Yeni idxal mənbələri axtarılır

Bakı:

19 °C

68 %

10 m/s

Əlaqə

AZ RU EN

Ana səhifə / İqtisadiyyat / Yeni idxal mənbələri axtarılır

Yeni idxal mənbələri axtarılır

19.04.2022 [10:14]

Qazaxıstan taxıl və un ixracını məhdudlaşdırır

1.7 milyard dünya əhalisinin aclıqla üz-üzə qalmasına gətirib çıxara bilər

Nicat

Ən iri taxıl və un ixracatçısı olan Qazaxıstan taxıl və un ixracını məhdudlaşdırır. Bununla bağlı müvafiq əmri nazir Yerbol Karaşukeyev imzalayıb. Sənədə görə, bu il iyunun 15-dək buğda və unun ixracı ciddi şəkildə təsdiq edilmiş kvota həcmləri daxilində həyata keçiriləcək. Göstərilən tarixədək Qazaxıstanda buğda və maya üçün tətbiq olunan məhdudiyyət 1 milyon ton, buğda və ya buğda-çovdar unu üçün isə 300 min ton müəyən edilib.

Bundan əlavə, sənəd qüvvəyə mindiyi günədək gömrük qanunvericiliyinə uyğun olaraq ixrac gömrük proseduru çərçivəsində sənədləşdirilmiş mallar Qazaxıstan Respublikasının ərazisindən maneəsiz ixrac ediləcək.

Azərbaycan da taxılın əhəmiyyətli hissəsini məhz Qazaxıstandan idxal edir. Belə olduğu halda taxıl və buğda ixracatına qoyulan məhdudiyyət ölkəmizə necə təsir edəcək?

Mövzu ilə bağlı “Yeni Azərbaycan”a danışan Milli Məclisin deputatı Vüqar Bayramov bildirib ki, Qazaxıstanın buğda ixracatına məhdudiyyət tətbiq etməsi müəyyən çətinliklər yarada bilər: “Qazaxıstan buğda ixracatına görə dünyada ilk onluğa daxildir. Belə ki, buğda ixracatı həcminə görə Qazaxıstan ən çox buğda ixrac edən 9 ölkədən biridir. Qazaxıstanın buğda ixracatına qadağa, məhdudiyyət tətbiq etməsi regionda taxıla və buğdaya olan tələbin ödənilməsində müəyyən çətinliklər yarada bilər. Azərbaycan öz ehtiyatlarını ötən ilin sonundan etibarən daha çox artırmağa çalışır. Və nəzərə alsaq ki, ilk 10-luğa daxil olan həm Rusiya, həm də Ukrayna buğda ixracatı praktiki olaraq dayandırılıb, o baxımdan BMT-nin də tədqiqatları göstərir ki, bu, 1.7 milyard dünya əhalisinin aclıqla üz-üzə qalmasına gətirib çıxara bilər. Ona görə də bu, nəinki regionda bütövlükdə dünyada buğdaya olan tələbin ödənməsində çətinliklər yaradacaq”.

İqtisadçı vurğulayıb ki, Azərbaycan istehlak bazarında hər hansı bir risk yoxdur: “Təbii ki, Azərbaycan bir tərəfdən digər mənbələrdən buğda idxalını həyata keçirməyə, ehtiyatları genişləndirməyə çalışır, eyni zamanda, Nazirlər Kabineti tərəfindən də bir sıra məhsulların ixracatının tənzimlənməsi ilə bağlı qərarı var. Məqsəd istehlak bazarında stabilliyin qorunması idi. Və ona görə də Azərbaycan istehlak bazarında hər hansı bir risk yoxdur. Ərzaq məhsulları ilə bağlı qıtlıq yoxdur. Amma dünya bazarındakı qeyri-müəyyənlik fonunda yeni idxal mənbələrinin tapılması vacibdir, çünki Rusiya-Ukrayna müharibəsi davam edir. Müharibənin nə qədər davam edəcəyini, başa çatdıqdan sonrakı vəziyyətin necə olacağını proqnozlaşdırmaq çox çətindir”.

“O baxımdan, ehtiyatların formalaşdırılması və xüsusən də Hindistan kimi ölkələrdən buğda idxalının həyata keçirilməsi prioritet istiqamətlərdəndir”, - deyə V.Bayramov əlavə edib.

Paylaş:

Baxılıb: 794 dəfə