Yeni idarəçilik mexanizmi

Bakı:

27 °C

61 %

9 m/s

Əlaqə

AZ RU EN

Ana səhifə / İqtisadiyyat / Yeni idarəçilik mexanizmi - yeni model

Yeni idarəçilik mexanizmi - yeni model

06.05.2022 [10:10]

Xüsusi nümayəndəliklər regionlarda dövlətin siyasətini həyata keçirir

Günel ABBAS

İstər dövlət, istərsə də biznes sahələrində yeni idarəetmə növünə keçid dövrün tələbidir. Azərbaycan bütün sahələrdə olduğu kimi dövlət idarəçiliyində də zamanın tələbinə uyğunlaşır. Bu istiqamətdə davamlı, dinamik işlər görülür. Nəticə etibarilə hazırda ölkəmizdə yeni idarəçilik mexanizminə uyğun üç xüsusi nümayəndəlik fəaliyyət göstərir. Prezident İlham Əliyev ilkin mərhələdə Şuşa və Ağdamda yaradılan xüsusi nümayəndəliklərin sayının artırılacağını öz çıxışlarında mütəmadi diqqətə çatdırır.

Prezident aprelin 30-da “Cənubi Qafqaz: inkişaf və əməkdaşlıq” beynəlxalq konfransının iştirakçıları ilə görüşdə bu məsələlərə bir daha toxunub. Dövlət başçısı digər ərazilər üçün də xüsusi nümayəndələrin təyin ediləcəyinin xəbərini verib. Bildirib ki, onların hələlik təyin edilməməsinin səbəbi orada fəal yerləşmə prosesinin aparılmaması ilə əlaqədardır. Prezident hazırda yeni idarəçilik modelinin sınaqdan keçirildiyini də qeyd edib. Mayın 4-də Şərqi Zəngəzur iqtisadi rayonuna daxil olan Zəngilan rayonunda xüsusi nümayəndəliyin yaradılması sözügedən prosesi sürətləndirən amillərdən biridir.

Milli Məclisin Regional məsələlər komitəsinin sədri Siyavuş Novruzov “Yeni Azərbaycan”a müasir idarəçilik modelinin tətbiqi barədə danışıb. Bildirib ki, Qarabağda sınaqdan keçirilən yeni sistem fərqli olacaq: “Yekun sınaqlar bitəndən sonra bu sistemi Azərbaycanın digər ərazilərinə də tətbiq etmək və regionlarda dövlət idarəçiliyini təkmilləşdirmək mümkün olacaq. Məlumdur ki, paytaxtda qəbul edilən qərarların hamısı insanların həyat şəraitinin və infrastrukturun yaxşılaşdırılması, iqtisadi inkişaf məqsədi daşıyır. Ancaq həmin qərarlar heç də bütün regionlarda icra edilmir, nəticədə rayonlarda yerləşən insanlar bu yeniliklərdən məhrum olur. Bu mənada yeni idarəçilik modeli olduqca əhəmiyyətli və mütərəqqi xarakter daşıyır”.

Deputat bildirib ki, regional iqtisadi məsələlərə yeni baxış fonunda ölkədə sovet dövründən qalma sistem dəyişdirilir: “Prezidentin xüsusi nümayəndəsi regionlarda dövlətin siyasətini həyata keçirir, həmin ərazilərə investisiya cəlb edir. Hesab edirəm ki, bu model yerli özünüidarəetmə sistemini gücləndirəcək. Bununla insanlar mərkəzdə yox, yerlərdə də öz problemlərini həll edəcək. Yeni model rayonların dünya standartlarına uyğunlaşdırılması baxımından da olduqca vacibdir. Məhz bu idarəçilik modelinə Qarabağdan başlanılmasının özü də xüsusi əhəmiyyət daşıyır. Yeni format Amerikada da mövcuddur, ancaq orada ştatlar formasındadır. Bizim mexanizm daha çox Türkiyə modelinə bənzəyir”.

S.Novruzov qeyd edib ki, xüsusi nümayəndələrin təyinatı ölkə başçısının sərəncamı əsasında həyata keçiriləcək.

Paylaş:

Baxılıb: 884 dəfə