Türkdilli Ölkələrin Parlament Assambleyasının növbəti iclası Qazaxıstanda keçiriləcək

Bakı:

25 °C

56 %

4 m/s

Əlaqə

AZ RU EN

Ana səhifə / Siyasət / Türkdilli Ölkələrin Parlament Assambleyasının növbəti iclası Qazaxıstanda keçiriləcək

Türkdilli Ölkələrin Parlament Assambleyasının növbəti iclası Qazaxıstanda keçiriləcək

14.06.2014 [10:38]

Türkdilli Ölkələrin Parlament Assambleyasının (TürkPA) növbəti iclası Qazaxıstanda keçiriləcək.
AzərTAc xəbər verir ki, bu barədə iyunun 13-də Bakıda TürkPA-nın V plenar iclasının yekunları ilə bağlı keçirilmiş brifinqdə məlumat verilib.
Türkiyə Böyük Millət Məclisinin sədri Cəmil Çiçək TürkPA-ya üzv dövlətlər arasında əlaqələrin daha da dərinləşdirilməsinin vacibliyini qeyd edib. Bildirilib ki, birgə səylər nəticəsində qurumun fəaliyyət istiqamətləri daha da genişləndirilməlidir.
Cəmil Çiçək vurğulayıb ki, fərqli coğrafi mövqelərdə yerləşsək də əlaqələrimiz tarixi köklərə söykənir. TürkPA bu əlaqələri daha da möhkəmləndirmək, ortaq dəyərlərimizi gələcək nəsillərə ötürmək kimi vacib bir vəzifəni öz üzərinə götürüb. O, qeyd edib ki, TürkPA dövlət başçılarının zirvə görüşlərində aldıqları ortaq qərarları parlamentlər səviyyəsində daha da gücləndirmək və xalqı təmsil edən insanlar olaraq bu qərarların tezliklə reallaşdırılması məqsədilə iradə birliyini ortaya qoymaq üçün münbit şərait yaradır.
Türkiyə Böyük Millət Məclisinin sədri Qazaxıstanda reallaşacaq iclasa qədər V iclasda verilən tövsiyələrin böyük bir qisminin yerinə yetiriləcəyinə və bu qurumun daha da təkmilləşəcəyinə əmin olduğunu deyib.
Qırğızıstan Respublikası Jogorku Keneşinin sədri Asilbek Jeenbekov tədbirin yüksək səviyyədə təşkilinə görə Azərbaycan tərəfinə təşəkkürünü bildirib. O, məlumat verib ki, iclasda çox əhəmiyyətli qərarlar qəbul edilib, maraqlı müzakirələr aparılıb. Türkdilli ölkələr arasında əlaqələrin gücləndiyini və dərinləşdiyini deyən sədr TürkPA-nın fəaliyyətinin xalqlarımız arasındakı münasibətlərin daha da sıxlaşmasına gətirib çıxaracağını qeyd edib.
Qazaxıstan Respublikası Parlamenti Məclisinin sədri Kabibulla Djakupov vurğulayıb ki, TürkPA-nın fəaliyyəti gələcəkdə daha da genişlənəcək. O, deyib ki, qurumda fəaliyyət göstərən komissiyalara ekologiya komissiyası da daxil edilib. Gələcəkdə türkdilli ölkələrin Xəzər dənizinin ekoloji vəziyyəti mövzusunda məsələlər də müzakirə olunacaq.
Azərbaycan Respublikası Milli Məclisinin sədri Oqtay Əsədov qeyd edib ki, TürkPA-nın artıq ikinci dövrü başlayır. Birinci dövrdə qurum olduqca böyük nailiyyətlər əldə edib. Çox yaxında TürkPA-nın tərkibi daha da artacaq.
Oqtay Əsədov V plenar iclasın çox səmərəli keçdiyini bildirib, qarşılıqlı maraq doğuran bir sıra məsələlər ətrafında fikir mübadilələri aparıldığını vurğulayıb.

Paylaş:

Baxılıb: 844 dəfə