Azərbaycan–Ukrayna dostluq münasibətləri

Bakı:

26 °C

53 %

5 m/s

Əlaqə

AZ RU EN

Ana səhifə / YAP xəbərləri / Azərbaycan–Ukrayna dostluq münasibətləri

Azərbaycan–Ukrayna dostluq münasibətləri

27.04.2026 [17:37]

Toğrul Zeynalov

YAP Ağdam rayon təşkilatının əməkdaşı

Prezident İlham Əliyevin Ukrayna Prezidenti Volodimir Zelenskinin 2026-cı il aprelin 25-də Azərbaycana səfəri zamanı mətbuata verdiyi bəyanat Azərbaycan–Ukrayna münasibətlərinin hazırkı səviyyəsini və inkişaf perspektivlərini hərtərəfli şəkildə əks etdirən mühüm siyasi sənəd kimi diqqəti cəlb edir.Prezident İlham Əliyev çıxışında vurğuladı ki, iki ölkə arasında əlaqələr uzunmüddətli dostluq ənənələrinə, qarşılıqlı hörmətə və beynəlxalq hüququn norma və prinsiplərinə sadiqliyə əsaslanır. Cənab Prezident Azərbaycanın Ukraynanın suverenliyi və ərazi bütövlüyünə daim dəstək verdiyini bir daha bəyan edərək, bu mövqenin ölkəmizin xarici siyasətində prinsipial və dəyişməz xətt təşkil etdiyini qeyd etdi. Görüş zamanı siyasi dialoqun daha da genişləndirilməsi, yüksək səviyyəli təmasların davam etdirilməsi və beynəlxalq platformalarda qarşılıqlı dəstəyin gücləndirilməsi məsələləri geniş müzakirə olundu. Xüsusilə son dörd il ərzində prezidentlər səviyyəsində keçirilmiş yeddi görüşün, o cümlədən iki ay əvvəl Münxen şəhərində baş tutmuş son görüşün münasibətlərin dinamik inkişafından xəbər verdiyi diqqətə çatdırıldı. Bu fakt iki ölkə arasında etimad mühitinin yüksək səviyyədə olduğunu və strateji tərəfdaşlığın möhkəm təməllər üzərində qurulduğunu bir daha təsdiqləyir.

Bəyanatda iqtisadi, sənaye və texnoloji əməkdaşlıq istiqamətləri xüsusi yer tutdu. Cənab Prezident bildirdi ki, həm Azərbaycanda, həm də Ukraynada hərbi sənaye kompleksinin inkişafı birgə istehsal üçün geniş və real imkanlar yaradır və bu istiqamətdə əməkdaşlıq perspektivləri olduqca ümidvericidir. Bununla yanaşı, ümumilikdə sənaye sahəsində kooperasiyanın genişləndirilməsi, innovativ texnologiyaların tətbiqi, birgə müəssisələrin yaradılması və qarşılıqlı investisiya qoyuluşlarının artırılması məsələlərinin də ətraflı müzakirə edildiyi vurğulandı. Enerji sahəsində əməkdaşlıq xüsusi önəm kəsb edərək, Azərbaycanın Avropanın enerji təhlükəsizliyində oynadığı rol və Ukrayna ilə bu istiqamətdə əməkdaşlığın genişləndirilməsi imkanları diqqətə çatdırıldı. Eyni zamanda, nəqliyyat və logistika sahəsində, xüsusilə Orta Dəhliz çərçivəsində əməkdaşlıq perspektivləri yüksək qiymətləndirildi və Azərbaycanın artan tranzit potensialının region üçün strateji əhəmiyyət daşıdığı qeyd olundu. Humanitar sahədə əməkdaşlıq, o cümlədən təhsil, mədəniyyət və sosial layihələr vasitəsilə xalqlar arasında əlaqələrin möhkəmləndirilməsi də əsas prioritetlər sırasında göstərildi. Cənab Prezident qarşılıqlı hörmət və maraqların təmin olunması prinsiplərinin əməkdaşlığın əsasını təşkil etdiyini bildirərək, bu səfərin Azərbaycan–Ukrayna dostluq münasibətlərinin daha da dərinləşməsinə və strateji tərəfdaşlığın yeni mərhələyə yüksəlməsinə mühüm töhfə verəcəyinə əminliyini ifadə etdi.

Paylaş:

Baxılıb: 470 dəfə