Abdullah Gül: Ermənistanla dialoqu fasiləsiz davam etdirəcəyik

Bakı:

11 °C

93 %

2 m/s

Əlaqə

AZ RU EN

Ana səhifə / Siyasət / Abdullah Gül: Ermənistanla dialoqu fasiləsiz davam etdirəcəyik

Abdullah Gül: Ermənistanla dialoqu fasiləsiz davam etdirəcəyik

16.10.2009 [09:40]

APA-nın əməkdaşının Bursada Ermənistan prezidentinin şərəfinə verilmiş ziyafətdən qeydləri
Bursa valisi Şahabettin Harput prezident Abdullah Gülün dəvəti ilə Türkiyə və Ermənistan futbol maçını izləmək üçün Bursaya gələn Ermənistan dövlət başçısı Serj Sərkisyanın şərəfinə ziyafət verib. APA-nın ziyafətdə iştirak edən əməkdaşının məlumatına görə, “Almira” otelindəki qapalı ziyafətə Türkiyə və xarici media orqanlarından təmsilçilər qonaq kimi dəvət ediliblər. Futbol matçından sonra ziyafət salonuna gələn Abdullah Gül və Serj Sərkisyan Türkiyədəki erməni icmasının nümayəndələri ilə söhbət ediblər. Media təmsilçilərinin suallarını cavablandıran Türkiyə prezidenti Abdullah Gül son 13 ayda çox böyük məsafə qət edildiyini bildirib: “İki ölkə arasında buzları bu qədər əridə biləcəyimizə çox adam yəqin ki, inanmazdı. Bunu bacardığımıza görə çox sevinirik”. Söhbətdə iştirakçıların “Bu yol sizi Osloya - Nobel mükafatına qədər apararmı?”sualına cavab verən Türkiyə prezidenti deyib ki, bizim mükafat almaq kimi bir narahatlığımız yoxdur: “Biz öz işimizi ən yaxşı şəkildə görərək bölgəyə sülh və rifah gətirmək istəyirik. Ona görə də ölkələrimiz arasındakı dialoqu fasiləsiz davam etdirəcəyik”.
“Milliyyət” qəzetinin köşə yazarı Taha Akyol isə Serj Sərkisyana bildirib ki, onun Türkiyəyə gəlişini alqışlayır və bu prosesə ürəkdən dəstək verir. Salondan verilən “Geri dönüşü olmayan bir yola girildimi?” sualına isə Serj Sərkisyan gülümsəyərək cavab verməyib. “Şarl Aznavur və başqa sənətkarların Türkiyədə konsertlər verməsinə necə baxırsınız?” sualının cavabında Serj Sərkisyan deyib ki, onların çoxu bizim Türkiyə ilə heç bir ön şərt olmadan münasibət yaratmağımıza normal baxırlar: “Proseslərin kənar müdaxilə olmadan irəliləməsindən yaxşı şey ola bilməz”. APA təmsilçisinin Sərkisyana ünvanladığı “Cərəyan edən proseslərdən məmnun olduğunuz görünür. Bu proses Qarabağın işğaldan azad edilməsinə nə dərəcədə təsir göstərəcək?” sualına cavab olaraq Ermənistan prezidenti bildirib ki, “Biz daha ciddi işlərlə, məsələn, Türkiyə-Ermənistan münasibətlərinin normallarşdırılması ilə məşğuluq”. APA-nın Türkiyə və Ermənistan dövlət başçılarına verdiyi “Buradan Azərbaycana müştərək mesaj vermək istərdinizmi?” sualı isə cavabsız qalıb. Sərkisyanı yola salarkən Türkiyə prezidenti Abdullah Gül deyib ki, “əgər qalıb qonağımız olun desəm, bunu söz gəlişi demiş olaram. Ona görə də “Yolçu yolunda gərək” deyirəm. Qazaxıstana gedəcəyinizi bilirəm. Hörmətli Nazarbayevə salamımı yetirin. Ona deyin ki, bizim atdığımız addımlara diqqətlə yanaşsın”. Ziyafətdə iştirak edən iş adamı Şarık Tara Serj Sərkisyana bildirib ki, gələcəkdə enerji layihələri ilə bağlı Ermənistana sərmayə qoymağa hazırdır. Ziyafətdə Türkiyədəki yəhudi icmasının bəzi liderləri ilə yanaşı, idmana cavabdeh dövlət naziri Faruk özak, AKP Bursa millət vəkilləri, MHP Ankara millət vəkili Toğrul Türkeş də iştirak ediblər.

Paylaş:

Baxılıb: 1173 dəfə