Belçikanın Azərbaycandakı fövqəladə və səlahiyyətli səfiri ilə görüş keçirilib

Bakı:

26 °C

45 %

4 m/s

Əlaqə

AZ RU EN

Ana səhifə / Siyasət / Belçikanın Azərbaycandakı fövqəladə və səlahiyyətli səfiri ilə görüş keçirilib

Belçikanın Azərbaycandakı fövqəladə və səlahiyyətli səfiri ilə görüş keçirilib

24.01.2017 [10:08]

Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri, Beynəlxalq Humanitar Yardım üzrə Respublika Komissiyasının sədri Əli Həsənov yanvarın 23-də Belçika Krallığının ölkəmizdəki fövqəladə və səlahiyyətli səfiri Bert Skufsunla görüşüb.
Azərbaycan-Belçika ikitərəfli əlaqələrinin uğurla inkişaf etdiyini, ölkələrimiz arasında ticarət, təhsil və digər sahələrdə mövcud olan əlaqələrin daha da möhkəmləndirilməsi üçün yaxşı potensialın olduğunu deyən Əli Həsənov səfirin fəaliyyəti dövründə bütün sahələrdə əməkdaşlığın genişləndirilməsinin vacibliyini vurğulayıb.
Görüşdə Əli Həsənov qeyd edib ki, ölkəmiz böyük uğurlar qazanaraq beynəlxalq aləmdə yüksək nüfuz sahibi olub. Bu gün Azərbaycan demokratik və bəşəri dəyərlərin bərqərar olduğu məkan, dünya birliyinin layiqli üzvü, davamlı inkişaf edən, dayanıqlı iqtisadiyyata malik ölkədir. Sözsüz ki, bu uğurlara Prezident İlham Əliyevin Ümummilli liderimiz Heydər Əliyevin inkişaf strategiyasına əsaslanan, düşünülmüş və uzaqgörən siyasəti nəticəsində nail olunub.
O həmçinin qeyd edib ki, Prezident İlham Əliyevin uzaqgörən siyasəti və gərgin fəaliyyəti nəticəsində bu gün Azərbaycan dünyanın ən dinamik inkişaf edən dövlətlərindən birinə çevrilib.
Ermənistan-Azərbaycan, Dağlıq Qarabağ münaqişəsi, problemin tarixi kökləri və yaranma səbəbləri barədə məlumat verən Baş nazirin müavini bildirib ki, Azərbaycan Ermənistanın hərbi təcavüzünə məruz qalmış və bunun nəticəsində ərazilərimizin 20 faizi - tarixi torpaqlarımız olan Dağlıq Qarabağ və ətrafdakı 7 rayon işğal olunmuş, bu ərazilərdə etnik təmizləmə siyasəti aparılmış və bir milyondan artıq insan qaçqın və məcburi köçkün vəziyyətinə düşmüşdür.
Əli Həsənov deyib ki, beynəlxalq təşkilatlar münaqişə ilə bağlı öz mövqeyini bildirmişlər. BMT Təhlükəsizlik Şurasının erməni silahlı qüvvələrinin Azərbaycanın işğal olunmuş ərazilərindən qeyd-şərtsiz və dərhal çıxarılması ilə bağlı 4 qətnaməsi, ATƏT, Avropa Şurasının Parlament Assambleyası, İslam Əməkdaşlıq Təşkilatı, Qoşulmama Hərəkatı və digər beynəlxalq təşkilatların müvafiq qərar və qətnamələri vardır. Lakin işğalçı Ermənistan beynəlxalq hüquq normalarına məhəl qoymur, beynəlxalq təşkilatların qərarlarına riayət etmir. Ermənistan sülh istəmir, status-kvonun dəyişilməz qalmasına çalışır, buna görə də münaqişə həll olunmur. İndiki status-kvonun davam etməsi Ermənistanı böyük regional layihələrdən kənarda saxlayır, iqtisadi tənəzzülünü daha da sürətləndirir. Azərbaycan Prezidenti münaqişənin danışıqlar yolu ilə həllinə tərəfdar olduğunu dəfələrlə bəyan edib və bu istiqamətdə siyasi iradə və ardıcıl mövqe nümayiş etdirir.
Azərbaycanda səfir təyin olunmasından məmnunluğunu ifadə edən Bert Skufs hələ 2012-ci ildə Azərbaycanda olduğunu, ölkəmizin və Bakının gözəlliyinin, həmçinin xalqımızın səmimiliyinin onu valeh etdiyini deyib.
Fəaliyyətinin əsas məqsədinin ölkələrimiz arasında yaxşı münasibətləri davam etdirmək olacağını vurğulayan səfir hər iki ölkənin maraqları daxilində iqtisadi əməkdaşlıq imkanlarını araşdırmaq istiqamətində də səylərini əsirgəməyəcəyini qeyd edib. Belçika şirkətlərinin Azərbaycanda bir çox sahələrdə fəaliyyət göstərdiklərini qeyd edən səfir Bert Skufs ölkəsinin iş adamlarının Azərbaycan şirkətləri ilə işləməyə hər zaman açıq olduqlarını bildirib.
Diplomat Azərbaycanın sürətli inkişafını, ölkəmizin beynəlxalq aləmdə nüfuzunun daha da artdığını xüsusi vurğulayıb, ölkə Prezidenti cənab İlham Əliyev tərəfindən təsdiq edilmiş Strateji Yol Xəritəsi ilə tanış olduğunu və bunun gələcəkdə uğurla həyata keçiriləcəyinə ümidvar olduğunu bildirib.
O, eyni zamanda, ölkəsinin Ermənistan-Azərbaycan, Dağlıq Qarabağ münaqişəsinin sülh yolu ilə həlli istiqamətində səylərini əsirgəməyəcəyini vurğulayıb.

Paylaş:

Baxılıb: 564 dəfə