“Elektron hökumət təlim-tədris mərkəzi”nin açılışı olub

Bakı:

19°C

88%

9m/s

Əlaqə

AZ RU EN

Ana səhifə / İqtisadiyyat / “Elektron hökumət təlim-tədris mərkəzi”nin açılışı olub

“Elektron hökumət təlim-tədris mərkəzi”nin açılışı olub

07.02.2015 [11:05]

Dünən Bakıda “Elektron hökumət təlim-tədris mərkəzi”nin açılış mərasimi keçirilib. Mərkəz Azərbaycanın Rabitə və Yüksək Texnologiyalar Nazirliyi və Koreyanın Xarici İşlər Nazirliyi arasında 2013-cü il aprelin 18-də imzalanan “Azərbaycanda Elektron Hökumət üçün Təlim Mərkəzinin yaradılmasına dair qrant razılaşması” çərçivəsində yaradılıb.
Tədbirdə iştirak edən rabitə və yüksək texnologiyalar naziri Əli Abbasov bildirib ki, qrant razılaşması əsasında Bakı şəhəri və 15 region daxil olmaqla (Gəncə, Naxçıvan, Sumqayıt, Mingəçevir, Bərdə, Lənkəran, Qazax, Zaqatala, İmişli, Qəbələ, Göyçay, Şirvan, Şamaxı, Qusar və Şəki) ümumilikdə 17 mərkəz qurulub: “Hələlik bunlardan yalnız biri ən müasir avadanlıqlarla təchiz edilib. Mərkəzin mövcud potensialından istifadə edərək ilk növbədə dövlət qulluqçuları üçün İKT üzrə bilik və bacarıqlarının artırılması, elektron xidmətlərin genişləndirilməsi, informasiya təhlükəsizliyi üzrə nəzəri və praktiki biliklərə yiyələnməsi, onlara lazımi metodiki köməkliyin göstərilməsi və digər xidmətlər həyata keçiriləcək”.
Nazir qeyd edib ki, “Elektron hökumət”in qurulması sahəsində liderlərdən biri Cənubi Koreyadır: “Bu ölkə ilə əməkdaşlığın inkişaf etdirilməsi diqqət mərkəzindədir. Azərbaycan Cənubi Koreya şirkətlərinin ölkənin informasiya-kommunikasiya texnologiyaları sahəsinə cəlb edilməsində maraq göstərir. Xüsusilə də, Cənubi Koreya ilə əməkdaşlıq bu istiqamətdə beynəlxalq təcrübənin öyrənilməsində mühüm əhəmiyyət kəsb edir. Bu əməkdaşlığın səmərəli nəticələr verəcəyinə ümidvarıq”.
“Azərbaycan 2020: gələcəyə baxış” İnkişaf Konsepsiyasına əsasən, qarşıdakı müddət ərzində ölkənin ümumi daxili məhsulunun (ÜDM) iki dəfə artırılması nəzərdə tutulur. Burada əsas rol qeyri-neft sektoruna məxsus olacaq. Onun ayrılmaz hissələrini isə elm, təhsil, yüksək texnologiyalar və müasir tipli sahibkarlığın inkişafı təşkil edəcək. Söhbət, həmçinin müasir tipli bazar iqtisadiyyatının saxlanılması, əlverişli rəqabət mühitinin yaradılması, sahibkarlığa dəstək və s.-dən gedir. Hazırda əsas diqqət “Elektron hökumət”in qurulmasına ayrılır. “Elektron hökumət” iqtisadiyyat və sahibkarlığın inkişafına, həmçinin cəmiyyətin demokratikləşməsinə güclü təsir etməyə hesablanıb”, - deyə Ə.Abbasov əlavə edib.
Nazir bildirib ki, qarşıdakı dövrdə əsas məqsəd bu istiqamətdə xidmətin keyfiyyətinin artırılması, həmçinin istifadənin kütləviləşdirilməsidir.
Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın sədri Bəhram Xəlilov isə bildirib ki, mərkəz ümumi məqsədlərə xidmət edəcək. Burada göstərilən xidmətlərdən həm dövlət qurumları, həm də cəmiyyət nümayəndələri yararlanacaq.
Koreya Respublikasının Azərbaycandakı səfiri Çoi Suk Koreya Beynəlxalq Əməkdaşlıq Agentliyinin Azərbaycan hökuməti ilə bir neçə qrant razılaşması imzaladığını və Azərbaycanda qrant layihələrini uğurla icra etdiyini bildirməkdən qürur hissi keçirdiyini vurğulayıb. Səfir bildirib ki, bunlardan biri də “Azərbaycanda Elektron Hökumət üçün Təlim Mərkəzinin yaradılması” layihəsidir. O qeyd edib ki, bu layihənin uğurlu icrasını ölkələrimizin gələcək əməkdaşlığına böyük təsiri olacaq.
Digər çıxış edənlər diqqətə çatdırıblar ki, layihə çərçivəsində digər dövlət qurumları və aidiyyəti təşkilatlarla əməkdaşlıq planlaşdırılır. Burada aztəminatlı ailələrin uşaqları üçün pulsuz kompüter kursları da təşkil ediləcək. Mərkəzin “e-training.az” adlı portalı hazırlanıb, onun vasitəsilə Təhsil İnformasiya Sisteminə qoşulmaq mümkündür. Dinləyicilərə real zaman, offlayn və onlayn rejimlərində təlimlər keçiriləcək.
Nurlan QƏLƏNDƏRLİ

Paylaş:

Baxılıb: 1030 dəfə