Menendez getdi, Kardin gəldi...

Bakı:

11 °C

71 %

7 m/s

Əlaqə

AZ RU EN

Ana səhifə / Siyasət / Menendez getdi, Kardin gəldi...

Menendez getdi, Kardin gəldi...

03.08.2024 [11:10]

Erməni xorunun yeni “solisti” 2 “məktub” yazıb

Ölkəmizə qarşı illərdir aramsız və əsassız iddialar irəli sürən, beynəlxalq arenada Azərbaycana qarşı kampaniyalar təşkil etmək istəyən qüvvələr Cənubi Qafqazda formalaşan yeni situasiya ilə razılaşmaq istəmir. Yeni eskalasiyalar axtarışında olan erməni lobbisi bu və ya digər şəkildə yalan təbliğatını aparmağa çalışır, sülh prosesinə mane olmaqla yanaşı, həm də Azərbaycana qarşı mənfi münasibəti yaratmağa cəhd göstərir. Ağlasığmaz və beynəlxalq hüquqa zidd addımlar atmaqla, hətta qeyri-adekvat “təşkilatlar” yaratmaqla hazırkı situasiyaya qarşı cəbhə açırlar - məsələn, “Dağlıq Qarabağ qaçqınlarının hüquqlarının müdafiəsi” adlı saxta təşkilat kimi. 30 ilə yaxın işğal etdiyi Azərbaycan torpaqlarında ermənilərin apardığı vandal siyasətə qarşı hər hansı bir etiraz etməyən, kəndlərimizin-şəhərlərimizin dağıdılmasına göz yuman, tarixi-mənədi irsimizin dağıdılmasını sükutla qarşılayanlar hazırda yalan təbliğatla özünü ortaya atır, ləğv edilmiş separatizmi dəstəkləyir.

Lobbinin yeni “züytutanı”

Bu saxta “təşkilat” adından UNESCO təşkilatına ünvanlanan məktubda guya Azərbaycan torpaqlarındakı “çoxəsrlik erməni mədəni irsinin” məhv olması vurğulanır, işğaldan azad edilən ərazilərdə xristian abidələrini “qorumağa” çağırış edilir. Bu tipli başqa bir yalan “müraciət” isə Roma Papası Fransiskə ünvanlanıb - bu məktubda da “beynəlxalq ictimaiyyəti erməni qaçqınlarına təcili humanitar yardım göstərməyə və onların təhlükəsizliyini, şəxsiyyətini və öz torpaqlarına qayıtmaq üçün fundamental hüquqlarını təmin etməyə” çağırış əks olunub.

Hər zaman olduğu kimi, bu dəfə də erməni lobbisinə “züy tutmaq” həvəsinə düşənlər tapılıb. Məsələn, separatizmə dəstək verən bu qondarma təşkilatla yanaşı, amerikalı senator Benjamin (Ben) Kardin də bu qeyri-hüquqi prosesə qoşulub. Analoji addım isə ermənidən artıq erməni olmağa cəhd göstərən ABŞ Senatının beynəlxalq münasibətlər üzrə komitəsinin yeni sədrinin ilk belə davranışı deyil - o, artıq neçənci dəfədir ki, Azərbaycanı hədəfə alır. Bu dəfə bir az da irəli gedərək kollektiv Qərbi Azərbaycanın Ermənistan torpaqlarını “işğal” etməsinə səssiz qalmaqda ittiham edib. O, iddia edib ki, həmin ərazilər Ermənistan üçün strateji əhəmiyyət kəsb edir. “Mübaliğəsiz, Azərbaycan Ermənistanın strateji hissəsini işğal edir. Beynəlxalq ictimaiyyət tərəfindən çox böyük təlaş görmürəm”, - Kardin Senatın xarici əlaqələr üzrə komitəsində keçirilən dinləmələrdə deyib.

Rusiyalı miqrant necə Rusiyaya qarşı düşmən oldu?

Kimdir Ben Kardin? Rusiyadan ABŞ-a miqrasiya etmiş yəhudi əsilli bu şəxs bütün dünyada anti Rusiya mövqeyi ilə seçilir - o, rusiyalı məmurların ABŞ-a girişinə qadağa qoyulmasını təklif edib. 26 aprel 2010-cu ildə Kardin müvafiq bəyanatı adların siyahısı ilə birlikdə Dövlət Katibi Hillari Klintona təqdim edib. Siyahıda Rusiyanın Daxili İşlər Nazirliyi, FSB, Federal Vergi Xidməti, Arbitraj Məhkəməsi, Baş Prokurorluq və Daxili İşlərin İcra Baş İdarəsinin 60 vəzifəli şəxsinin adı, habelə onlarla bağlı məlumatlar yer alıb. Ben Kardin və Nümayəndələr Palatasının Büdcə Komitəsinin yüksək rütbəli üzvü S. Levin Cekson-Venik düzəlişinin ləğv edilməsinə qarşı çıxıblar. Onlar Rusiya ilə ticarəti dayandırmaq kimi təkliflər irəli sürüblər. Kardin rüşvət almaqda ittiham olunan ermənipərəst senator Bob Menendezin xələfidir - o, Demokrat partiyasından Merilend ştatından senator seçilib. Kardin əvvəllər Nümayəndələr Palatasının üzvü, 2007-ci ildən isə Senatın Xarici Əlaqələr Komitəsinin üzvü olub. Menendezin həbsindən sonra isə onu komitə sədri vəzifəsində əvəzləyib

