AHİK ilə Beynəlxalq Əmək Təşkilatı arasında əlaqələrin genişləndirilməsi müzakirə edilib

Bakı:

18 °C

94 %

2 m/s

Əlaqə

AZ RU EN

Ana səhifə / Siyasət / AHİK ilə Beynəlxalq Əmək Təşkilatı arasında əlaqələrin genişləndirilməsi müzakirə edilib

AHİK ilə Beynəlxalq Əmək Təşkilatı arasında əlaqələrin genişləndirilməsi müzakirə edilib

26.01.2016 [10:14]

Yanvarın 25-də Azərbaycan Həmkarlar İttifaqları Konfederasiyasının (AHİK) sədri, Beynəlxalq Həmkarlar İttifaqları Konfederasiyasının vitse-prezidenti, Milli Məclisin deputatı Səttar Mehbalıyev Beynəlxalq Əmək Təşkilatının (BƏT) Transmilli Korporasiyalar və Müəssisələrlə İş Departamentinin rəhbəri xanım Githa Roelansın başçılıq etdiyi nümayəndə heyəti ilə görüşüb.
AHİK-in mətbuat xidmətindən AZƏRTAC-a bildiriblər ki, S.Mehbalıyev həmkarlar ittifaqlarının tarixi haqqında qonaqlara məlumat verib.
Ötən ilin noyabrında həmkarlar ittifaqlarının 110 illiyinin qeyd olunduğunu bildirən sədr deyib ki, zəngin ənənələrə malik Azərbaycan həmkarlar hərəkatı bir sıra mərhələlərdən keçib. O, Azərbaycanda əmək hüquqlarının qorunmasında, işçilərin sosial məsələlərinin həllində həmkarlar ittifaqlarının çox mühüm rolunun olduğunu qeyd edib.
AHİK sədri deyib ki, Ümummilli lider Heydər Əliyevin təşəbbüsü ilə 1994-cü ildə qəbul olunmuş “Həmkarlar ittifaqları haqqında” Qanun üzvlərin əmək hüquqlarının daha mütəşəkkil qorunması, onların sosial və digər problemlərinin həlli üçün möhkəm hüquqi baza yaradıb. Təsadüfi deyil ki, Azərbaycan qanunvericiliyinə həmkarlar ittifaqları ilə bağlı 25-dən artıq əlavə və dəyişiklik edilib.
Beynəlxalq əlaqələrdən söhbət açan AHİK-in sədri vurğulayıb ki, Azərbaycan müstəqilliyini bərpa etdikdən sonra xarici əlaqələrin inkişafına böyük önəm verir. Ötən il AHİK sədrinin Beynəlxalq Həmkarlar İttifaqları Konfederasiyasının (BHİK) vitse-prezidenti, sonra BHİK-in Pan-Avropa Regional Şurasının vitse-prezidenti seçilməsi bunun bariz nümunəsidir.
Diqqətə çatdırılıb ki, AHİK bir çox ölkələrin həmkarlar ittifaqları ilə, ölkəmizdə fəaliyyət göstərən transmilli təşkilatlarla əməkdaşlıq edir, onların təcrübəsindən yararlanır. Sədr ölkəmizdə fəaliyyət göstərən 50-dən artıq transmilli təşkilatın 25-də həmkarlar ittifaqının yaradıldığını və bu sahədə problemlərin də az olmadığını bildirib. Bir çox transmilli şirkətlərdə həmkarlar ittifaqının yaradılması yolunda ciddi maneələrin, əngəllərin mövcudluğunu vurğulayan sədr diqqətə çatdırıb ki, belə neqativ halların aradan qaldırılmasında BƏT-in köməyinə ehtiyac var.
BƏT-in Transmilli Korporasiyalar və Müəssisələrlə İş Departamentinin rəhbəri Githa Roelans AHİK-BƏT münasibətlərinin bundan sonra da inkişaf edəcəyinə, yaranmış işgüzar əlaqələrin daha da genişlənəcəyinə əminliyini ifadə edib. O qeyd edib ki, işçilərin sosial hüquqlarının qorunmasında BƏT də maraqlıdır və bu istiqamətdə məqsədyönlü iş aparır. Xanım G.Roelans qaldırılan məsələlərin həll edilməsində BƏT-in öz köməyini əsirgəməyəcəyini bildirib.
Görüşdə qarşılıqlı fikir mübadiləsi aparılıb.

Paylaş:

Baxılıb: 587 dəfə