ABŞ ilə Azərbaycan arasında hərbi-texniki əməkdaşlığın istiqamətləri barədə geniş fikir mübadiləsi aparılıb

Bakı:

15 °C

77 %

3 m/s

AZ RU EN

Ana səhifə / Siyasət / ABŞ ilə Azərbaycan arasında hərbi-texniki əməkdaşlığın istiqamətləri barədə geniş fikir mübadiləsi aparılıb

ABŞ ilə Azərbaycan arasında hərbi-texniki əməkdaşlığın istiqamətləri barədə geniş fikir mübadiləsi aparılıb

07.08.2013 [09:05]

Azərbaycan Respublikasının müdafiə naziri, general-polkovnik Səfər Əbiyev ABŞ-ın müdafiə naziri Çak Heygelin dəvəti ilə Vaşinqtonda səfərdədir.
Müdafiə Nazirliyinin mətbuat xidmətindən AzərTAc-a bildiriblər ki, nazir S.Əbiyev əvvəlcə “Arlinqton” xiyabanını ziyarət edərək Naməlum əsgərin məzarı önünə əklil qoyub.
Sonra müdafiə naziri Pentaqona gəlib.
Nazir Səfər Əbiyev Pentaqonun giriş qapısında düzülmüş fəxri qarovul dəstəsi və ABŞ müdafiə naziri Çak Heygel tərəfindən təntənəli surətdə qarşılanıb.
Görüşdə Azərbaycan ilə ABŞ arasında strateji tərəfdaşlıq münasibətlərinin müxtəlif aspektlərinə toxunan nazir Səfər Əbiyev əlaqələrin qurulmasında və inkişafında Azərbaycanın praktiki addımlarının xüsusi önəmi olduğunu qeyd edib. O bildirib ki, ABŞ ilə Azərbaycan arasında müdafiə sahəsində bir sıra proqramlar üzrə əməkdaşlığın davam etdirilməsi istiqamətində müsbət nəticələr əldə olunub.
Nazir ölkəmizin 2014-cü ildən sonra da Əfqanıstandakı əməliyyatlara töhfə verəcəyini vurğulayıb və artıq bu niyyətin NATO tərəfindən dəstəkləndiyini həmkarının diqqətinə çatdırıb. Səfər Əbiyev beynəlxalq terrorizmə qarşı mübarizədə səylərin birləşdirilməsinin və beynəlxalq koalisiya əməliyyatlarında birgə iştirakın verdiyi töhfələrin əməkdaşlığın möhkəmləndirilməsində böyük əhəmiyyət kəsb etdiyini bildirib.
Avratlantik təhlükəsizliyə töhfə kontekstində Azərbaycanın həyata keçirdiyi işlərdən danışan Səfər Əbiyev bu sahədə enerji, nəqliyyat, rabitə və digər regional layihələrin də strateji əməkdaşlığın inkişaf etdirilməsində mühüm amilə çevrildiyini vurğulayıb.
Cənubi Qafqaz regionunda hərbi-siyasi vəziyyət barədə söhbət açan müdafiə naziri bildirib ki, Azərbaycan torpaqları 20 ildir ki, işğal altındadır. ABŞ və beynəlxalq təşkilatlar Ermənistan-Azərbaycan, Dağlıq Qarabağ münaqişəsinə münasibətdə beynəlxalq hüquq normalarına əsaslanaraq təcavüzkarla işğala məruz qalan tərəfi fərqləndirmirlər. Ermənistanın işğalçı siyasəti nəticəsində Azərbaycanda bir milyondan artıq insan öz ölkəsində qaçqın və məcburi köçkün vəziyyətinə düşüb. Çox təəssüf ki, beynəlxalq təşkilatlar və aparıcı dövlətlər tərəfindən bu günədək Ermənistanın işğalçı ölkə olduğu bəyan edilməyib.
Səfər Əbiyev bu məsələdə 907-ci düzəlişin indiyədək aradan qaldırılmamasının yaratdığı problemləri və bunun ABŞ-ın xarici siyasəti ilə ziddiyyət təşkil etdiyini xüsusi vurğulayıb.
Nazir Səfər Əbiyev Dağlıq Qarabağ münaqişəsinin həll edilmədiyi və Azərbaycan torpaqlarının işğaldan azad olunmadığı təqdirdə bütövlükdə regionda gərgin hərbi-siyasi vəziyyətin davam edəcəyini amerikalı həmkarının diqqətinə çatdırıb.
Görüş zamanı ABŞ-ın müdafiə naziri Çak Heygel müdafiə naziri Səfər Əbiyevin fikirləri ilə razılaşdığını bildirib və Azərbaycanın dostu olaraq bundan sonra da ölkələrarası strateji əməkdaşlığın inkişaf etdirilməsi və möhkəmləndirilməsinə səy göstərəcəyini vurğulayıb.
Daha sonra nazirlər ölkələrimiz arasında hərbi-texniki əməkdaşlığın istiqamətləri barədə geniş fikir mübadiləsi aparıblar.
Çak Heygel müdafiə nazirindən Azərbaycan Respublikasının Prezidentinə salamlarını çatdırmasını xahiş edib.
Görüşün sonunda Azərbaycan Respublikasının müdafiə naziri Səfər Əbiyev ABŞ müdafiə naziri Çak Heygelə Azərbaycana rəsmi səfərə dəvət məktubunu təqdim edib.
Ç.Heygel dəvəti məmnuniyyətlə qəbul etdiyini bildirib.
Azərbaycan Respublikasının müdafiə naziri Səfər Əbiyevin həmin gün ABŞ hərbi dəniz qüvvələrinin komandanı ilə də görüşü olub.
Söhbət zamanı Xəzərin təhlükəsizliyi və hər iki ölkənin hərbi dəniz qüvvələri arasında əməkdaşlığın hazırkı vəziyyəti və inkişaf perspektivləri ətrafında müzakirələr aparılıb.
Hər iki görüşdə Azərbaycanın ABŞ-dakı səfiri Elin Süleymanov iştirak edib.