Ermənistanın qeyri-konstruktiv mövqeyinin bir səbəbi də Sarkisyanın şəxsi ambisiyalarıdır

Bakı:

24 °C

57 %

7 m/s

Əlaqə

AZ RU EN

Ana səhifə / Siyasət / Ermənistanın qeyri-konstruktiv mövqeyinin bir səbəbi də Sarkisyanın şəxsi ambisiyalarıdır

Ermənistanın qeyri-konstruktiv mövqeyinin bir səbəbi də Sarkisyanın şəxsi ambisiyalarıdır

07.02.2017 [10:01]

ABŞ-ın Ermənistandakı səfiri Riçard Mils Sarkisyan rejimini ifşa edən reallığı dilə gətirib
Azərbaycan Dağlıq Qarabağ münaqişəsinin həlli istiqamətində qətiyyətli mövqe nümayiş etdirir. Torpaqlarımızın azad edilməsi uğrunda prinsipial mövqe sərgiləyən ölkəmiz diplomatik cəbhədə də mühüm nailiyyətlər əldə edib və dünya ictimaiyyəti - ayrı-ayrı milli dövlətlər və beynəlxalq təşkilatlar münaqişənin həllinin zəruriliyini bəyan edirlər.
Bununla yanaşı, Azərbaycan Ermənistanın münaqişənin həllinə maneə yaratmağa hesablanmış təxribatçı hərəkətlərinin qarşısını alır. Bu baxımdan aprel döyüşlərinin nəticəsi həm də bir çox məqamlara yenidən aydınlıq gətirdi. Bir daha bəlli oldu ki, Azərbaycan öz torpaqlarını işğaldan azad etmək qüdrətinə sahibdir, həmçinin işğalçılıq siyasəti Ermənistanı uçuruma aparır.
Yeri gəlmişkən, ABŞ-ın Ermənistandakı səfiri Riçard Mils Ermənistandakı Amerika Ticarət Palatasındakı çıxışı zamanı bu məqamlara toxunub. O qeyd edib ki, apreldəki 4 günlük müharibə zamanı və ondan sonrakı dövrdə gedən ictimai müzakirələr korrupsiyanın milli təhlükəsizliyə aşındırıcı təsir göstərə biləcəyini üzə çıxardı və məsələni ictimaiyyətin diqqət mərkəzinə gətirdi. Səfirin fikrincə, Dağlıq Qarabağ münaqişəsinin həll olunmaması korrupsiyanı gücləndirir, çünki o (münaqişə - red), Ermənistan sərhədlərini bağlı saxlayır. Onun sözlərinə görə, sərhədlər bağlı olanda güclü biznes adamları və digərləri üçün iqtisadi bazarları nəzarət altında və rəqabətdən kənar saxlamaq asan olur.
Göründüyü kimi, ABŞ-ın Ermənistandakı səfiri bu açıqlama ilə Sarkisyan rejimini ifşa edib. İşğalçılıq siyasəti Ermənistanı uçuruma aparsa da, Sarkisyan rejimi bununla sərhədlərin bağlı qalmasına nail olmaqla korrupsiyanın daha da çiçəklənməsinə və öz şəxsi ambisiyalarının təmin olunmasına çalışır.
Məsələyə münasibət bildirən Milli Məclisin Beynəlxalq münasibətlər və parlamentlərarası əlaqələr komitəsinin sədr müavini, YAP-ın Beynəlxalq əlaqələr şöbəsinin müdiri Sevinc Fətəliyeva qeyd edib ki, ABŞ-ın Ermənistandakı səfirinin fikirləri reallığı ifadə edir: “Ermənistanda hakimiyyətdə olan hərbi xunta Dağlıq Qarabağ münaqişəsinin həllində maraqlı deyil, çünki bununla Sarkisyan rejimi öz mövcudluğunu və korrupsioner sistemini qoruyub saxlayır. Əlbəttə, bu amil sadə Ermənistan vətəndaşları üçün böyük fəlakət mənbəyidir. Çünki Dağlıq Qarabağ münaqişəsinin mövcudluğu səbəbindən işğalçı Ermənistan regionda bütün layihələrdən təcrid olunub - blokada vəziyyətindədir, faktiki olaraq uçuruma sürüklənir. Sarkisyan rejimi isə Ermənistanın yox, öz gələcəyini düşünür. Sarkisyan üçün Ermənistan vətəndaşlarının durumundan çox öz şəxsi ambisiyaları daha önəmlidir, ona görə də o, sərhədlərin bağlı qalmasına və ölkəsinin tənəzzülə uğramasına səbəb olan Dağlıq Qarabağ münaqişəsinin həllini istəmir”.
Milli Məclisin deputatı Azər Badamov isə deyib ki, Azərbaycan Dağlıq Qarabağ münaqişəsinin həlli istiqamətində fəallıq nümayiş etdirsə də, Ermənistan qeyri-konstruktiv mövqe sərgiləyir: “Ermənistan rəhbərliyi münaqişənin həlli prosesini uzatmaq və ya bu prosesə mane olmaq üçün gah təxribatçı hərəkətlərə əl atır, gah da danışıqlardan yayınmağa çalışır. Sarkisyan rejimi bu amildən öz şəxsi maraqlarını - korrupsiyaya söykənən biznesini qorumaq üçün istifadə etsə də, bu hal Ermənistan üçün ciddi tənəzzülü şərtləndirir. Ermənistanın iqtisadi tənəzzülünün, regionda blokada vəziyyətində olmasının başlıca səbəbi onun işğalçılıq siyasətidir. Ermənistanda keçirilən mitinqlər zamanı vətəndaşları bu məqamları səsləndirir, Sarkisyanı istefaya dəvət edirlər. Amma görünən odur ki, Sarkisyan öz rejimini qorumaq üçün ölkəsini qurban verməyə razıdır”.
Nurlan QƏLƏNDƏRLİ

Paylaş:

Baxılıb: 526 dəfə