“Milli Olimpiya Komitəsi ilə kütləvi informasiya vasitələri arasında əməkdaşlığın inkişaf etdirilməsi” mövzusunda konfrans keçirilib

Bakı:

24 °C

61 %

3 m/s

AZ RU EN

Ana səhifə / Siyasət / “Milli Olimpiya Komitəsi ilə kütləvi informasiya vasitələri arasında əməkdaşlığın inkişaf etdirilməsi” mövzusunda konfrans keçirilib

“Milli Olimpiya Komitəsi ilə kütləvi informasiya vasitələri arasında əməkdaşlığın inkişaf etdirilməsi” mövzusunda konfrans keçirilib

14.11.2013 [09:45]

Dünən Milli Olimpiya Komitəsində (MOK) bu qurumla Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun birgə təşkilatçılığı ilə “Milli Olimpiya Komitəsi ilə kütləvi informasiya vasitələri arasında əməkdaşlığın inkişaf etdirilməsi” mövzusunda konfrans keçirilib. Konfransda Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli, Milli Olimpiya Komitəsinin vitse-prezidenti Çingiz Hüseynzadə, Azərbaycan Mətbuat Şurasının sədri Əflatun Amaşov, media orqanlarının baş redaktorları və digər qonaqlar iştirak ediblər. Konfrans iştirakçılarını salamlayan Çingiz Hüseynzadə tədbirin əhəmiyyətindən bəhs edərək, Azərbaycanda idmanın dinamik inkişaf etdiyini və bu sahəyə yüksək diqqət olduğunu vurğulayıb. İdmanın inkişafının mediada işıqlandırılmasının da mühüm önəm kəsb etdiyini diqqətə çatdırıb. Daha sonra çıxış üçün söz alan Vüqar Səfərli müsabiqənin keçirilməsinin məqsədindən söz açıb. Qeyd edib ki, burada başlıca məqsəd, Azərbaycanda idmanın və Olimpiya Hərəkatının inkişafının KİV-lərdə təbliğini daha da genişləndirmək və bu sahədə peşəkar idman jurnalistlərinin yaradıcılığını keyfiyyətcə yeni mərhələyə qaldırmaqdır. V.Səfərli müsabiqəyə 27 yazının təqdim olunduğunu bildirib: “Müsabiqəyə daxil olan yazılar kodlaşdırılaraq münsiflərə təqdim edilib. İdman spesfik sahə olduğundan yazıların qiymətləndirilməsi sırf bu sahə üzrə ekspertlərə həvalə olunub”.
V.Səfərli müsabiqə arxada qaldığından yazıları qiymətləndirən ekspertlərin adlarını da açıqlayıb: “Müsabiqədə yazıları qiymətləndirən ekspertlər Bakı Gənclər və İdman Baş İdarəsinin rəisi Raqif Abbasov, “Təhsil” respublika İdman Sağlamlıq Mərkəzinin baş direktoru Cəfər Hümbətov, Gənclər və İdman Nazirliyinin Elmi Araşdırmalar Mərkəzinin rəhbəri Qədəmşah Sadıxov olub”.
Konfrans iştirakçılarına tədbirdə iştirak edən media orqanlarının baş redaktorlarını təqdim etdikdən sonra, çıxış üçün söz ekspertlərə verilib.
Ekspertlərdən Raqif Abbasov müsabiqəyə təqdim olunan yazıların qiymətləndirmə meyarlarından danışıb. İdman jurnalistikasının mövcud durumuna toxunan natiq bu sahənin inkişafından da geniş bəhs edib.
Cəfər Hümbətov və Qədəmşah Sadıxov da müsabiqəyə təqdim olunan yazılar barədə öz fikirlərini bildiriblər. Azərbaycan Mətbuat Şurasının sədri Ə.Amaşov isə Azərbaycan bayrağını zirvələrə qaldıran idmançılarımızın uğurlarının bütün xalq tərəfindən böyük rəğbətlə qarşılandığını və hər bir azərbaycanlını sevinc hisslərinə qərq etdiyini bildirib. O, bu qəbildən olan tədbirlərin jurnalistlərin, o cümlədən idman yazarlarının yaradıcılığına müsbət təsir göstərdiyini də xüsusi olaraq vurğulayıb. Digər çıxış və təkliflərdən sonra müsabiqənin qaliblərini mükafatlandırma mərasimi keçirilib.
Belə ki, müsabiqədə birinci yer “Mövqe” qəzetinin müxbiri Mübariz Bayramova təqdim edilib. 2-ci yerin qalibi “İdmançı” qəzetinin redaktoru Dilqəm Quliyev, 3-cü yerin qalibi isə “Olimpiya dünyası” qəzetinin şöbə müdiri Anar Əhmədov olub. “Palitra” qəzetinin müxbiri Anar Miriyev, “525-ci qəzet”in yayım üzrə direktoru İlqar Tağıyev, “Təhsil Problemləri” qəzetinin müxbiri Dilşad Yusifova, “Olimpiya dünyası” qəzetinin şöbə müdiri Aysel Sultanova, “Zaman-Azərbaycan” qəzetinin müxbiri Əziz Mustafayev, “Xalq sözü” qəzetinin baş redaktoru (İmişli rayonu) Səməd İsmayılov, “Futbol+qol” qəzetinin baş redaktoru Fariz Vəliyev isə həvəsləndirici mükafata layiq görülüblər.

Paylaş:

Baxılıb: 1098 dəfə