Moskvaya qarşı erməni aləti

Kardinin fəallığı həm də ABŞ-ın anti-Rusiya siyasətində Ermənistandan alət kimi istifadə etməsi ilə əlaqələndirilir. Xatırladaq ki, bir müddət öncə ABŞ dövlət katibinin Avropa və Avrasiya məsələləri üzrə köməkçisi Ceyms O’Brayn məhz Senatın Xarici Əlaqələr Komitəsinin dinləmələrində çıxış edərək bildirmişdi ki, ABŞ Ermənistanın Rusiya ilə ənənəvi möhkəm münasibətlərindən uzaqlaşması üçün şərait yaratmağa çalışır. Beləliklə, Kardinin hansı məqsədlərlə separatizmə dəstək verməsi, başqa sözlə canfəşanlığı üzə çıxır. ABŞ siyasətçisi bu dəfə ölkəsinin Rusiyaya qarşı oyununun “qurbanı” seçilib. Faktlar da deyilənləri təsdiqləyir - B.Kardin ötən ayın əvvəlində ermənipərəst konqresmenlərdən ibarət heyətin tərkibində Ermənistanda səfərdə olub. Prosesdə onun “fərqləndirilməsi” isə səbəbsiz deyil - B.Kardin amerikalı konqresmenlər arasında qatı ermənipərəst mövqeyi ilə seçilir və bu işdə heç də korrupsioner Menendezdən geri qalmır. Hətta onun işğal dövründə dəfələrlə Qarabağdakı separatçı hərəkata dəstək verməsi faktı, Azərbaycanda insan haqlarının vəziyyəti ilə bağlı əsassız, qərəzli bəyanatları da mövcuddur.

Bob “nümunəsi”...

Yuxarıda da qeyd etdiyimiz kimi belə ermənipərəst “hücumların” əsasında Azərbaycanın bölgədə formalaşdırdığı yeni siyasi durum dayanır. Yeni reallıqları qəbul etmək istəməyən erməni lobbisi Menendez və Kardin kimilərdən istifadə etməklə beynəlxalq aləmi çaşdırmaq istəyir. Erməni lobbisi və onun dəstəkçiləri qlobal dünyada müsbət imici ilə fərqlənən, yeni dövrdə mühüm siyasi aktora çevrilmiş Azərbaycana qarşı bu kimi qərəzli addımları ilə hansısa nəticəyə ümid edirlər - onlar Azərbaycanın öz ərazi bütövlüyünü və suverenliyini bərpa etməsi faktı ilə barışmaq istəmirlər. Azərbaycan isə son 4 ildə özünün ərazi bütövlüyünü və suverenliyini bərpa etməklə yanaşı həm də qlobal dünyada sülhün, demokratiyanın keçşikçisi, neokolonializmə qarşı mübarizənin öncüllərindən biri kimi tanınıb. Bütün dünya etiraf edir ki, müasir dünyada kolonializmə qarşı mübarizə deyiləndə Bakı Təşəbbüs Qrupunun fəaliyyəti, Azərbaycanın səyləri ön plana çıxır. Bunun nəticəsidir ki, Azərbaycan beynəlxalq etimada layiq görülüb - COP29 kimi beynəlxalq əhəmiyyətli tədbirə ev sahibliyi məhz Bakıya həvalə edilib. Bu qərarı isə bütün dünya - bütövlükdə, Qərb, ABŞ və hətta Ermənistanın özü də dəstəkləyib. Belə çıxır ki, ABŞ qanunverici orqanında komitə sədri vəzifəsini tutan şəxs kimi Kardin ölkəsinin mövqeyinə zidd yanaşma sərgiləyir - bu isə həm də o deməkdir ki, Kardin kimiləri üçün erməni lobbisinin maraqları ABŞ-ın dövlət maraqlarından öndə gəlir. Amma öz sələfi - Menendezin taleyi Kardin üçün bir nümunə olmalıdır. Menendezin səlahiyyətlərindən sui-istifadə etməsi, Azərbaycana qarşı əsassız kampaniyalar aparması və erməni lobbisinin maraqlarına əsir düşməsi axırda bəlli sonluqla nəticələndi - onun rüşvətxor əməlləri, oğurluq faktları, erməni himayədarları ilə şəxsi maraqlar üzərində qurulmuş birgə fəaliyyəti ifşa edildi. Bu aqibət Kardin üçün də nümunə sayılmalıdır...

S.İSMAYILZADƏ

Paylaş:

Baxılıb: 671 dəfə