Azərbaycan ilə Niderland arasında əlaqələrin dinamik inkişafından məmnunluq ifadə olunub

Bakı:

27 °C

46 %

3 m/s

Əlaqə

AZ RU EN

Ana səhifə / Siyasət / Azərbaycan ilə Niderland arasında əlaqələrin dinamik inkişafından məmnunluq ifadə olunub

Azərbaycan ilə Niderland arasında əlaqələrin dinamik inkişafından məmnunluq ifadə olunub

26.04.2014 [12:00]

Aprelin 25-də Milli Məclisin sədri Oqtay Əsədov Azərbaycanda səfərdə olan Niderland Krallığı Senatının üzvü Rene Van der Lindenin başçılıq etdiyi nümayəndə heyəti ilə görüşüb.
AzərTAc xəbər verir ki, görüşdə Oqtay Əsədov son illərdə Azərbaycan ilə Niderland arasında müxtəlif sahələrdə inkişaf edən əməkdaşlıqdan və dostluq münasibətlərindən danışıb. Sədr ötən il Azərbaycan Respublikasının Prezidenti İlham Əliyevin müvafiq Sərəncamına uyğun olaraq Rene Van der Lindenin “Dostluq” ordeni ilə təltif edilməsini dostluğumuzun ən gözəl nümunəsi kimi qiymətləndirib.
Yaxın günlərdə Bakıda Azərbaycan-Niderland biznes forumunun keçirildiyini xatırladan O.Əsədov ölkələrimiz arasında iqtisadi əlaqələrin genişlənməsində biznes forumların əhəmiyyətini qeyd edib. O, münasibətlərin inkişafı üçün yeni sənədlərin imzalanmasının və hüquqi bazanın daha da möhkəmləndirilməsinin vacibliyinə toxunub.
Milli Məclisin sədri qeyd edib ki, sürətlə inkişaf etməkdə olan Azərbaycanın ən ağrılı problemi Ermənistan-Azərbaycan, Dağlıq Qarabağ münaqişəsidir. Biz münaqişənin Azərbaycanın ərazi bütövlüyü, beynəlxalq hüququn norma və prinsipləri çərçivəsində həllinin tərəfdarıyıq. Lakin Ermənistan beynəlxalq təşkilatların münaqişənin həlli ilə bağlı qəbul etdiyi sənədlərə məhəl qoymur. Bununla əlaqədar işğalçı dövlətə heç bir sanksiya tətbiq edilmir.
O.Əsədov Dağlıq Qarabağ probleminin nizamlanması məsələsində ölkəmizin ədalətli mövqeyini dəstəklədiyinə və AŞ PA kimi mötəbər bir qurumun sədri olduğu dövrdə Cənubi Qafqazda, xüsusən Dağlıq Qarabağ ətrafında baş verən hadisələrlə bağlı həqiqətləri söyləməkdən heç vaxt çəkinmədiyinə görə Rene Van der Lindenə təşəkkürünü bildirib.
Rene Van der Linden Azərbaycana yenidən səfər etməsindən, dostluq münasibətləri və çox yaxşı əlaqələrin olmasından məmnunluğunu ifadə edib. Qonaq Azərbaycana səfərləri çərçivəsində keçirdiyi görüşləri xatırlayaraq ölkəmizdə gedən inkişafdan məmnunluqla danışıb. O, ölkəmizdəki hərtərəfli inkişafı iqtisadi yüksəlişin göstəricisi kimi dəyərləndirib, Azərbaycan ilə Niderland arasında iqtisadi, biznes, təhsil, mədəniyyət və digər sahələrdə əməkdaşlığın genişləndirilməsi üçün yaxşı imkanların olduğunu bildirib.
Niderland Senatının üzvü Ermənistan-Azərbaycan, Dağlıq Qarabağ münaqişəsinin ədalətli həllinə nail olunacağına inandığını deyib.
Görüşdə qarşılıqlı maraq doğuran məsələlər ətrafında fikir mübadiləsi aparılıb.

Paylaş:

Baxılıb: 788 dəfə