Azərbaycan ilə Türkiyə arasında nümunəvi tərəfdaşlıq münasibətləri mövcuddur

Bakı:

20 °C

73 %

4 m/s

Əlaqə

AZ RU EN

Ana səhifə / Siyasət / Azərbaycan ilə Türkiyə arasında nümunəvi tərəfdaşlıq münasibətləri mövcuddur

Azərbaycan ilə Türkiyə arasında nümunəvi tərəfdaşlıq münasibətləri mövcuddur

28.11.2015 [11:32]

Azərbaycanın xarici işlər naziri Elmar Məmmədyarov noyabrın 27-də türkiyəli həmkarı Mövlud Çavuşoğlunun rəhbərlik etdiyi nümayəndə heyəti ilə görüşüb.
Elmar Məmmədyarov Azərbaycan rəsmilərinin ilk səfərlərini Ankaraya, Türkiyə rəsmilərinin isə Bakıya etməsinin xoş bir ənənə olduğunu diqqətə çatdırıb. Nazir iki qardaş ölkə arasında əlaqələrin inkişaf etməsinin və bütün sahələrdə nümunəvi tərəfdaşlıq münasibətlərinin mövcudluğunun məmnunluq doğurduğunu qeyd edib. Strateji səviyyədə inkişaf edən tərəfdaşlığın bariz nümunəsi kimi Azərbaycanın və Türkiyənin qlobal əhəmiyyətə malik enerji və nəqliyyat layihələrinin həyata keçirilməsinə imza atdıqlarını deyən E.Məmmədyarov tezliklə fəaliyyətə başlayacaq Bakı-Tbilisi-Qars dəmir yolu layihəsinin bu sıradan növbəti uğurlu təşəbbüslərdən biri olduğunu deyib.
Nazir noyabrın 1-də keçirilmiş parlament seçkiləri ilə əlaqədar qardaş Türkiyə xalqını təbrik edib.
Cənubi Qafqaz regionundakı vəziyyətə toxunan E.Məmmədyarov Ermənistan-Azərbaycan münaqişəsinin rəsmi Yerevanın işğalçı və qeyri-konstruktiv mövqeyinə görə həll edilmədiyini və bunun regionda sülh və təhlükəsizlik üçün başlıca maneə olduğunu diqqətə çatdırıb. O, münaqişənin həll edilməsi üçün ilk növbədə Ermənistanın işğalçı qüvvələrinin zəbt olunmuş Azərbaycan ərazilərindən çıxarılmalı olduğunu deyib. Nazir ATƏT-in Minsk qrupunun həmsədrləri adından Rusiyanın münaqişənin həlli ilə əlaqədar təklifləri Ermənistana təqdim etdiyini söyləyib.
Mövlud Çavuşoğlu xarici işlər naziri vəzifəsində ilk rəsmi səfərini qardaş Azərbaycana etməsindən məmnunluğunu bildirib. O, bu yaxınlarda Antalyada keçirilmiş G20 Zirvə toplantısında Azərbaycanın iştirakı və aparılan müzakirələrə töhfəsinin Türkiyə tərəfindən yüksək qiymətləndirildiyini qeyd edib. Türkiyəli nazir öz növbəsində noyabrın 1-də keçirilmiş uğurlu parlament seçkiləri münasibətilə Azərbaycan xalqını təbrik edib. O, üçtərəfli əsasda Azərbaycan-Gürcüstan-Türkiyə, Azərbaycan-Türkmənistan-Türkiyə və Azərbaycan-İran-Türkiyə formatının regional əməkdaşlığın inkişafında mühüm rol oynadığını bildirib.
Terrorizmin bütün dünya üçün bəla olduğunu deyən M.Çavuşoğlu ona qarşı mübarizədə ikitərəfli təmasların daha da artırılmasının vacibliyini qeyd edib. O, regionun nəqliyyat infrastrukturunun inkişafında mühüm rola malik olan Bakı-Tbilisi-Qars dəmir yolu xəttinin tezliklə fəaliyyətə başlayacağına əminliyini ifadə edib.
Görüşdə beynəlxalq təşkilatlar çərçivəsində əməkdaşlıq, qarşılıqlı maraq doğuran digər regional və qlobal məsələlər ətrafında fikir mübadiləsi aparılıb.

Paylaş:

Baxılıb: 775 dəfə