Əməkdaşlıq və inteqrasiya...

Bakı:

25 °C

69 %

8 m/s

Əlaqə

AZ RU EN

Ana səhifə / MEDİA / Əməkdaşlıq və inteqrasiya...

Əməkdaşlıq və inteqrasiya...

17.02.2024 [10:50]

Dünyanın diqqəti Azərbaycana yönəlib

Günel ABBAS

Azərbaycan müstəqillik qazandıqdan sonra ən mühüm prioritetlərdən biri dünya dövlətləri vıə beynəlxalq təşkilatlar ilə inteqrasiyanı daha da sıxlaşdırmaq, əməkdaşlığın genişləndirilməsinə nail omaqdır. Bu istiqamətdə aparılan siyasət isə ardıcıllığı və məqsədyönlüyü ilə seçilir. Yerləşdiyi regionun lideri statusunu daşıyan Azərbaycan həm geosiyasi, həm də geocoğrafi üstünlüklərə malikdir. Bu mənada, ölkəmizlə əlaqələrin inkişafı beynəlxalq aləm üçün də mühüm şərtlərdən biri kimi xarakterizə olunur. Etibarlı tərəfdaş, güvənilir dost kimi qiymətləndirilən Azərbaycan da öz növbəsində dünya birliyinə inteqrasiya yolunda mühüm addımları ilə seçilir. Yaradılan əlaqələr isə birmənalı şəkildə milli maraqlara, qarşılıqlı mənafeyə əsaslanır. Ölkəmiz hər zaman qurduğu münasibətlərdə bərabərhüquqlu prinsipləri əsas götürür.

Məsələ ilə bağlı fikirlərini bölüşən Milli Məclisin beynəlxalq münasibətlər və parlamentlərarası əlaqələr komitəsinin üzvü Elman Nəsirov vurğulayıb ki, Azərbaycan beynəlxalq inteqrasiya yolunda mühüm mərhələ keçib. Bunun nəticəsidir ki, ölkəmizdə beynəlxalq səviyyəli tədbirlərin təşkil olunması ənənəvi hal alıb. Millət vəkili qeyd edib ki, siyasi mahiyyətli tədbirlərlə yanaşı, mədəniyyət və idman xaraekterli beynəlxalq tədbirlərin keçirilməsi də ölkəmizin Avropaya daha yaxından tanıdılması və özünə layiqli yer tutması baxımdan çox faydalıdır: “Azərbaycan 2011-ci ildə Birləşmiş Millətlər Təşkilatının (BMT) Təhlükəsizlik Şurasına iki illik qeyri-daimi üzv seçildi. Ən ali beynəlxalq qurumun üzvü seçilməsi isə ölkəmizə bir sıra mühüm üstünlüklər qazandırdı. TŞ üzvü olaraq beynəlxalq hüquq normalarının müdafiəsi, hüququn aliliyinin qorunması prosesində aktiv iştirakı, demokratik yanaşması Azərbaycana kifayət qədər yaxın tərəfdaş qazandırdı. Ümumiyyətlə, Azərbaycanın BMT ilə yaxın əməkdaşlıq münasibətləri var və bu əlaqələr inkişaf edən dinamizmə malikdir”.

Ölkəmiz BMT-də fəal iştirak edir

Millət vəkili hesab edir ki, Azərbaycanın xarici siyasət coğrafiyası getdikcə genişlənir: “Afrika və Latın Amerikası ölkələrində səfirliklərimiz, nümayəndəliklərimiz açılmaqdadır. Bununla da Azərbaycan beynəlxalq əməkdaşlıq imkanlarını artırır. Vurğulanmalıdır ki, İslam Əməkdaşlıq Təşkilatı, Birləşmiş Millətlər Təşkilatı kimi qlobal əhəmiyyət daşıyan təşkilatlara üzvlük Azərbaycana illərlə məruz qaldığı haqsızlıqlara qarşı aktiv mübarizə imkanı yaratdı. Dünya ictimaiyyəti Azərbaycan həqiqətləri ilə yaxından tanış ola bildi. Biz hər zaman problemlərin beynəlxalq qanunvericiliklə həll olunmasını istəyirik. Azərbaycanın ərazisi toxunulmazdır və bölünməzdir. Beynəlxalq hüquqda təsbit olunmuş bütün vasitələrdən istifadə etməklə öz ərazi bütövlüyünü bərpa etmək ölkəmizin milli təhlükəsizlik siyasətinin ən mühüm vəzifəsidir”.

