"Heydər Əliyev. Müstəqilliyimiz əbədidir" çoxcildliyinin 28-ci cildi çapdan çıxıb

Bakı:

12 °C

54 %

12 m/s

Əlaqə

AZ RU EN

Ana səhifə / Siyasət / "Heydər Əliyev. Müstəqilliyimiz əbədidir" çoxcildliyinin 28-ci cildi çapdan çıxıb

"Heydər Əliyev. Müstəqilliyimiz əbədidir" çoxcildliyinin 28-ci cildi çapdan çıxıb

30.09.2009 [15:46]

“Mənəviyyat ən yüksək insani keyfiyyətdir. İnsanlar mənəviyyatı əsrlər boyu qoruyub saxlayıblar. Bu heç də o demək deyil ki, keçmiş zamanlarda hamı yüksək mənəviyyata malik olub, amma mənəviyyatsızlar olmayıbdır. Yox. İnsan cəmiyyəti belədir ki, mənəviyyatlı ilə mənəviyyatsız arasında daim mübarizə gedir. çünki mənəviyyatsızlıq cəmiyyətə zərbələr vurur, insanları pozur. Amma mənəviyyat insanları yüksəldir. Mənəviyyatlı çalışır ki, mənəviyyatsızlıq olmasın. Ancaq bu çətindir, ağırdır. Eyni zamanda, hər bir şəxs düşünməli, dərk etməlidir ki, onun üçün bu dünya daimi deyil. Bu dünya heç kim üçün daimi deyildir. Hamı bu dünyaya gəlir, hamı bu dünyadan gedir. Biri çox yeyir, biri az yeyir. Birinin var dövləti çox olur, o birininki az olur. Amma hamının yeri oradadır və orada da hamı bərabərdir. O dünyada hamı bərabərdir. Ona görə də bu dünyada yaşayan insanlar birinci növbədə yüksək mənəviyyata malik olmalıdırlar və bunu qorumalıdırlar. çünki həyatda belə amillər var ki, bəzən insanları özlərinin xəbəri olmadan da düz yoldan çəkirlər. Ona görə də onlar özlərini qorumalıdırlar”. Bu sətirlər “Heydər Əliyev. Müstəqilliyimiz əbədidir” çoxcildliyinin “Azərnəşr” tərəfindən yenicə çapdan buraxılmış 28-ci cildindən - Ulu öndər Heydər Əliyevin 2000-ci il iyunun 19-da Azərbaycan Tibb Universitetinin 70 illiyinə həsr olunmuş təntənəli yubiley mərasimindəki nitqindən götürülüb.
Nəşrin buraxılışına məsul Azərbaycan Prezidenti Administrasiyasının rəhbəri akademik Ramiz Mehdiyevdir. Müasir Azərbaycan dövlətinin qurucusu, xalqımızın ümummilli lideri Heydər Əliyevin 2000-ci il iyunun 3-də Xətai rayonunda “Azərneftyağ” İstehsalat Birliyinin işçiləri üçün tikilmiş yeni yaşayış binalarının istifadəyə verilməsi münasibətilə keçirilən mərasimdəki nitqi ilə başlayan cilddə 2000-ci ilin 3 iyunundan 2 iyulunadək dövrdəki nitqləri, çıxışları, bəyanatları, müsahibələri, məktubları, müraciətləri, təbrik teleqramları və s. daxil edilib.
Kitabda Ulu öndərin “Xəzərneftqaz-2000” Beynəlxalq sərgi-konfransda dərin məzmunlu nitqi, Tehranda İqtisadi Əməkdaşlıq Təşkilatının üzvü olan ölkələrin dövlət və hökumət başçılarının VI zirvə görüşündə, həmçinin Moskvada MDB ölkələrinin dövlət başçılarının növbəti zirvə görüşündə dövlət və hökumət nümayəndələri ilə apardığı danışıqlar, nüfuzlu informasiya vasitələrinə verdiyi bəyanat və müsahibələr, ikitərəfli münasibətlərin daha da möhkəmləndirilməsi və genişləndirilməsindən bəhs edən materiallar toplanıb.
Bütün cildlərdə olduğu kimi, bu cilddəki materiallarda da ümummilli liderin Dağlıq Qarabağ probleminin həlli və münaqişənin nizama salınması ilə əlaqədar ortaya qoyduğu ölkəmizin prinsipial mövqeyi öz əksini tapıb. Görkəmli dövlət xadimi 2000-ci il iyunun 10-da İqtisadi Əməkdaşlıq Təşkilatının üzvü olan ölkələrin dövlət və hökumət başçılarının VI zirvə görüşündəki nitqində dediyi sözlər buna bariz nümunədir: “Azərbaycan Ermənistanla sülhə nail olmaq və əməkdaşlıq etmək niyyətindədir. Lakin bu əməkdaşlıq Azərbaycanın ərazi bütövlüyü bərpa edildikdən, qaçqınlar öz daimi yaşayış yerlərinə qayıtdıqdan sonra ola bilər. Azərbaycan Dağlıq Qarabağa Azərbaycan Respublikası tərkibində ən yüksək özünüidarəetmə statusu verməyə hazırdır. Bizim bu mövqeyimiz Avropada Təhlükəsizlik və Əməkdaşlıq Təşkilatına üzv olan ölkələrin başçılarının 1996-cı ildə Lissabonda keçirilmiş Sammitində münaqişənin sülh yolu ilə həlli üçün əsas olan üç məlum prinsipdə öz əksini tapıb. Dünya ölkələrinin birgə səyləri Ermənistana sübut etməlidir ki, münaqişənin Ermənistan və Azərbaycanın ərazi bütövlüyünü qarşılıqlı surətdə tanımaq əsasında sülh yolu ilə həll edilməsinə alternativ yoxdur”.
AzərTAc-ın materialları əsasında hazırlanmış çoxcildliyin bu kitabına da “Qeydlər”, “Şəxsi adlar göstəricisi”, “Coğrafi adlar göstəricisi” daxil edilib.

Paylaş:

Baxılıb: 1131 dəfə