bərəkət” Toxumçuluq Təsərrüfatının sahələrində arpa əkilməsi barədə tapşırıqlar verib.

Paylaş:

Baxılıb: 1146 dəfə