İkitərəfli münasibətlər

Parlamentarinin sözlərinə görə, Azərbaycanın xarici siyasətinin prioritetlərindən biri də ikitərəfli münasibətlərin formalaşdırılmasıdır: “Bu münasibətlər ikitərəfli formatda siyasi, iqtisadi, mədəni və başqa sahələrdə əməkdaşlığın qurulmasına əsaslanır. Bizim üçün əsas olan amil münasibətlərdə milli marağın və bərabərhüquqlu əlaqələrin yaradılmasıdır”.

Azərbaycanın NATO ölkələri ilə münasibətlərinə də toxunan E.Nəsirov bildirib ki, Azərbaycan NATO üzvü olan Türkiyənin önəmli tərəfdaşlarından biridir. Bunun ən böyük nümunəsi iki qardaş ölkə arasında 2021-ci ilin 15 iyun tarixində imzalanan “Şuşa bəyannaməsi”dir. Bütün sahələri özündə ehtiva edən sənəddə Azərbaycan üçün ən önəmli sahələrdən biri də hərbi əməkdaşlıq haqqında müttəfiqlikdir. Məlum olduğu kimi, Türkiyə Silahlı Qüvvələri dünyanın ən qabaqcıl ordularından biridir. Xüsusilə qeyd etmək lazımdır ki, NATO kimi nüfuzlu hərbi alyansın ən qüdrətli ikinci ordusu ilə hərbi müttəfiqlik müstəqilliyimizin təminatçısı yolunda böyük uğurdur”.

Azərbaycan beynəlxalq enerji təchizatçısı kimi

Parlament üzvü onu da əlavə edib ki, Azərbaycan regionda ən strateji nəqliyyat-kommunikasiyalarına, enerji dəhlizlərinə malik ölkədir: “Zəngin təbii ehtiyatlarımız ölkəmizin inkişafı və milli rifahının təmin olunması üçün ən mühüm amillərdən biri kimi çıxış edir. Bu isə özlüyündə bizi həm də beynəlxalq əhəmiyyətli enerji mənbəyi və beynəlxalq enerji təchizatı şəbəkəsinin mühüm tərkib hissəsinə çevirir. Azərbaycanın və tərəfdaş ölkələrin iqtisadiyyatlarına xüsusi üstünlüklər qazandıran beynəlxalq əhəmiyyətli nəqliyyat və kommunikasiya dəhlizlərinin inkişaf etdirilməsi, neft və qaz boru kəmərlərinin inşası region ölkələrinin əməkdaşlığının bariz nümunəsidir. Azərbaycan regionda genişmiqyaslı enerji-kommunikasiya dəhlizlərinin davamını gətirən qərarlar qəbul edir”.

Deputat İlham Əliyevin fevralın 14-də parlamentdə keçirilən andiçmə mərasimində çıxışına diqqət çəkərək bildirib ki, ölkə başçısı həmin çıxışda ölkəmizin artıq yeni bir tarixi dövrə daxil olduğunu vurğuladı: “Dövlət başçısı qeyd etdi ki, artıq biz bir dövrü başa çatdırdıq. Ərazi bütövlüyümüzü və suverenliyimizi tam və qəti təmin etmək bizim strateji vəzifəmiz idi. Bu vəzifə uğurla həyata keçirildi. Tarixi zəfərə imza atdıq, tarixi ədaləti bərpa etdik. Bundan sonra biz yeni dövrə daxil olmuşuq və yeni dövrə daxil olarkən qarşımızda dayanan əsas hədəflərdən biri ordu quruculuğu, ordumuzun daha da gücləndirilməsi, hərbi potensialımızın daha da artırılması, büdcədən hərbi müdafiə sahəsində ayrılmaların daha da inkişaf etdirilməsi dayanır. Çünki mövcud dünya düzəni onu göstərir ki, güclüsənsə, haqlısan. Və bu gün güc faktoru beynəlxalq siyasətdə mühüm rol oynayır”, -deyə Elman Nəsirov fikirlərini yekunlaşdırıb.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Azərbaycan Respublikasının dünya birliyinə inteqrasiyası, region ölkələri və digər dövlətlərlə, beynəlxalq təşkilatlarla əməkdaşlığının inkişaf etdirilməsi” istiqaməti üzrə hazırlanmışdır

Paylaş:

Baxılıb: 918 dəfə