Cari mövsümdə respublika tarixində ilk dəfə olaraq rekord məhsuldarlıq əldə edilib

Bakı:

27 °C

69 %

11 m/s

Əlaqə

AZ RU EN

Ana səhifə / İqtisadiyyat / Cari mövsümdə respublika tarixində ilk dəfə olaraq rekord məhsuldarlıq əldə edilib

Cari mövsümdə respublika tarixində ilk dəfə olaraq rekord məhsuldarlıq əldə edilib

08.09.2015 [10:05]

İmran Cümşüdov: Bazarlarda qiymət artımı və məhsul qıtlığı ilə bağlı hər hansı təhlükəli meyl gözlənilmir
Məlum olduğu kimi, ölkəmizdə kənd təsərrüfatı məhsulları istehsalının artırılmasına, ərzaq təhlükəsizliyinin təmin edilməsi məqsədilə aqrar sektorun inkişafına xüsusi diqqət yetirilir. Əhalinin keyfiyyətli kənd təsərrüfatı məhsulları ilə təminatı istiqamətində bir sıra işlər görülür. Bu işlərin nəticəsi olaraq cari mövsümdə, respublika tarixində ilk dəfə olaraq rekord məhsuldarlıq əldə edilib. Bu barədə qəzetimizə açıqlamasında Kənd Təsərrüfatı Nazirliyinin Bitkiçilik şöbəsinin müdiri İmran Cümşüdov məlumat verib. Onun sözlərinə görə, 2015-ci il respublikamızda taxılçılıqda çox əlverişli il olub: “Respublika üzrə orta məhsuldarlıq 30,3 sent/ha təşkil edib. Bu il taxıl üzrə məhsuldarlıq ötən ilə nəzərən 34, buğda üzrə 33,8 faiz yüksəkdir. Bu il quraqlıq müşahidə edilmədiyindən məhsuldarlıq da bol olub”.
Məhsul yığımının demək olar ki, yekunlaşmaq üzrə olduğunu deyən İ.Cümşüdov, həmçinin, bildirib ki, əkin sahələrində artıq 90 faiz biçin həyata keçirilib. Yerdə qalan 10 faiz də dağlıq zonaların payına düşdüyündən o da iki həftəyə yekunlaşdırılacaq: “Bu il 915 min 212 hektardan dənli bitkilərin 780 min 19 hektarı, yəni 88,8 faizi biçilib. Hektardan 30,3 sentner olmaqla 2,4 milyon ton taxıl əldə edilib. O cümlədən, 539 min 915 hektar buğda sahəsinin 425 min 370 hektarı, yəni 78,8 faizi biçilib. Hektardan 31,7 sentner olmaqla 1,4 milyon ton ərzaq buğdası əldə edilib. Hazırda quraqlığa qarşı ehtiyat tədbirlər görülür. Taxıl yığımı yekunlaşır və növbəti il - 2016-cı il üçün səpin işlərinə hazırlıq tədbirləri görülür”.
Bu il ölkədə taxıl məhsulları ilə yanaşı bir sıra kənd təsərrüfatı məhsulları, əsasən də, meyvə-tərəvəz bitkilərinin də bol olduğunu deyən İ.Cümşüdov becərilmə işlərinin hələ də davam etdiyini bildirib. O, həmçinin, fermerlərə keyfiyyətli məhsul əldə etmək və ola biləcək quraqlıqdan əziyyət çəkməmək üçün məsləhətlərini də verib: “Dünyada baş verən iqlim dəyişikliyi quraqlıqla müşahidə olunur. Buna görə də müəyyən qabaqlayıcı tədbirlərdən istifadə etmək lazımdır. Taxılla bağlı qabaqlayıcı tədbir kimi, Elmi Tədqiqat İnstitutlarında quraqlığadavamlı sortlar yaradılır. Əkinçilik İnstitutu tərəfindən quraqlığa, xəstəliyə, toza və digər amillərə davamlı sortlar yaradılır. Eyni zamanda, bizdə tərəvəzçilik, bağçılıq institutu da var. Hərəsi öz sahəsi ilə bağlı, iqlim dəyişikliyini nəzərə alaraq sortların, yəni toxumların istehsalını həyata keçirirlər. Fermerlərə tövsiyə olunur ki, hər bir rayona uyğun, rayonlaşmış, o bölgədə davamlılıq göstərən sortlardan istifadə etsinlər ki, quraqlıq da müşahidə olunarsa, əziyyət çəkməsinlər”.
Ölkədə məhsul bolluğunun bazarlarda qiymətlərin sabit qalmasına da təsirsiz ötüşməyəcəyini deyən İ.Cümşüdov, həmçinin, məhsulunu satmaq istəyən hər bir fermer üçün lazımi şəraitin yaradıldığını da bildirib. Bazarlarda süni qiymət artımının olmaması üçün nəzarət tədbirlərinin gücləndirildiyini deyən İ.Cümşüdov, həmçinin, nazirlik tərəfindən kənd təsərrüfatı məhsullarında süni bahalaşmanın qarşısının alınması üçün stimullaşdırıcı tədbirlərin görüldüyünü və bazarlarda bolluq yaratmağa çalışdıqlarını bildirib: “Süni qiymət artımının qarşısını almaq məqsədilə tərəfimizdən bazarlara daimi nəzarət edilir. Bizim məqsədimiz bazarda stimullaşdırıcı tədbirlər görərək bolluq yaratmaqdır. Yeri gəlmişkən qeyd edim ki, bazarlarda qiymət artımı və məhsul qıtlığı ilə bağlı hər hansı təhlükəli meyil gözlənilmir”.
Vüsalə CAVANŞİR

Paylaş:

Baxılıb: 1238 dəfə