Elin Süleymanov: Qafqazda münaqişənin sülh yolu ilə tənzimlənməsi bütün dünyada sülhün bərqərar olmasına kömək edəcək

Bakı:

20 °C

88 %

4 m/s

AZ RU EN

Ana səhifə / Siyasət / Elin Süleymanov: Qafqazda münaqişənin sülh yolu ilə tənzimlənməsi bütün dünyada sülhün bərqərar olmasına kömək edəcək

Elin Süleymanov: Qafqazda münaqişənin sülh yolu ilə tənzimlənməsi bütün dünyada sülhün bərqərar olmasına kömək edəcək

15.04.2016 [10:08]

Amerikada çıxan “The Daily Caller” qəzetində Azərbaycanın ABŞ-dakı səfiri Elin Süleymanovun “Qafqazda münaqişənin sülh yolu ilə tənzimlənməsi bütün dünyada sülhün bərqərar olmasına kömək edəcək” sərlövhəli məqaləsi dərc olunub. Azərbaycanın Dağlıq Qarabağ bölgəsində, Ermənistanın işğalçı qoşunları ilə Azərbaycan ordusunun təmas xəttində yaxın vaxtlarda silahlı münaqişənin eskalasiyasından bəhs edilən bu məqalədə beynəlxalq hüquq normalarının və müvafiq öhdəliklərin yerinə yetirilməsinin, erməni qoşunlarının Azərbaycanın işğal edilmiş ərazilərindən çıxarılmasının və bölgədə ardıcıl olaraq sülhün bərqərar olmasının zəruriliyi vurğulanır.
Müəllif yazır ki, atəşkəs rejimini Ermənistan pozub, Azərbaycan ordusu isə ona layiqli cavab verib. Bundan bir neçə gün sonra Azərbaycan atəşi birtərəfli qaydada dayandırmasını elan edib, ABŞ və digər qərb ölkələri Azərbaycanın bu addımını tam dəstəkləyiblər. Lakin Ermənistan atəşin dayandırılması haqda təklifi yalnız iki gün keçəndən, Rusiyanın bu məsələyə müdaxiləsindən sonra qəbul edib.
Diplomat daha sonra yazır ki, indi beynəlxalq birlik Ermənistanı atəşkəs rejiminə riayət etməyə, öz işğalçı qoşunlarını Azərbaycandan çıxarmağa və konstruktiv danışıqlara başlamağa çağırmalıdır. Bütün dünyada etnik münaqişələrin çoxaldığı indiki vaxtda Dağlıq Qarabağ münaqişəsinin tənzimlənməsi xüsusi əhəmiyyət kəsb edir. E.Süleymanov vurğulayır ki, əgər Ermənistan və Azərbaycan bu münaqişəni sülh yolu ilə tənzimləyə bilsə, bu, başqa regionlarda çoxdan davam edən münaqişələrin də həllinə kömək edəcək.
Səfir daha sonra yazır ki, erməni qoşunları Azərbaycan Prezidenti İlham Əliyevin Vaşinqtonda 50-dən çox dövlətin liderinin toplaşdığı, dünyada sülhün və təhlükəsizliyin möhkəmləndirilməsi məsələlərinin müzakirə olunduğu Nüvə Təhlükəsizliyi Sammitində iştirak etmək üçün Vaşinqtona uğurlu səfəri başa çatandan dərhal sonra hücuma keçiblər. Təəssüf ki, bu eskalasiya zamanı Ermənistanın davranışı onun son 30 ildəki davranışından fərqlənmir. Ermənistanın hərəkətləri nəticəsində münaqişə uzanıb və hər iki tərəfdən təxminən 30 min nəfər həlak olub. Ermənistan qoşunları Azərbaycanın Xocalı şəhərini yerlə yeksan ediblər. Bu zaman 600-dən çox kişi, qadın və uşaq qətlə yetirilib. E.Süleymanov qeyd edir ki, Ermənistan BMT Təhlükəsizlik Şurasının dörd qətnaməsinə məhəl qoymadan işğalı davam etdirir. Diplomat beynəlxalq birliyə müraciətlə status-kvo-nun dəyişdirilməsi üçün mümkün tədbirləri görməyə çağırır. O vurğulayır ki, bu münaqişənin tənzimlənməsi regionun geniş iqtisadi inkişafına şərait yaradacaq.

Paylaş:

Baxılıb: 771 dəfə