San-Marinonun “L’İnformazione” qəzetinin oxucuları Azərbaycan həqiqətləri barədə məlumatlandırılıb

Bakı:

22 °C

60 %

4 m/s

AZ RU EN

Ana səhifə / Siyasət / San-Marinonun “L’İnformazione” qəzetinin oxucuları Azərbaycan həqiqətləri barədə məlumatlandırılıb

San-Marinonun “L’İnformazione” qəzetinin oxucuları Azərbaycan həqiqətləri barədə məlumatlandırılıb

12.11.2015 [10:06]

Azərbaycanın İtaliya, San-Marino və Maltadakı səfirliyinin müşaviri Vüqar Hacıyev San-Marinonun “L’İnformazione” qəzetinə müsahibəsində ölkələrimiz arasındakı əlaqələr, Azərbaycan həqiqətləri və digər məqamlar barədə danışıb.
V.Hacıyev cari ilin sentyabrında San-Marinonun xarici işlər naziri Paskal Valentininin Bakıya səfərini xatırladıb. Bildirib ki, səfər çərçivəsində Azərbaycanın xarici işlər naziri Elmar Məmmədyarov ilə görüşdə hökumətlərimiz arasında diplomatik və xidməti pasportlara malik şəxslərin viza tələbindən azad edilməsi haqqında Saziş, gəlirlərə və əmlaka görə vergilərə münasibətdə ikiqat vergitutmanın aradan qaldırılması barədə Konvensiya imzalanıb. Bu sənədlər əlaqələrimizin genişlənməsinə töhfə verəcək, yeni iqtisadi təşəbbüslər üçün stimul yaradacaq. Ümumiyyətlə, ölkələrimizin rəsmilərinin qarşılıqlı səfərləri siyasi əlaqələrin yüksək səviyyədə olduğunu göstərir. Eyni zamanda, iqtisadiyyat, turizm və digər sektorlarda əməkdaşlığımızın genişləndirilməsi üçün yaxşı potensial var.
Diplomat Ermənistan-Azərbaycan, Dağlıq Qarabağ münaqişəsi barədə də məlumat verib. O deyib ki, BMT Təhlükəsizlik Şurasının Ermənistan silahlı qüvvələrinin Azərbaycanın işğal olunmuş ərazilərindən dərhal, tamamilə və qeyd-şərtsiz çıxarılmasını tələb edən qətnamələri, digər beynəlxalq təşkilatların münaqişənin həlli ilə bağlı sənədləri var. Ermənistanın yürütdüyü təcavüzkar siyasət regionun inkişafına əngəl törədir. Bu problemin həlli üçün beynəlxalq birliyin dəstəyi çox önəmlidir.
Azərbaycandakı sürətli iqtisadi inkişafdan danışan diplomat vurğulayıb ki, inkişafın davamlılığı üçün kompleks strategiyalar həyata keçirilir. Hazırda iqtisadiyyatın şaxələndirilməsi və qeyri-neft sektorunun tərəqqisi diqqət mərkəzindədir. Uzunmüddətli davamlı iqtisadi inkişafı təmin etmək üçün elmi potensialın və innovativ fəaliyyətlərin dəstəklənməsinə böyük önəm verilir. Azərbaycan önəmli geostrateji nöqtədə yerləşir. Bu baxımdan ölkəmizdə eyni zamanda, nəqliyyat, logistik infrastrukturların inkişafına böyük əhəmiyyət verilir. Belə ki, Ələt qəsəbəsindəki Yeni Bakı Beynəlxalq Dəniz Ticarət Liman Kompleksinin, Bakı-Tbilisi-Qars dəmir yolu xəttinin istifadəyə verilməsi ilə dəniz ticarətinin, dəmir yolu şəbəkəsinin genişləndirilməsi prosesi həyata keçiriləcək.
Diqqətə çatdırılıb ki, Azərbaycanda gənclər sahəsinə də böyük diqqət var. Azərbaycanlı gənclərin xaricdə təhsil almaları üçün qəbul olunmuş dövlət proqramı uğurla icra olunur. Proqram çərçivəsində 2 min 612 tələbəmiz xaricdə təhsil almaq imkanı əldə ediblər.

Paylaş:

Baxılıb: 764 dəfə