Kart hesabındakı vəsaitlərdən vergi tutulacaq?

Bakı:

29 °C

52 %

7 m/s

Əlaqə

AZ RU EN

Ana səhifə / İqtisadiyyat / Kart hesabındakı vəsaitlərdən vergi tutulacaq?

Kart hesabındakı vəsaitlərdən vergi tutulacaq?

10.02.2023 [10:49]

Nicat Dilqəmli

Son günlər aktual olan mövzulardan biri də vətəndaşların banklarda saxladıqları əmanətlərin vergiyə cəlb olunması məsələsidir. Daha dəqiq desək, fevral ayının 1-dən etibarən Azərbaycanda yerli bankların və xarici bankın yerli filiallarının fiziki şəxslərin əmanətləri üzrə ödədiyi illik faiz gəlirlərinin 10 % dərəcə ilə vergiyə cəlb edilməsinə başlanıldı. Yeni qaydanın əsl mahiyyətini tam dərindən anlamaqda çətinlik çəkən bəzi vətəndaşlarda isə bu, ciddi təşviş, narahatlıq doğurdu. Bir neçə gündür ki, onlar müxtəlif platformalardan suallarını ünvanlayırlar. Müşahidələrə əsasən onu demək olar ki, vətəndaşların müəyyən bir hissəsinin cavabını tapmağa çalışdığı əsas sual kartdakı vəsaitlərindən verginin tutulub-tutulmayacağı ilə bağlıdır.

Bəs proses necə tənzimlənəcək? Kartlarda olan vəsaitlər vergiyə cəlb olunacaqmı?

Məsələ ilə bağlı suallarımızı cavablandıran Milli Məclisin deputatı, iqtisadçı-ekspert Vüqar Bayramov məsələyə aydınlıq gətirib: “Qeyd etmək istərdik ki, “Vergi Məcəlləsinə” edilən dəyişikliklərdən sonra 2023-cü il fevralın 1-dən etibarən 5 (beş) il müddətində Azərbaycan Respublikasının ərazisində, habelə ölkə hüdudlarından kənarda rezident hüquqi şəxslər tərəfindən kütləvi təklif edilmiş və tənzimlənən bazarda ticarətə buraxılmış səhmlər və istiqrazlar üzrə ödənilən dividend, diskont (istiqrazların nominalından aşağı yerləşdirilməsi nəticəsində yaranmış fərq) və faiz gəlirləri vergidən azad olundu. Bu məcəllənin 102.1.22-2 maddəsi ilə tənzimlənir. Göründüyü kimi, fiziki şəxslərin əmanəti üzrə ödənilən illik faiz gəlirləri azad olmalar siyahısında deyil”.

V.Bayramov deyir ki, həmin məcəllənin 123-cü maddəsi ödəmə mənbəyində faizlərdən vergi tutulmasını nəzərdə tutulur. Deməli, kartlarda olan vəsaitlər ilə bağlı iki hal mümkündür:

“1. Əgər kartda olan vəsait gəlir gətirmirsə (məsələn, pulun saxlandığı debet və kredit plastik kartlar) o halda kartda olan pul vergiyə cəlb olunmur.

2. Əgər kartda olan vəsaitə faiz hesablanırsa və kart sahibinə aylıq və ya illik gəlir gətirirsə o halda həmin qazanc vergiyə cəlb olunacaq. Məsələn, kartda 5 min manat pul var. Həmin vəsaitə illik 8 faiz gəlir hesablanır və bu məbləğə 400 manat əlavə olunur. Bu halda kart sahibinin ödədiyi illik vergi 40 manat olur (400 manat X 10 %)”.

Millət vəkilinin sözlərinə görə, kartda olan əsas məbləğin vergiyə cəlb olunması nəzərdə tutulmur: “Yalnız faizi gəliri vergiyə cəlb oluna bilər”.

“Bir daha qeyd etmək istərdim, sizin kartınız sizə faiz gəliri gətirmirsə, heç bir halda sizdən vergi ödəmək tələb oluna bilməz”, - deyə V.Bayramov fikirlərinə əlavə edib.

Paylaş:

Baxılıb: 656 dəfə