“Parlament-2015” Koalisiyası Milli Məclisə seçkilərin monitorinqinə dair yekun hesabatını açıqlayıb

Bakı:

24 °C

60 %

3 m/s

AZ RU EN

Ana səhifə / Siyasət / “Parlament-2015” Koalisiyası Milli Məclisə seçkilərin monitorinqinə dair yekun hesabatını açıqlayıb

“Parlament-2015” Koalisiyası Milli Məclisə seçkilərin monitorinqinə dair yekun hesabatını açıqlayıb

24.11.2015 [10:12]

Bu il noyabrın 1-də Azərbaycan Respublikası Milli Məclisinə keçirilmiş seçkilərdə səsvermə prosesinə hazırlıq, səsvermə, səslərin sayılması və protokollaşdırılması şəffaflıq gözlənilməklə, qanun pozuntularına yol verilmədən həyata keçirilib.
Bu fikir “Parlament-2015” Seçki Monitorinq Koalisiyasının Milli Məclisə seçkilərin monitorinqinə dair yekun hesabatında yer alıb.
Hesabatın “Namizədlərin irəli sürülməsi və qeydiyyatı” bölməsində bildirilir ki, namizədlər üçün imza toplanması zamanı hər hansı ciddi qanun pozuntuları baş verməyib. İnzibati resurslardan istifadə, qanunsuz müdaxilə, hər hansı namizədin xeyrinə seçici imzalarının verilməsi üçün xüsusi göstəriş və ya tapşırıqların verilməsi halları müşahidə edilməyib. İmza toplanması və onların dairə seçki komissiyalarında (DSK) yoxlanılması zamanı meydana çıxan narazılıqlar qanuna müvafiq surətdə və tezliklə araşdırılıb aradan qaldırılıb, imza vərəqələrindəki çatışmazlıqlar səbəbindən qeydə alınmayan namizədlərə lazımi izahatlar verilib.
Eyni zamanda, namizədlərin qeydiyyatı prosesində aşkarlığın və şəffaflığın təmin olunması məqsədilə dairə seçki komissiyaları tərəfindən müvafiq qərarlar qəbul edildikcə bütün namizədlər haqqında məlumatlar Mərkəzi Seçki Komissiyasının (MSK) internet səhifəsində yerləşdirilib və vaxtaşırı yenilənib.
Şikayətlərə MSK-da və məhkəmələrdə vaxtında və obyektiv baxılıb. Bəzi dairə seçki komissiyalarının qərarları ləğv edilib, namizədlərin hüquqları bərpa olunub.
Hesabatın “Siyasi partiyalar və seçki blokları” bölməsində qeyd edilir ki, seçkilər öncəsi siyasi partiyaların Bakıda və bölgələrdə fəaliyyəti üçün tam demokratik şərait yaradılıb. Müşahidələr göstərir ki, seçkilər ərəfəsində siyasi partiyaların Bakıda və əyalətlərdə toplaşmaq və sərbəst fəaliyyət imkanlarına hər hansı məhdudiyyət qoyulmayıb.
Hesabatın “Təşviqat kampaniyası” bölməsində bildirilir ki, namizədlərin seçicilərlə görüşləri üçün təşviqat kampaniyasının aparılması üçün bütün şərait yaradılıb. Təşviqatın səmərəli təşkili məqsədilə ölkədə 117 seçki dairəsi üzrə 128 açıq və 128 qapalı yer ayrılıb. Eyni zamanda, seçicilərlə onların yaşayış yerləri üzrə görüşlər üçün geniş imkanlar təmin edilib. Namizədlər bu imkandan bərabər şəkildə istifadə edib, ayrılan yerlərdə seçicilərlə ünsiyyət zamanı heç bir məhdudiyyət və pozuntular qeydə alınmayıb.
Hesabatda, həmçinin qeyd olunub ki, seçkinin əsas subyektlərindən biri olan KİV-lərə seçki prosesinin bütün mərhələlərində iştirak üçün geniş imkanlar yaradılıb. Seçkiqabağı təşviqat prosesi ilə bağlı olaraq MSK-ya 23 agentlik,19 qəzet, 3 televiziya və radio müraciət edib və onlar seçki təşviqatı prosesində iştirak ediblər. KİV-lərin seçki komissiyalarında, səsvermə prosesində iştirakına və seçkinin, səsvermənin gedişini izləməsinə hər hansı müdaxilə və ya məhdudiyyət faktı qeydə alınmayıb.
Koalisiya bildirir ki, monitorinq aparılmış bütün dairə və məntəqə seçki komissiyalarının fəaliyyəti qanunvericiliyin tələblərinə uyğun qaydada təşkil edilib, müxtəlif siyasi partiyaların nümayəndələri və bitərəflər komissiyalarda təmsil olunub. Dairə seçki komissiyaları yeni və ya əsaslı təmir edilmiş binalarda yerləşdirilib, zəruri texnika və avadanlıqla təchiz edilib. Məntəqə seçki komissiyaları da öz fəaliyyətini düzgün qurub. Aşağı komissiya üzvləri üçün təlimlər keçirilib. Seçici siyahıları təkmilləşdirilib, hər hansı texniki səhv aşkarlanmayıb.
Seçki bülletenlərinin doldurulması və şəffaf qutulara salınması prosesi zamanı monitorinq aparılmış seçki məntəqələrinin əksəriyyətində hər hansı qanun pozuntusu müşahidə edilməyib. Seçicilər sərbəst şəkildə səs veriblər. Onların iradəsinin əleyhinə olaraq, seçki komissiyalarının üzvləri, müşahidəçilər və ya digər seçki iştirakçıları tərəfindən hər hansı müdaxilə halına rast gəlinməyib. Ayrı-ayrı namizədlərin müşahidəçiləri və məşvərətçi səs hüquqlu məntəqə seçki komissiyaları üzvləri üçün tam şərait yaradılıb, onların səsvermə prosesini izləməsinə heç bir maneçilik müşahidə edilməyib.
“Parlament-2015” Seçki Monitorinq Koalisiyası ölkənin 5 qeyri-hökumət təşkilatı - Beynəlxalq Münasibətlərin Araşdırılması Mərkəzi, Qarabağ Araşdırılmalar Mərkəzi, İqtisadi və Sosial İnkişaf Mərkəzi, Tətbiqi Tədqiqatlar Fondu, Azərbaycan Tələbələr Birliyi tərəfindən yaradılıb. Koalisiya 118 seçki dairəsi üzrə 1361 məntəqədə seçki prosesinin monitorinqini aparıb.

Paylaş:

Baxılıb: 660 dəfə